ಮುಂಬಯಿ ಸ್ಫೋಟ: ಮೂವರಿಗೆ ಜೀವಾವಧಿ

ಮುಂಬಯಿ: 2002-03 ಮುಂಬಯಿ ಸ್ಫೋಟ ಪ್ರಕರಣದ ಮೂವರು ದೋಷಿಗಳಿಗೆ ಸ್ಪೆಷಲ್ ಪ್ರಿವೆನ್ಶನ್ ಆಫ್ ಟೆರರಿಂ ಕಾಯಿದೆ(ಪೋಟಾ) ಜಡ್ಜ್ ಪಿ.ಆರ್. ದೇಶ್‌ಮುಖ್ ಅವರು ಬುಧವಾರ ಜೀವಾವಧಿ ಶಿಕ್ಷೆ ಪ್ರಕಟಿಸಿದ್ದಾರೆ.

2002ರ ಡಿಸೆಂಬರ್ ಮತ್ತು 2003ರ ಮಾರ್ಚ್‌ನಲ್ಲಿ ಸೆಂಟ್ರಲ್ ರೈಲ್ವೆ ಸ್ಟೇಷನ್, ವಿಲೆ ಪಾರ್ಲೆ, ಮುಲುಂದ್‌ಗಳಲ್ಲಿ ನಡೆದ ಸ್ಫೋಟದ ಸಂಚು ರೂಪಿಸಿ ಬಾಂಬ್ ಇಟ್ಟಿದ್ದ ಮುಜಾಮ್ಮಿಲ್ ಅನ್ಸಾರಿ, ಫರ್ಹಾನ ಖೋಟ್‌, ವಾಹಿದ್‌ ಅನ್ಸಾರಿ ಜೀವಾವಧಿ ಶಿಕ್ಷೆಗೆ ಒಳಗಾದವರು.

ಅಪರಾಧಿಗೆ ಗಲ್ಲು ವಿಧಿಸಿದರೆ ಸೆಕೆಂಡ್‌ನಲ್ಲಿ ಆತನ ಜೀವನ ಮುಗಿದು ಹೋಗುತ್ತದೆ. ಅದರಿಂದ ಸ್ಫೋಟದ ಬಲಿಪಶುಗಳ ಸಂಕಟಕ್ಕೆ ಮುಕ್ತಿ ಸಿಗುವುದಿಲ್ಲ. ಹೀಗಾಗಿ ಅಪರಾಧಿ ಸಾಯುವವರೆಗೆ ಜೈಲಿನಲ್ಲಿ ಸವೆಯಬೇಕು ಎಂದು ಹೇಳಿದ ಜಡ್ಜ್ ದೇಶಮುಖ್, ಅಪರಾಧಿಗೆ ಏಕೆ ಗಲ್ಲು ವಿಧಿಸುತ್ತಿಲ್ಲ ಎಂಬುದಕ್ಕೆ ಕಾರಣವನ್ನೂ ವಿವರಿಸಿದ್ದಾರೆ.

ಈ ತೀರ್ಪು ಸರಿಯಾಗಿ ನ್ಯಾಯ ನೀಡಿದೆ ಎಂದು ಅನಿಸುತ್ತಿಲ್ಲ ಎಂಬುದಾಗಿ ಸ್ಫೋಟದಲ್ಲಿ ಮೃತಪಟ್ಟಿರುವ ವ್ಯಕ್ತಿಯ ಸೋದರ ನಂದಕಿಶೋರ್ ಸಾಳ್ವಿ ಹೇಳಿದ್ದಾರೆ.

ಈ ಎರಡು ಸ್ಫೋಟಗಳಿಗೆ 12 ಮಂದಿ ಬಲಿಯಾಗಿದ್ದು, 130 ಮಂದಿ ಗಾಯಗೊಂಡಿದ್ದರು.