ರಾಷ್ಟ್ರಪತಿ ರಾಮನಾಥ್‌ ಕೋವಿಂದ್‌ ಶಬರಿಮಲೆ ಭೇಟಿ ರದ್ದು

ಕಾಸರಗೋಡು (ಕೇರಳ) : ರಾಷ್ಟ್ರಪತಿ ರಾಮನಾಥ್‌ ಕೋವಿಂದ್‌ ಜ.6ರಂದು ಕೇರಳಕ್ಕೆ ಆಗಮಿಸಲಿದ್ದಾರೆ. ಆದರೆ ಭದ್ರತೆ ದೃಷ್ಟಿಯಿಂದ ಶಬರಿಮಲೆ ಭೇಟಿಯನ್ನು ರದ್ದುಪಡಿಸಲಾಗಿದೆ.

ಜ.6ರಂದು ಕೊಚ್ಚಿಗೆ ಆಗಮಿಸುವ ರಾಷ್ಟ್ರಪತಿ ಕೋವಿಂದ್‌ ಜ.7ರಂದು ಅಲ್ಲಿಂದ ಲಕ್ಷ ದ್ವೀಪಕ್ಕೆ ತೆರಳುವರು. ಜ.9ರಂದು ಮರಳಿ ಕೊಚ್ಚಿಗೆ ಆಗಮಿಸಿ, ಹೊಸದಿಲ್ಲಿಗೆ ತೆರಳಲಿದ್ದಾರೆ.

ರಾಷ್ಟ್ರಪತಿಗಳ ಶಬರಿಮಲೆ ದರ್ಶನಕ್ಕಾಗಿ ಭದ್ರತೆ ಕುರಿತು ರಾಷ್ಟ್ರಪತಿ ಭವನವು ಕೇರಳ ಸರಕಾರಕ್ಕೆ ತಿಳಿಸಿತ್ತು. ಅದರಂತೆ ದೇವಸ್ವಂ ಮಂಡಳಿ ಹಾಗೂ ರಾಜ್ಯ ಸರಕಾರ ಸಭೆ ನಡೆಸಿ ಹೆಲಿಪ್ಯಾಡ್‌ ನಿರ್ಮಿಸುವ ಬಗ್ಗೆ ಪರಿಶೀಲನೆ ನಡೆಸಲಾಗಿತ್ತು.

ಆದರೆ ರಾಷ್ಟ್ರಪತಿ ಆಗಮನದ ಸಂದರ್ಭದಲ್ಲಿಭದ್ರತೆ ಮತ್ತು ಮಕರ ಮಹೋತ್ಸವದ ಹಿನ್ನೆಲೆಯಲ್ಲಿ ಭಕ್ತರ ಸಂಖ್ಯೆ ಭಾರೀ ಹೆಚ್ಚಾಗುವ ಹಿನ್ನೆಲೆಯಲ್ಲಿ ಭದ್ರತೆ ಒದಗಿಸಲು ಸಾಧ್ಯವಿಲ್ಲವೆಂದು ಕೇರಳ ರಾಷ್ಟ್ರಪತಿ ಭವನಕ್ಕೆ ರಾಜ್ಯ ಸರಕಾರ ತಿಳಿಸಿದ ಹಿನ್ನೆಲೆಯಲ್ಲಿಶಬರಿಮಲೆ ಭೇಟಿಯನ್ನು ರದ್ದುಪಡಿಸಲಾಗಿದೆ.

ಜ.6ರಂದು ಕೇರಳದ ಕೊಚ್ಚಿಗೆ ಆಗಮಿಸಿ, ಶಬರಿಮಲೆಗೆ ತೆರಳಿ ಅಯ್ಯಪ್ಪ ದರ್ಶನ ನಡೆಸಲು ತೀರ್ಮಾನಿಸಲಾಗಿತ್ತು. ಕೊಚ್ಚಿಗೆ ಆಗಮಿಸುವ ರಾಷ್ಟ್ರಪತಿ ರಾಮನಾಥ್‌ ಕೋವಿಂದ್‌ ಕೊಚ್ಚಿಯಲ್ಲಿತಂಗಿ ಜ.7 ರಂದು ಲಕ್ಷ ದ್ವೀಪಕ್ಕೆ ತೆರಳಲಿದ್ದಾರೆ.