370ನೇ ವಿಧಿ ರದ್ದತಿ ಮತದಾನ ಹೆಚ್ಚಳಕ್ಕೆ ಪ್ರೇರಣೆಯಾಯ್ತು: ಮೋದಿ

ಹೊಸದಿಲ್ಲಿ: ಕಣಿವೆ ರಾಜ್ಯಕ್ಕೆ ವಿಶೇಷ ಸ್ಥಾನಮಾನ ನೀಡಿದ್ದ ಸಂವಿಧಾನದ 370ನೇ ವಿಧಿ ರದ್ದತಿ ಬಳಿಕ ಇದೇ ಮೊದಲ ಬಾರಿಗೆ ಜಮ್ಮು-ಕಾಶ್ಮೀರದಲ್ಲಿಗುರುವಾರ ನಡೆದ ಪಂಚಾಯಿತಿ ಚುನಾವಣೆಯಲ್ಲಿ ದಾಖಲೆಯ ಶೇ.98.3ರಷ್ಟು ಮತದಾನವಾಗಿರುವುದಕ್ಕೆ ಪ್ರಧಾನಿ ನರೇಂದ್ರ ಮೋದಿ ಮೆಚ್ಚುಗೆ ವ್ಯಕ್ತಪಡಿಸಿದ್ದು, ಇದು ಪ್ರಜಾಪ್ರಭುತ್ವದ ಶಕ್ತಿ ಎಂದಿದ್ದಾರೆ.



''ಕಣಿವೆಯಲ್ಲಿಜನತೆ ಹೆಚ್ಚು ಸಂಭ್ರಮ ಹಾಗೂ ಉತ್ಸಾಹದೊಂದಿಗೆ ಮತದಾನದಲ್ಲಿ ಪಾಲ್ಗೊಂಡಿರುವುದರ ಹಿಂದೆ 370ನೇ ವಿಧಿ ರದ್ದತಿ ಪ್ರಭಾವ ಎದ್ದು ಕಾಣುತ್ತದೆ. ಜಮ್ಮು-ಕಾಶ್ಮೀರದ ಅಭಿ ವೃದ್ಧಿಯ ಗತಿಯನ್ನು ಬದಲಿಸಲು ವಿಶೇಷ ಸ್ಥಾನಮಾನ ರದ್ದತಿ ಪ್ರೇರಕ ಶಕ್ತಿಯಾಗಿ ಕಾರ್ಯನಿರ್ವಹಿಸುತ್ತಿದೆ. ಯಾವುದೇ ಹಿಂಸಾಚಾರ ಇಲ್ಲದೇ ದಾಖಲೆ ಮತದಾನದೊಂದಿಗೆ ಪಂಚಾಯಿತಿ ಚುನಾವಣೆ ನಡೆದಿರುವುದು ಒಳ್ಳೆಯ ಬೆಳವಣಿಗೆಯಾಗಿದೆ,'' ಎಂದು ಮೋದಿ ಟ್ವೀಟ್‌ ಮಾಡಿದ್ದಾರೆ.

22 ಬಿಜೆಪಿ ಅಭ್ಯರ್ಥಿಗಳು ಸೇರಿ 27 ಮಂದಿ ಅವಿರೋಧ­ವಾಗಿ ಆಯ್ಕೆಯಾಗಿರು­ವುದಾಗಿ ಜಮ್ಮು-ಕಾಶ್ಮೀರ ಆಡಳಿತ ತಿಳಿಸಿದೆ. 307 ಪಂಚಾಯಿತಿಗಳಿಗೆ ನಡೆದ ಚುನಾವಣೆಯಲ್ಲಿ 1000ಕ್ಕೂ ಹೆಚ್ಚು ಅಭ್ಯರ್ಥಿಗಳು ಕಣದಲ್ಲಿದ್ದರು. ನ್ಯಾಷನಲ್‌ ಕಾನ್ಫರೆನ್ಸ್‌ (ಎನ್‌ಸಿ) ಮತ್ತು ಪೀಪಲ್ಸ್‌ ಡೆಮಾಕ್ರಟಿಕ್‌ ಪಕ್ಷ (ಪಿಡಿಪಿ) ಚುನಾವಣೆ­ಯನ್ನು ಬಹಿಷ್ಕರಿಸಿದ್ದವು. ಪಕ್ಷೇತರರು 217 ಪಂಚಾಯಿತಿಗಳ ಅಧಿಕಾರ ಹಿಡಿದಿದ್ದರೆ, ಬಿಜೆಪಿ 81 ಪಂಚಾಯಿತಿಗಳಲ್ಲಿಆಡಳಿತ ನಡೆಸಲಿದೆ. ಜಮ್ಮು-ಕಾಶ್ಮೀರ ನ್ಯಾಷನಲ್‌ ಪ್ಯಾಂಥರ್ಸ್ ಪಕ್ಷ 8 ಹಾಗೂ ಕಾಂಗ್ರೆಸ್‌ ಒಂದು ಪಂಚಾಯಿತಿಯಲ್ಲಿಅಧಿಕಾರ ಹಿಡಿದಿದೆ.