ಬಿಹಾರದಲ್ಲಿ ಯೋಗಿ ಆದಿತ್ಯನಾಥ್ ಕಮಾಲ್!
ಬಿಹಾರ ವಿಧಾನಸಭೆ ಚುನಾವಣೆ ಹಿನ್ನೆಲೆಯಲ್ಲಿ ಸರಣಿ ಸಾರ್ವಜನಿಕ ಸಭೆಗಳನ್ನು ಉದ್ದೇಶಿಸಿ ಮಾತನಾಡುತ್ತಿರುವ ಉತ್ತರಪ್ರದೇಶ ಮುಖ್ಯಮಂತ್ರಿ ಯೋಗಿ ಆದಿತ್ಯನಾಥ್, ಎನ್‌ಡಿಎ ಅಭ್ಯರ್ಥಿಗಳ ಪರ ಪ್ರಚಾರ ನಡೆಸುತ್ತಿದ್ದಾರೆ. ಇಲ್ಲಿನ ಪಾಲಿಗಂಜ್‌ನಲ್ಲಿ ಚುನಾವಣಾ ಪ್ರಚಾರ ಸಭೆ ಉದ್ದೇಶಿಸಿ ಮಾತನಾಡಿದ ಯೋಗಿ ಆದಿತ್ಯನಾಥ್, ಪಾಕಿಸ್ತಾನ ಪರ ಹೇಳಿಕೆ ನೀಡುತ್ತಿರುವ ಕಾಂಗ್ರೆಸ್ ನಾಯಕ ರಾಹುಲ್ ಗಾಂಧಿ ಹಾಗೂ ಎಐಎಂಐಎಂ ಮುಖ್ಯಸ್ಥ ಅಸಾದುದ್ದೀನ್ ಒವೈಸಿ ಅವರಂತ ನಾಯಕರಿಂದ ಬಿಹಾರದ ಕಲ್ಯಾಣ ಸಾಧ್ಯವಿಲ್ಲ ಎಂದು ಕಿಡಿಕಾರಿದರು.
ಪಾಕ್ ಜಪ ಮಾಡುತ್ತಿರುವ ರಾಹುಲ್, ಒವೈಸಿ ಅವರಿಂದ ಬಿಹಾರದ ಕಲ್ಯಾಣ ಸಾಧ್ಯವೇ?: ಯೋಗಿ ಕಿಡಿ!
ರಾಹುಲ್ ಗಾಂಧಿ ಹಾಗು ಅಸಾದುದ್ದೀನ್ ಒವೈಸಿ ಪಾಕ್ ಜಪ ಮಾಡುತ್ತಿದ್ದಾರೆ. ಭಾರತವನ್ನು ಪಾಕಿಸ್ತಾನಕ್ಕೆ ಹೋಲಿಕೆ ಮಾಡಿ ಹೇಳಿಕೆಗಳನ್ನು ನೀಡುತ್ತಿದ್ದಾರೆ. ಇಂತಹವರ ಕೈಗೆ ಅಧಿಕಾರ ಸಿಕ್ಕರೆ ರಾಜ್ಯದ ಗತಿ ಏನಾಗಲಿದೆ ಎಂಬುದನ್ನು ಊಹಿಸಿ ಎಂದು ಯೋಗಿ ಆದಿತ್ಯನಾಥ್ ಮತದಾರರಲ್ಲಿ ಮನವಿ ಮಾಡಿದರು.
ಮೋದಿ-ನಿತೀಶ್ ಜೋಡಿಯನ್ನು ಸಚಿನ್-ಸೆಹ್ವಾಗ್‌ಗೆ ಹೋಲಿಸಿದ ರಾಜನಾಥ್!
ಬಿಹಾರ ವಿಧಾನಸಭಾ ಚುನಾವಣೆಯ ರಣಕಣ ರಂಗೇರಿದ್ದು, ರಾಜಕೀಯ ನಾಯಕರ ಹೇಳಿಕೆಗಳು ಭಾರೀ ಸುದ್ದಿಯಾಗುತ್ತಿವೆ. ಹೌದು, ಕೇಂದ್ರ ರಕ್ಷಣಾ ಸಚಿವ ರಾಜನಾಥ್ ಸಿಂಗ್, ಬಿಹಾರ ರಾಜಕೀಯದಲ್ಲಿ ಬಿಜೆಪಿ - ಜೆಡಿಯು ಮೈತ್ರಿಯನ್ನು ಕ್ರಿಕೆಟ್‌ನಲ್ಲಿ ಸಚಿನ್ - ಸೆಹ್ವಾಗ್‌ ಆರಂಭಿಕ ಜೋಡಿಗೆ ಹೋಲಿಕೆ ಮಾಡಿದ್ದಾರೆ.
ಬಿಹಾರದ ಬಿಜೆಪಿ-ಜೆಡಿಯು ಮೈತ್ರಿ ಸಚಿನ್-ಸೆಹ್ವಾಗ್‌ರಂತೆ ಸೂಪರ್‌ಹಿಟ್‌: ರಾಜನಾಥ್ ಸಿಂಗ್
ಬುಧವಾರ ಭೋಜ್‌ಪುರದಲ್ಲಿ ನಡೆದ ಚುನಾವಣಾ ರ‍್ಯಾಲಿಯಲ್ಲಿ ಮಾತನಾಡಿದ ರಾಜನಾಥ್ ಸಿಂಗ್, ಬಿಹಾರ ರಾಜಕೀಯದಲ್ಲಿ ಬಿಜೆಪಿ ಮತ್ತು ಜೆಡಿಯು ಜೋಡಿಯನ್ನು ತಿರಸ್ಕರಿಸಬೇಡಿ. ಇದು ಕ್ರಿಕೆಟ್‌ನ ಸಚಿನ್ ತೆಂಡೂಲ್ಕರ್ ಮತ್ತು ವಿರೇಂದ್ರ ಸೆಹ್ವಾಗ್‌ ಅವರ ಆರಂಭಿಕ ಜೋಡಿಯಂತೆ. ನಿತೀಶ್ ಕುಮಾರ್ ಮತ್ತು ಸುಶೀಲ್ ಮೋದಿ ಮೇಲೆ ಭ್ರಷ್ಟಾಚಾರದ ಆರೋಪ ಇದುವರೆಗೂ ಬಂದಿಲ್ಲ ಎಂದು ಹೇಳಿದ್ದಾರೆ.
ನಿತೀಶ್ ಕುಮಾರ್‌ಗೆ ಧಿಕ್ಕಾರದ ಸ್ವಾಗತ!
ಇನ್ನು ಚುನಾವಣಾ ಪ್ರಚಾರದಲ್ಲಿ ನಿರತವಾಗಿರುವ ಬಿಹಾರ ಮುಖ್ಯಮಂತ್ರಿ ನಿತೀಶ್ ಕುಮಾರ್ ಅವರಿಗೆ ಧಿಕ್ಕಾರದ ಸ್ವಾಗತ ನೀಡಿರುವುದು ಗಮನ ಸೆಳೆದಿದೆ. ಇಲ್ಲಿನ ಪಾರ್ಸಾದಲ್ಲಿ ನಡೆದ ಚುನಾವಣಾ ಪ್ರಚಾರ ಸಭೆ ವೇಳೆ ಕೆಲವರು ನಿತೀಶ್ ವಿರುದ್ಧ ಘೋಷಣೆಗಳನ್ನು ಕೂಗಿದರು.
ಚಿರಾಗ್‌‌ಗೆ ತೇಜಸ್ವಿ ಯಾದವ್ ಬೆಂಬಲ, ನಿತೀಶ್ ಕುಮಾರ್ ಚಿಂತೆ ಹೆಚ್ಚಿಸಿದ ಯುವ ನಾಯಕರ ನಡೆ
ಜೆಡಿಯು ಅಭ್ಯರ್ಥಿ ಚಂದ್ರಿಕಾ ರಾಯ್ ಪರ ಪ್ರಚಾರ ನಡೆಸಲು ಬಂದಿದ್ದ ನಿತೀಶ್ ಕುಮಾರ್, ಏಕಾಏಕಿ ನಡೆದ ಪ್ರತಿಭಟನೆಯಿಂದ ಕೆಲಕ್ಷಣ ಗೊಂದಲಕ್ಕೀಡಾದರು. ಬಳಿಕ ಪ್ರತಿಭಟನಾಕಾರರನ್ನು ಉದ್ದೇಶಿಸಿ ಮಾತನಾಡಿದ ನಿತೀಶ್, ಹೀಗೆ ಕಾರಣವಿಲ್ಲದೇ ಪ್ರತಿಭಟನೆ ನಡೆಸುವುದರಿಂದ ಅಭ್ಯರ್ಥಿಯ ಕುರಿತು ನಕಾರಾತ್ಮಕ ಸಂದೇಶ ರವಾನಿಸದಂತಾಗುತ್ತದೆ. ದಯವಿಟ್ಟು ಪ್ರತಿಭಟನೆ ಹಿಂಪಡೆಯಿರಿ ಎಂದು ನಿತೀಶ್ ಮನವಿ ಮಾಡಿದರು.
ನಿತೀಶ್ ಮತ್ತೆ ಅಧಿಕಾರಕ್ಕೆ ಬರುವುದು ಬಿಹಾರದ ಪಾಲಿಗೆ ದುರಂತ ಎಂದ ಚಿರಾಗ್!
ಮತ್ತೊಂದೆಡೆ ಮುಖ್ಯಮಂತ್ರಿ ನಿತೀಶ್ ಕುಮಾರ್ ವಿರುದ್ಧ ತಮ್ಮ ವಾಗ್ದಾಅಳಿಯನ್ನು ತೀವ್ರಗೊಳಿಸಿರುವ ಎಲ್‌ಜೆಪಿ ಮುಖ್ಯಸ್ಥ ಚಿರಾಗ್ ಪಾಸ್ವಾನ್, ನಿತೀಶ್ ಕುಮಾರ್ ಮತ್ತೆ ಅಧಿಕಾರಕ್ಕೆ ಬಂದರೆ ಬಿಹಾರದ ಪಾಲಿಗೆ ದೊಡ್ಡ ದುರಂತವಾಗಿ ಪರಿಣಮಿಸಲಿದೆ ಎಂದು ಹೇಳಿದ್ದಾರೆ.
ಚುನಾವಣಾ ಪ್ರಚಾರ ಸಭೆ ಉದ್ದೇಶಿಸಿ ಮಾತನಾಡಿದ ಚಿರಾಗ್ ಪಾಸ್ವಾನ್, ಬಿಹಾರದ ಹಿತದೃಷ್ಟಿಯಿಂದ ನಿತೀಶ್ ಮತ್ತೆ ಮುಖ್ಯಮಂತ್ರಿ ಕುರ್ಚಿ ಮೇಲೆ ಕುಳಿತುಕೊಳ್ಳದಿರುವುದೇ ಒಳಿತು ಎಂದು ಹೇಳಿದರು.
ರಾಮ್ ವಿಲಾಸ್ ಪಾಸ್ವಾನ್ ಶ್ರಾದ್ಧ ಕಾರ್ಯಕ್ರಮದಲ್ಲಿ ಚಿರಾಗ್ ಭೇಟಿ ಮಾಡಿದ ನಿತೀಶ್ ಕುಮಾರ್!
ಬಿಹಾರಕ್ಕೆ ಯುವ ನಾಯಕತ್ವದ ಅವಶ್ಯಕತೆಯಿದ್ದು, ಈ ನಾಯಕತ್ವವನ್ನು ಒದಗಿಸಲು ಎಲ್‌ಜೆಪಿ ಸಿದ್ಧವಾಗಿದೆ ಎಂದು ಚಿರಾಗ್ ನುಡಿದರು.
ಒಟ್ಟಿನಲ್ಲಿ ಬಿಹಾರ ವಿಧಾನಸಭೆ ಚುನಾವಣಾ ಅಖಾಡ ರಂಗೇರಿದ್ದು, ರಾಜಕೀಯ ಪಕ್ಷಗಳ ಬಿರುಸಿನ ಪ್ರಚಾರ ಮತದಾರರನ್ನು ಸೆಳೆಯುತ್ತಿದೆ.