47ರಿಂದ 56 ವರ್ಷದ ಸಂಸದರೊಂದಿಗೆ ಉಪಹಾರ ಸೇವಿಸಿದ ಪ್ರಧಾನಿ ಮೋದಿ

ಹೊಸದಿಲ್ಲಿ: ತಮ್ಮ ಅಧಿಕೃತ ನಿವಾಸದಲ್ಲಿ ಬುಧವಾರ ಬೆಳಗ್ಗೆ ಬಿಜೆಪಿಯ 47 ರಿಂದ 56 ವರ್ಷದ ಸಂಸದರೊಂದಿಗೆ ಪ್ರಧಾನಿ ನರೇಂದ್ರ ಮೋದಿ ಉಪಾಹಾರ ಸೇವಿಸಿದರು. ಎರಡನೇ ಅವಧಿಗೆ ಸರಕಾರ ರಚನೆ ಬಳಿಕ ಪಕ್ಷದ ಸಂಸದರೊಂದಿಗೆ ಪ್ರಧಾನಿ ಮೋದಿ ನಡೆಸಿದ ಆರನೇ ಭೇಟಿ ಇದಾಗಿದೆ.

ಸದ್ಯ ಸಂಸದರನ್ನು ಏಳು ತಂಡಗಳಾಗಿ ವಿಂಗಡಿಸಲಾಗಿದ್ದು, ಈಗಾಗಲೇ ಒಬಿಸಿ, ಎಸ್‌ಸಿ, ಎಸ್‌ಟಿ, ಯುವ ಸಂಸದರು, ಒಂದು ಬಾರಿ ಸಚಿವರಾಗಿರುವ ಸಂಸದರನ್ನು ಭೇಟಿ ಮಾಡಿ ಪ್ರಧಾನಿ ಚರ್ಚೆ ನಡೆಸಿದ್ದಾರೆ. ಅವರಿಗೆ ಆಡಳಿತ ದೃಷ್ಟಿಯಿಂದ ಅನೇಕ ಕಿವಿಮಾತುಗಳನ್ನು ಕೂಡ ಹೇಳಿದ್ದಾರೆ.

ಸಂಸತ್ತಿನಲ್ಲಿ ಮಾತನಾಡಬೇಕಾದ ವಿಚಾರಗಳ ಬಗ್ಗೆಯೂ ಸಂಸದರ ತಂಡಕ್ಕೆ ಅಧ್ಯಯನ ನಡೆಸಲು ಪ್ರಧಾನಿ ಸೂಚಿಸಿದ್ದಾರೆ ಎನ್ನಲಾಗಿದೆ.
ಇಂಥ ಭೇಟಿ ವೇಳೆ ಸಂಸದೀಯ ವ್ಯವಹಾರಗಳ ಸಚಿವ ಪ್ರಲ್ಹಾದ್‌ ಜೋಶಿ ಮತ್ತು ಗೃಹ ಸಚಿವ ಅಮಿತ್‌ ಶಾ ಹೊರತಾಗಿ ಇತರ ಕೇಂದ್ರ ಸಚಿವರಿಗೆ ಉಪಸ್ಥಿತಿಗೆ ಅವಕಾಶ ನೀಡಲಾಗಿಲ್ಲ. 56 ವರ್ಷಕ್ಕಿಂತ ಹಿರಿಯ ಬಿಜೆಪಿ ಸಂಸದರನ್ನು ಗುರುವಾರ ಪ್ರಧಾನಿ ಮೋದಿ ಭೇಟಿ ಮಾಡಿ ಚರ್ಚೆ ನಡೆಸಲಿದ್ದಾರೆ ಎನ್ನಲಾಗಿದೆ.