2300 ಕಿ.ಮೀ ಸಾಗರದಾಳದ ಕೇಬಲ್‌ ಯೋಜನೆ ಆ. 10ರಂದು ಪ್ರಧಾನಿಯಿಂದ ಉದ್ಘಾಟನೆ

ಹೊಸದಿಲ್ಲಿ: ಅಂಡಮಾನ್‌- ನಿಕೋಬಾರ್‌ ದ್ವೀಪದಿಂದ ಚೆನ್ನೈಗೆ ಸಂಪರ್ಕ ಕಲ್ಪಿಸುವ 2,300 ಕಿ.ಮೀ ಸಾಗರದಾಳದ ಕೇಬಲ್‌ ಯೋಜನೆಯನ್ನು ಪ್ರಧಾನಿ ನರೇಂದ್ರ ಮೋದಿ ಆಗಸ್ಟ್‌ 10ರಂದು ಉದ್ಘಾಟಿಸಲಿದ್ದಾರೆ.

1,224 ಕೋಟಿ ರೂಪಾಯಿ ಬೃಹತ್‌ ಮೊತ್ತದ ಈ ಯೋಜನೆಗೆ 2018ರ ಡಿಸೆಂಬರ್‌ 30ರಂದು ಪೋರ್ಟ್‌ಬ್ಲೇರ್‌ನಲ್ಲಿ ನರೇಂದ್ರ ಮೋದಿಯವರು ಅಡಿಗಲ್ಲು ಹಾಕಿದ್ದರು. ಯೋಜನೆ ನಿಗದಿತ ಅವಧಿಯಲ್ಲಿ ಮುಕ್ತಾಯವಾಗಿದ್ದು, ಉದ್ಘಾಟನೆಗೆ ಸಜ್ಜಾಗಿದೆ.

ಈ ಕೇಬಲ್‌ ಸೇವೆ ಅಂಡಮಾನ್‌ ನಿಕೋಬಾರ್‌ನ ರಾಜಧಾನಿ ಪೋರ್ಟ್‌ ಬ್ಲೇರ್‌ನಿಂದ ಸ್ವರಾಜ್‌ ದ್ವೀಪ್‌, ಲಿಟಲ್‌ ಅಂಡಮಾನ್‌, ಕಾರ್‌ ನಿಕೋಬಾರ್‌, ಕಮೋರ್ತಾ, ಗ್ರೇಟ್‌ ನಿಕೋಬಾರ್‌, ಲಾಂಗ್‌ ಐಲೆಂಡ್‌ ಹಾಗೂ ರಂಗತ್‌ ದ್ವೀಪಕ್ಕೂ ದೊರೆಯಲಿದೆ.

ಇದರಿಂದ ಡೇಟಾ ವೇಗವು ಪ್ರತಿ ಸೆಕೆಂಡ್‌ಗೆ 400 ಗಿಗಾ ಬೈಟ್‌ನಷ್ಟು ವೃದ್ಧಿಸಲಿದ್ದು, ಪ್ರಸ್ತುತ ಇರುವ ಸಂಪರ್ಕ ವೇಗಕ್ಕಿಂತ ನಾಲ್ಕು ಪಟ್ಟು ಹೆಚ್ಚಳವಾಗಲಿದೆ. ಈ ಸಂಪರ್ಕದಿಂದಾಗಿ ಅಂಡಮಾನ್‌ ಮತ್ತು ನಿಕೋಬಾರ್‌ ಪ್ರದೇಶದ ಜನರ ಇಂಟರ್ನೆಟ್‌ ಬಿಲ್‌ ಅಗ್ಗವಾಗಲಿದ್ದು, ಪ್ರಸ್ತುತ ಅಲ್ಲಿನವರು ದುಬಾರಿ ಬೆಲೆ ತೆತ್ತು ಇಂಟರ್ನೆಟ್‌ ಸೇವೆ ಪಡೆಯುತ್ತಿದ್ದಾರೆ.