ಪಿಎಂಸಿ ಬ್ಯಾಂಕ್ ಕರ್ಮಕಾಂಡ: 6,500 ಕೋಟಿ ಹಗರಣದ ಕಿಂಗ್‌ಪಿನ್ ಬಂಧನ!

ಮುಂಬಯಿ: ಪಂಜಾಬ್ ಹಾಗೂ ಮಹಾರಾಷ್ಟ್ರ ಸಹಕಾರಿ ಬ್ಯಾಂಕ್‌ನ ಕಾರ್ಯಕಾರಿ ನಿರ್ದೇಶಕ ಜಾಯ್ ಥಾಮಸ್ ಎಂಬಾತನನ್ನು ಬಂಧಿಸಲಾಗಿದೆ. ಜಾಯ್ ಥಾಮಸ್ ವಿರುದ್ಧದ 6,500 ಕೋಟಿ ರೂ. ಹಗರಣದ ಆರೋಪ ಕೇಳಿ ಬಂದ ಕಾರಣ, ಈಗಾಗಲೇ ಅಮಾನತ್ತು ಮಾಡಲಾಗಿತ್ತು. ಇದೀಗ ಬೃಹತ್ ಹಗರಣಕ್ಕೆ ಸಾಕ್ಷ್ಯಗಳು ಸಿಕ್ಕಿರುವ ಹಿನ್ನೆಲೆಯಲ್ಲಿ ಆತನನ್ನು ಬಂಧಿಸಲಾಗಿದೆ, ಜಾಯ್ ಥಾಮಸ್ ಬಂಧನವನ್ನು ಮುಂಬಯಿಯ ಆರ್ಥಿಕ ಅಪರಾಧಗಳ ವಿಭಾಗ ಖಚಿತಪಡಿಸಿದೆ.

ಗೃಹ ಅಭಿವೃದ್ಧಿ ಹಾಗೂ ಮೂಲಸೌಕರ್ಯ ನಿಗಮಕ್ಕೆ ಪಿಎಂಸಿ ಬ್ಯಾಂಕ್‌ ಸಾಲ ನೀಡಿತ್ತು. ಈ ನಿಗಮದ ಕೆಲವು ಹಿರಿಯ ಅಧಿಕಾರಿಗಳ ವಿರುದ್ಧ ಜಾರಿ ನಿರ್ದೇಶನಾಲಯ ಅಕ್ರಮ ಹಣ ಸಾಗಾಟ ಪ್ರಕರಣ ದಾಖಲಿಸಿತ್ತು. ಇದೇ ನಿಗಮದ ಅಧಿಕಾರಿಗಳು ಪಿಎಂಸಿ ಬ್ಯಾಂಕ್‌ನ ಮಾಜಿ ಸದಸ್ಯರೂ ಆಗಿದ್ದರು. ಹೀಗಾಗಿ ಹಗರಣ ದೊಡ್ಡ ಮಟ್ಟದಲ್ಲಿ ನಡೆದಿರುವ ಶಂಕೆ ವ್ಯಕ್ತವಾಗಿದೆ.

6,500 ಕೋಟಿ ರೂ. ಹಗರಣ ಸಂಬಂಧ ಮುಂಬೈನ 6 ಕಡೆಗಳಲ್ಲಿ ಶೋಧ ಕಾರ್ಯಾಚರಣೆ ನಡೆದಿದೆ. ಗೃಹ ಅಭಿವೃದ್ಧಿ ಹಾಗೂ ಮೂಲಸೌಕರ್ಯ ನಿಗಮದ ಕೆಲವು ಅಧಿಕಾರಿಗಳು ಕಳೆದ ಅಕ್ಟೋಬರ್ 9 ರಿಂದಲೇ ಪೊಲೀಸರ ಅತಿಥಿಗಳಾಗಿದ್ದಾರೆ.

ಇದೀಗ ದಿವಾಳಿಯಾಗಿರುವ ಗೃಹ ಅಭಿವೃದ್ಧಿ ಹಾಗೂ ಮೂಲಸೌಕರ್ಯ ನಿಗಮಕ್ಕೆ ಪಿಎಂಸಿ ಬ್ಯಾಂಕ್ ತನ್ನಲ್ಲಿದ್ದ ಶೇಕಡಾ 75ರಷ್ಟು ಹಣವನ್ನು ಸಾಲವಾಗಿ ನೀಡಿದೆ. ಪಿಎಂಸಿ ಬ್ಯಾಂಕ್‌ನಿಂದ ಬಂದ ಹಣವನ್ನು ಬೇರೆಡೆಗೆ ವರ್ಗಾವಣೆ ಮಾಡಲು ಗೃಹ ಅಭಿವೃದ್ಧಿ ಹಾಗೂ ಮೂಲಸೌಕರ್ಯ ನಿಗಮದ ಸಿಬ್ಬಂದಿ ಬರೋಬ್ಬರಿ 21 ಸಾವಿರ ನಕಲಿ ಬ್ಯಾಂಕ್ ಖಾತೆಗಳನ್ನು ಸೃಷ್ಟಿಸಿದ್ದರು ಎಂದು ತಿಳಿದುಬಂದಿದೆ! ರಿಯಲ್ ಎಸ್ಟೇಟ್‌ ವ್ಯವಹಾರ ನಡೆಸುತ್ತಿದ್ದ ಈ ನಿಗಮ, ಪಿಎಂಸಿ ಬ್ಯಾಂಕ್‌ನಿಂದ ಸಾಲ ಪಡೆಯುವಾಗ ಈಗಾಗಲೇ ಹಲವು ಬ್ಯಾಂಕ್‌ಗಳಲ್ಲಿ ಬಾಕಿ ಉಳಿಸಿಕೊಂಡಿರುವ ಸಾಲದ ಬಗ್ಗೆ ಪ್ರಸ್ತಾಪ ಮಾಡಿರಲಿಲ್ಲ. ಪಿಎಂಸಿ ಬ್ಯಾಂಕ್ ಕೂಡಾ ತನಗೆ ಈ ವಿಚಾರ ಗೊತ್ತಿದ್ದರೂ ಮುಚ್ಚಿಟ್ಟಿತ್ತು.

ಭಾರತೀಯ ರಿಸರ್ವ್ ಬ್ಯಾಂಕ್‌ಗೆ ಕೂಡಾ ಪಿಎಂಸಿ ಬ್ಯಾಂಕ್ ಸುಳ್ಳು ಹೇಳಿದೆ. ಕಳೆದ 10 ವರ್ಷಗಳಿಂದ ಸುಳ್ಳು ವರದಿ ನೀಡುತ್ತಾ ಬಂದಿದೆ. ಪಿಎಂಸಿ ಬ್ಯಾಂಕ್‌ ಹಗರಣದ ಪರಿಣಾಮ, ದೇಶದ ಬ್ಯಾಂಕಿಂಗ್ ವಲಯದ ಮೇಲೆ ಗಂಭೀರ ಪರಿಣಾಮ ಬೀರುವ ಸಾಧ್ಯತೆಗಳು ದಟ್ಟವಾಗಿವೆ.

ತಾನೂ ಸತ್ತಳು, ಜೊತೆಗೆ ವೃದ್ಧನ ಜೀವವನ್ನೂ ತೆಗೆದಳು!: ಗುಜರಾತ್‌ನಲ್ಲೊಂದು ಡಬಲ್ ಡೆತ್