ರಾಹುಲ್, ಕೇಜ್ರಿಯನ್ನು ಟ್ವಿಟರ್‌ನಲ್ಲಿ ಫಾಲೋ ಮಾಡಲು ಆರಂಭಿಸಿದ ಮೋದಿ

ಹೊಸದಿಲ್ಲಿ: ಸಾಮಾಜಿಕ ಜಾಲತಾಣಗಳಲ್ಲಿ ಸಕ್ರಿಯವಾಗಿರುವ ಪ್ರಧಾನಿ ನರೇಂದ್ರ ಮೋದಿ, ಹೋಳಿ ದಿನಂದು ಟ್ವೀಟರ್‌ನಲ್ಲಿ 140 ಮಂದಿಯನ್ನು ಫಾಲೋ ಮಾಡಲು ಆರಂಭಿಸಿದ್ದಾರೆ. ಇದರಲ್ಲಿ ರಾಜಕೀಯ ಬದ್ಧವೈರಿಗಳಾದ ಕಾಂಗ್ರೆಸ್ ಉಪಾಧ್ಯಕ್ಷ ರಾಹುಲ್ ಗಾಂಧಿ ಹಾಗೂ ದಿಲ್ಲಿ ಮುಖ್ಯಮಂತ್ರಿ ಅರವಿಂದ್ ಕೇಜ್ರಿವಾಲ್ ಸೇರಿರುವುದೂ ವಿಶೇಷ.

ಮೋದಿಯವರ ಈ ಕೃತ್ಯ ಬೆಳಕಿಗೆ ಬಾರದೇ ಮರೆಯಾಗುತ್ತಿತ್ತು. ಆದರೆ, ಕೇಜ್ರಿವಾಲ್ ತಕ್ಷಣವೇ ಮೋದಿಯವರಿಗೆ ಪ್ರತಿಕ್ರಿಯೆ ತೋರಿ, 'ಫಾಲೋ ಮಾಡುತ್ತಿರುವುದಕ್ಕೆ ಥ್ಯಾಂಕ್ಸ್. ಹ್ಯಾಪಿ ಹೋಳಿ. ಹಳೆಯದನ್ನು ಮರೆಯುವ ದಿನವಿದು. ಕೇಂದ್ರ-ದಿಲ್ಲಿ ಸರಕಾರಗಳ ಸಹಕಾರವನ್ನು ಭವಿಷ್ಯದಲ್ಲಿ ನಿರೀಕ್ಷಿಸುತ್ತೇನೆ,' ಎಂದು ಪ್ರತಿ ಟ್ವೀಟ್ ಮಾಡಿದ್ದಾರೆ.

ದಿಲ್ಲಿ ಉಪಮುಖ್ಯಮಂತ್ರಿ ಮನೀಷ್ ಸಿಸೋಡಿಯಾ ಅವರನ್ನು ಮೋದಿ ಫಾಲೋ ಮಾಡಲು ಆರಂಭಿಸಿದ್ದು, ಅವರೂ 'ಗೃಹ ಮಂತ್ರಾಲಯದಲ್ಲಿ ಸಿಕ್ಕಿಹಾಕಿಕೊಂಡಿರುವ ದಿಲ್ಲಿ ವಿಧಾನಸಭೆಗೆ ಸಂಬಂಧಿಸಿದ ಕಡತಗಳನ್ನು ತಕ್ಷಣವೇ ವಿಲೇವಾರಿ ಮಾಡಿ,' ಎಂದು ಆಗ್ರಹಿಸಿ ಪ್ರತಿ ಟ್ವೀಟ್ ಮಾಡಿದ್ದಾರೆ.

ಮೋದಿ ಕಾಂಗ್ರೆಸ್ ನಾಯಕರಾದ ಶರದ್ ಯಾದವ್, ಸೀತಾರಾಮ್ ಯಚೂರಿ ಮತ್ತು ಶಶಿ ತರೂರ್ ಅವರನ್ನೂ ಸಹ ಫಾಲೋ ಮಾಡಲು ಆರಂಭಿಸಿದ್ದಾರೆ.