ಪಿಒಕೆನಲ್ಲಿ ಜನಿಸಿ ಕಾಶ್ಮೀರ ಚುನಾವಣೆ ಗೆದ್ದ ಇಬ್ಬರು ಮಹಿಳೆಯರು

ಶ್ರೀನಗರ: ಪಾಕ್‌ ಆಕ್ರಮಿತ ಕಾಶ್ಮೀರದಲ್ಲಿ ಜನಿಸಿ, ಮಾಜಿ ಉಗ್ರರನ್ನು ಮದುವೆಯಾಗಿ ಜಮ್ಮು-ಕಾಶ್ಮೀರದಲ್ಲಿ ನೆಲೆಸಿರುವ 30-35ರ ಆಸುಪಾಸಿನ ಇಬ್ಬರು ಮಹಿಳೆಯರು ಕುಪ್ವಾರ ಜಿಲ್ಲೆಯ ಪಂಚಾಯಿತಿ ಚುನಾವಣೆಯಲ್ಲಿ ಗೆದ್ದು ಹೊಸ ದಾಖಲೆ ಬರೆದಿದ್ದಾರೆ.

ಪಂಚಾಯಿತಿ ಚುನಾವಣೆಯಲ್ಲಿ ಪಾಲ್ಗೊಳ್ಳದಂತೆ ಉಗ್ರರು ಕಣಿವೆಯಲ್ಲಿ ಮೊದಲಿನಿಂದಲೂ ಬೆದರಿಕೆ ಹಾಕುತ್ತಲೇ ಬಂದಿದ್ದಾರೆ. ಇಂತಹ ಬೆದರಿಕೆಗಳಿಂದ ಕಡಿಮೆ ಮತದಾನ ನಡೆದಿದ್ದು, ಅದರ ಮಧ್ಯೆಯೇ ದಿಲ್‌ಶಾದಾ ಬೇಗಂ ಮತ್ತು ಆರಿಫಾ ಬೇಗಂ ಗೆದ್ದು ಗಮನ ಸೆಳೆದಿದ್ದಾರೆ.

1990ರ ದಶಕದಲ್ಲಿ ಉಗ್ರ ಕೃತ್ಯದ ತರಬೇತಿ ಪಡೆಯಲು ಕಾಶ್ಮೀರಕ್ಕೆ ಗಡಿ ನುಸುಳಿ ಬಂದಿದ್ದ ಮೊಹಮ್ಮದ್‌ ಯೂಸಫ್‌ ಭಟ್‌ನನ್ನು 2004ರಲ್ಲಿ ದಿಲ್‌ಶಾದಾ ಮದುವೆಯಾಗಿ, 2012ರಲ್ಲಿ ನೇಪಾಳದ ಮೂಲಕ ಕಾಶ್ಮೀರಕ್ಕೆ ಬಂದು ಪುನರ್‌ವಸತಿ ಯೋಜನೆಯಡಿ ಬಂದೂಕು ಬಿಟ್ಟು ಕಿರಾಣಿ ಅಂಗಡಿ ನಡೆಸುವ ಹೊಸ ಬದುಕು ಕಂಡುಕೊಂಡ ಪತಿಯ ಜತೆ ನೆಲೆಸಿದರು. ಪಿಒಕೆಯ ರಾಜಧಾನಿ ಮುಜಫ್ಫರಾಬಾದ್‌ನಲ್ಲಿ ಜನಿಸಿದ ಇವರು ಬೆಳೆದಿದ್ದೆಲ್ಲವೂ ಪಾಕ್‌ ಪಂಜಾಬ್‌ ಪ್ರಾಂತ್ಯದ ರಾವಲ್ಪಿಂಡಿಯಲ್ಲಿ. ಹೀಗಾಗಿಯೇ ಕಾಶ್ಮೀರದ ಜೀವನ ಅವರಿಗೆ ಹೊಸದಾಗಿತ್ತು. ಈಗ ಪಂಚಾಯಿತಿ ಚುನಾವಣೆಯಲ್ಲಿ ಗೆದ್ದು ಬಂದಿದ್ದಾರೆ.

ಇನ್ನು ಆರಿಫಾ ಬೇಗಂ ಅವರದ್ದೂ ಇದೇ ತೆರನಾದ ಕಥೆ. ಉಗ್ರ ಸಂಘಟನೆ ಸೇರಿ ಗಡಿ ನುಸುಳಿ ಬಂದು, ಬಳಿಕ ಹೊಸ ಜೀವನ ಕಟ್ಟಿಕೊಂಡ ಗುಲಾಂ ಮೊಹಮ್ಮದ್‌ ಮಿರ್‌ ಅವರನ್ನು ಮದುವೆಯಾಗಿರುವ ಬೇಗಂ ಬಿಜೆಪಿಯಿಂದ ಕುಪ್ವಾರ ಜಿಲ್ಲೆಯ ಕುಮುರಿಯಾಲ್‌-ಬಿ ಪಟ್ಟಣದ ಪಾಂಚ್‌ ಮತ್ತು ಸರಪಂಚ್‌ ವಾರ್ಡ್‌ಗಳಿಗೆ ಸ್ಪರ್ಸಿ ಎರಡರಲ್ಲೂ ಅವಿರೋಧವಾಗಿ ಆಯ್ಕೆಯಾಗಿದ್ದಾರೆ.