ಈ ದೇವಸ್ಥಾನ ಗುರುತಿಸಬಲ್ಲಿರಾ ಎಂಬ 'ಲಾಸ್ಟ್ ಟೆಂಪಲ್' ಪ್ರಶ್ನೆಗೆ ಪ್ರಧಾನಿ ಮೋದಿ ಉತ್ತರವೇನು?

ಹೊಸದಿಲ್ಲಿ: ಇತ್ತೀಚಿಗೆ ಟ್ವಿಟ್ಟರ್‌ನಲ್ಲಿ ನದಿ ದಂಡೆಯ ಮೇಲೆ ವಿವಿಧ ಬಣ್ಣಗಳ ದೀಪೊಗಳಿಂದ ಕಂಗೊಳಿಸುತ್ತಿದ್ದ ಪುರಾತನ ದೇವಾಲಯವೊಂದರ ಫೋಟೋ ಭಾರೀ ವೈರಲ್ ಆಗಿತ್ತು. ಇದೀಗ ಪ್ರಧಾನಿ ಮೋದಿ ಈ ದೇವಸ್ಥಾನ ಯಾವುದು ಎಂಬ ಪ್ರಶ್ನೆಗೆ ಟ್ವೀಟ್ ಮೂಲಕ ಉತ್ತರಿಸಿ ಗಮನ ಸೆಳೆದಿದ್ದಾರೆ.

ಹೌದು, ಲಾಸ್ಟ್ ಟೆಂಪಲ್ ಎಂಬ ಟ್ವಿಟ್ಟರ್ ಅಕೌಂಟ್‌ನಲ್ಲಿ ಭಾರತದ ಅತ್ಯಂತ ಪುರಾತನ ದೇವಾಲಯವೊಂದರೆ ಫೋಟೋ ಅಪ್ಲೋಡ್ ಮಾಡಲಾಗಿತ್ತು. ಅಲ್ಲದೇ ಅಮೆರಿಕದ ಪ್ರಸಿದ್ಧ ಬರಗಾರ ಮಾರ್ಕರ್ ಟ್ವೇನ್ ಪುರಾತನ ಭಾರತದ ಕುರಿತು ಹೇಳಿದ್ದ '' ಇತಿಹಾಸಕ್ಕಿಂತಲೂ ಹಳೆಯ, ಸಂಸ್ಕೃತಿಗಿಂತಲೂ ಹಳೆಯ ಹಾಗೂ ದಂತಕಥೆಗಳಿಗಿಂತಲೂ ಪುರಾತನ. ಅಲ್ಲದೇ ಈ ಎಲ್ಲವನ್ನೂ ಸೇರಿಸಿದರೂ ಭಾರತದ ಇತಿಹಾಸ ಅದಕ್ಕಿಂತ ದುಪ್ಪಟ್ಟು ಹಳೆಯದಾಗುತ್ತದೆ..'' ಎಂಬ ಉಕ್ತಿಯನ್ನು ಸೇರಿಸಲಾಗಿತ್ತು.

ಲಾಸ್ಟ್ ಟೆಂಪಲ್‌ ಟ್ವಿಟ್ಟರ್ ಅಕೌಂಟ್‌ನಲ್ಲಿ ಶೇರ್ ಮಾಡಲಾಗಿದ್ದ ದೇವಾಲಯದ ಫೋಟೋ ಯಾವುದು ಎಂಬುದನ್ನು ನೀವು ಗುರುತಿಸಬಲ್ಲಿರಾ ಎಂಬ ಪ್ರಶ್ನೆಯನ್ನು ಕೇಳಲಾಗಿತ್ತು.


ಈ ಟ್ವೀಟ್‌ಗೆ ಪ್ರತಿಕ್ರಿಯೆ ನೀಡಿರುವ ಪ್ರಧಾನಿ ಮೋದಿ, ನಾನು ಈ ದೇವಸ್ಥಾನ ಯಾವುದು ಎಂದು ಹೇಳಬಲ್ಲೆ. ಕಾರಣ ನಾನು ಎರಡು ವರ್ಷಗಳ ಹಿಂದೆಯೇ ಈ ದೇವಸ್ಥಾನದ ಫೋಟೋವನ್ನು ನನ್ನ ಟ್ವಿಟ್ಟರ್ ಅಕೌಂಟ್‌ನಲ್ಲಿ ಶೇರ್ ಮಾಡಿದ್ದೇನೆ ಎಂದು ಉತ್ತರಿಸಿದ್ದಾರೆ.

ಅದರಂತೆ ಪ್ರಧಾನಿ ಮೋದಿ ಲಾಸ್ಟ್ ಟೆಂಪಲ್ ಟ್ಟಿಟ್ಟರ್ ಪ್ರಶ್ನೆಗೆ ಉತ್ತರಿಸಿದ್ದು, ಇದು ಉತ್ತರಪ್ರದೇಶದ ಕಾಶಿಯಲ್ಲಿರುವ ರತ್ನೇಶ್ವರ್ ಮಹಾದೇವ್ ದೇವಸ್ಥಾನ ಎಂದು ಸ್ಪಷ್ಟಪಡಿಸಿದ್ದಾರೆ.


ಪ್ರಧಾನಿ ಮೋದಿ ರತ್ನೇಶ್ವರ್ ಮಹಾದೇವ್ ದೇವಸ್ಥಾನದಲ್ಲಿ 2017ರಲ್ಲಿ ನಡೆದ ದೇವ್ ದೀಪಾವಳಿಯ ಫೋಟೋಗಳನ್ನು ಟ್ವೀಟ್ ಮಾಡಿದ್ದರು. ಪ್ರಧಾನಿ ಫಾಲೋ ಮಾಡುವ ಲಾಸ್ಟ್ ಟೆಂಪಲ್ ಕೂಡ ಇದೇ ಫೋಟೋ ಶೇರ್ ಮಾಡಿ ಪ್ರಶ್ನೆ ಕೇಳಿತ್ತು.

ಲಕ್ಷ್ಮ ಲಕ್ಷ ದೀಪಗಳಿಂದ ಕಂಗೊಳಿಸಿದ ಕಾಶಿ..! ಸ್ವರ್ಗವೇ ನಾಚುವಂತಿತ್ತು ದೃಶ್ಯ

ಪ್ರಧಾನಿ ಮೋದಿ ಅವರ ಉತ್ತರ ಟ್ವಿಟ್ಟರ್‌ನಲ್ಲಿ ಭಾರೀ ಸದ್ದು ಮಾಡಿದ್ದು, ಪುರಾತನ ದೇವಸ್ಥಾನಗಳ ಕುರಿತ ಪ್ರಧಾನಿ ಮೋದಿ ಅವರ ಜ್ಞಾನವನ್ನು ಕೊಂಡಾಡಲಾಗುತ್ತಿದೆ.