ರೇಪ್ ಸಂತ್ರಸ್ತ ಯುವತಿ ಮೇಲೆ ಪೊಲೀಸ್ ಪೇದೆಯಿಂದ ಮತ್ತೆ ಅತ್ಯಾಚಾರ!

ಹೊಸದಿಲ್ಲಿ: ರೇಪ್ ಸಂತ್ರಸ್ತ ಯುವತಿಯನ್ನು ಕೌನ್ಸಲಿಂಗ್‌ಗೆ ಕರೆದುಕೊಂಡು ಹೋಗುವ ನೆಪದಲ್ಲಿ ಪೊಲೀಸ್ ಪೇದೆಯೊಬ್ಬ ಆಕೆಯ ಮೇಲೆ ಅತ್ಯಾಚಾರ ಎಸಗಿರುವ ಘಟನೆ ರಾಷ್ಟ್ರ ರಾಜಧಾನಿ ದಿಲ್ಲಿಯಲ್ಲಿ ನಡೆದಿದೆ.

ಕೌನ್ಸಲಿಂಗ್‌ ನೆಪ ಹೇಳಿ ಮನೆಯಿಂದ ಕರೆದುಕೊಂಡ ಹೋದ ಪೊಲೀಸ್ ಪೇದೆ ವಿಶ್ರಾಮ್, ಉಸ್ಮಾನ್‌ಪುರ ಬಳಿಯ ಯಮುನಾ ಖಾದರ್ ಪ್ರದೇಶಕ್ಕೆ ಕರೆದೊಯ್ದು ಅತ್ಯಾಚಾರ ಎಸಗಿದ್ದಾನೆ. ಬಳಿಕ ಸ್ವಲ್ಪ ಹಣ ನೀಡಿ, ಈ ವಿಷಯ ಯಾರಿಗೂ ಹೇಳದಂತೆ ಬೆದರಿಕೆ ಹಾಕಿದ್ದಾನೆ. ಬಳಿಕ ಮನೆಗೆ ಹೋಗವಂತೆ ಹೇಳಿ, ಅಲ್ಲಿಂದ ಕಾಲ್ಕಿತ್ತಿದ್ದಾನೆಂದು ಸಂತ್ರಸ್ತ ಯುವತಿ ಪೊಲೀಸ್ ವಿಚಾರಣೆಯಲ್ಲಿ ಹೇಳಿಕೊಂಡಿದ್ದಾಳೆ.

ಮನೆಗೆ ಮರಳಿದ ಬಳಿಕ ಪೊಲೀಸ್ ಪೇದೆಯ ಕೃತ್ಯವನ್ನು ಯುವತಿ ಪೋಷಕರ ಬಳಿ ಹೇಳಿಕೊಂಡಿದ್ದಾಳೆ. ಬಳಿಕ ಆಕೆಯ ಪೋಷಕರು ಹಾಗೂ ನೆರೆಹೊರೆಯವರು ಸೇರಿ ಪೊಲೀಸ್ ಠಾಣೆ ಎದುರು ಪ್ರತಿಭಟನೆ ನಡೆಸಿದ್ದು, ಕಾಮುಕ ಪೊಲೀಸ್ ಪೇದೆಯನ್ನು ಬಂಧಿಸುವಂತೆ ಒತ್ತಾಯಿಸಿದ್ದಾರೆ.

ಕೃತ್ಯ ಸಂಬಂಧ ಅತ್ಯಾಚಾರ ಪ್ರಕರಣ ಮತ್ತು ಪೋಕ್ಸೊ ಕಾಯಿದೆ ಅಡಿಯಲ್ಲಿ ಪೇದೆಯನ್ನು ಸೇವೆಯಿಂದ ವಜಾಗೊಳಿಸಲಾಗಿದೆ ಎಂದು ಡಿಸಿಪಿ (ಕೇಂದ್ರ) ಮಂದೀಪ್ ರಾಂಧವ್ ತಿಳಿಸಿದ್ದಾರೆ.

ಏನಿದು ಘಟನೆ?

ಸೋಮವಾರ ಯುವಕನೊಬ್ಬ ಯುವತಿಯನ್ನು ತನ್ನ ಮನೆಗೆ ಕರೆದೊಯ್ದು ಅತ್ಯಾಚಾರ ಎಸಗಿದ. ಆತನ ವಿರುದ್ಧ ಅಪಹರಣದ ದೂರು ದಾಖಸಿಸಲು ಯುವತಿ ಹಾಗೂ ಆಕೆಯ ಪೋಷಕರು ಪೊಲೀಸರನ್ನು ಸಂಪರ್ಕಿಸಿದ್ದರು. ಆದರೆ, ಪೊಲೀಸರು ಮರುದಿನ ಬನ್ನಿ, ಆರೋಪಿ ಯುವಕನ ಕುಟುಂಬ ಕರೆಯಿಸಿ ಸಮಸ್ಯೆ ಬಗೆಹರಿಸೋಣ ಎಂದು ಭರವಸೆ ನೀಡಿದ್ದರು.

ಗುರುವಾರ ದಿನ ಸಂತ್ರಸ್ತೆಯ ಮನೆಗೆ ಬಂದ ಪೊಲೀಸ್ ಪೇದೆ ವಿಶ್ರಾಮ್ ಆಕೆಯನ್ನು ಆಪ್ತ ಸಮಾಲೋಚನೆಗಾಗಿ ಸ್ವಯಂ ಸೇವಾ ಸಂಸ್ಥೆಗೆ ಕರೆದೊಯ್ಯುವುದಾಗಿ ನಂಬಿಸಿ ಮಾರ್ಗ ಮಧ್ಯೆ ಯುವತಿ ಮೇಲೆ ಅತ್ಯಾಚಾರ ಎಸಗಿದ್ದಾನೆ.