5,851 ಕೋಟಿ ರೂ. ಮೊತ್ತದ ಚುನಾವಣಾ ಬಾಂಡ್‌ ಮಾರಾಟ

ಇಂದೋರ್‌: ರಾಜಕೀಯ ಪಕ್ಷಗಳಿಗೆ ದೇಣಿಗೆ ನೀಡುವ ಉದ್ದೇಶಕ್ಕಾಗಿ ಜನರು 2018ರ ಮಾರ್ಚ್‌ನಿಂದ 2019ರ ಮೇವರೆಗೆ 5,851.41 ಕೋಟಿ ರೂ. ಮೊತ್ತದ ಚುನಾವಣಾ ಬಾಂಡ್‌ಗಳನ್ನು ಖರೀದಿಸಿದ್ದಾರೆ. ಆ ಪೈಕಿ ರಾಷ್ಟ್ರ ರಾಜಧಾನಿ ದಿಲ್ಲಿಯೊಂದರಲ್ಲಿ ಶೇ. 80 ರಷ್ಟು ಬಾಂಡ್‌ಗಳ ನಗದೀಕರಣ ಮಾಡಿಕೊಳ್ಳಲಾಗಿದೆ.
ಮಧ್ಯಪ್ರದೇಶದ ನೀಮುಚ್‌ ಮೂಲದ ಆರ್‌ಟಿಐ ಕಾರ್ಯಕರ್ತ ಚಂದ್ರಶೇಖರ್‌ ಗೌಡ್‌ ಸಲ್ಲಿಸಿದ್ದ ಆರ್‌ಟಿಐ ಅರ್ಜಿಗೆ ಭಾರತೀಯ ಸ್ಟೇಟ್‌ ಬ್ಯಾಂಕ್‌ ನೀಡಿರುವ ಉತ್ತರದಲ್ಲಿ ಚುನಾವಣಾ ಬಾಂಡ್‌ಗಳ ವಿವರವಿದೆ. ದಿಲ್ಲಿಯಲ್ಲಿ 10 ಹಂತಗಳಲ್ಲಿ ರಾಜಕೀಯ ಪಕ್ಷಗಳು ಚುನಾವಣಾ ಬಾಂಡ್‌ಗಳನ್ನು ಮಾರಾಟ ಮಾಡಿದವು. ಅದರ ಮೊತ್ತ ಒಟ್ಟು 874.50 ಕೋಟಿ ರೂ., ಆದರೆ ದಿಲ್ಲಿಯಲ್ಲಿ ನಗದೀಕರಿಸಲಾಗಿರುವ ಬಾಂಡ್‌ಗಳ ಒಟ್ಟಾರೆ ಮೊತ್ತ ಐದು ಪಟ್ಟು ಹೆಚ್ಚಿದೆ. ಅಂದರೆ ಸುಮಾರು 4,715 ಕೋಟಿ ರೂ. ಎಂದು ಬ್ಯಾಂಕ್‌ ಹೇಳಿದೆ.

ಬೆಂಗಳೂರಿನಲ್ಲಿ ಒಟ್ಟು 195 ಕೋಟಿ ರೂ. ಮೊತ್ತದ ಚುನಾವಣಾ ಬಾಂಡ್‌ಗಳನ್ನು ಮಾರಾಟ ಮಾಡಲಾಗಿತ್ತು. ಆದರೆ ನಗದೀಕರಿಸಲಾಗಿರುವುದು ಕೇವಲ 1.5 ಕೋಟಿ ರೂ. ಮೊತ್ತ ಮಾತ್ರ ಎಂದು ಆರ್‌ಟಿಐ ಮಾಹಿತಿ ಹೇಳಿದೆ.
..........
ಎಲ್ಲಿ ಎಷ್ಟು ಮೊತ್ತದ ಬಾಂಡ್‌ ಖರೀದಿ ನಗದೀಕರಿಸಲಾಗಿರುವ ಮೊತ್ತ

ಮುಂಬಯಿ 1,782.36 121.13 (7%)

ಕೋಲ್ಕೊತಾ 1,389 167.50 (12%)

ಹೈದರಾಬಾದ್‌ 806.12 512.30

ಭುವನೇಶ್ವರ್‌ 315.76 184.20

ಚೆನ್ನೈ 184.20 51.55