ದುರ್ಗಾದೇವಿಯನ್ನು 'ವೇಶ್ಯೆ' ಎಂದ ದಿಲ್ಲಿ ವಿವಿ ಸಹಾಯಕ ಪ್ರಾಧ್ಯಾಪಕ

ಹೊಸದಿಲ್ಲಿ: ನವರಾತ್ರಿ ಆರಂಭವಾಗಿ ದಿನಕಳೆದಿಲ್ಲ ಈ ಮಧ್ಯೆ ದಿಲ್ಲಿ ವಿಶ್ವ ವಿದ್ಯಾಲಯದ ಸಹಾಯಕ ಪ್ರಾಧ್ಯಾಪಕನೊಬ್ಬರು ದೇವಿಯನ್ನು ವೇಶ್ಯೆ ಎಂದು ಹೇಳಿದ್ದು ಸಾಮಾಜಿಕ ಜಾಲತಾಣದಲ್ಲಿ ಭಾರೀ ಆಕ್ರೋಶಕ್ಕೆ ಕಾರಣವಾಗಿದೆ.

ದಿಲ್ಲಿ ವಿಶ್ವವಿದ್ಯಾಲಯದ ಪ್ರಾಧ್ಯಾಪಕ ಪ್ರೊಫೆಸರ್ ಕೇದಾರ್ ಕುಮಾರ್ ಮಂಡಲ್ ಎಂಬಾತ ತಮ್ಮ ಫೇಸ್ ಬುಕ್ ಪೇಜ್ ನಲ್ಲಿ ‘ಭಾರತದ ಪೌರಾಣಿಕ ಕತೆಗಳಲ್ಲೇ ದುರ್ಗಾ ಮಾತೆ ಅತ್ಯಂತ ಸೆಕ್ಸಿ ವೇಶ್ಯೆ’ ಎಂದು ಬರೆದು ವಿವಾದಕ್ಕೀಡಾಗಿದ್ದಾರೆ. ಸೆಪ್ಟೆಂಬರ್ 22 ರಂದು ಸಂಜೆ ಸುಮಾರು 6.43ರ ಸುಮಾರಿಗೆ ಈ ಪೋಸ್ಟ್ ಪ್ರಕಟವಾಗಿತ್ತು.

ಈತನ ಪೋಸ್ಟ್‌ ಸಾಮಾಜಿಕ ಜಾಲತಾಣದಲ್ಲಿ ವೈರಲ್‌ ಆಗುತ್ತಿದ್ದಂತಯೇ ಎಬಿವಿಪಿ, ನ್ಯಾಷನಲ್ ಡೆಮಾಕ್ರಟಿಕ್ ಟೀಚರ್ಸ್ ಫ್ರಂಟ್ ಸೇರಿದಂತೆ ಹಲವಾರು ಬಿಜೆಪಿ ಕಾರ್ಯಕರ್ತರು ಕೇದಾರ್‌ ಹೇಳಿಕೆ ವಿರುದ್ಧ ಪ್ರತಿಭಟನೆ ನಡೆಸಿದ್ದು ಕೂಡಲೇ ಈತನ ವಿರುದ್ಧ ಕ್ರಮ ತೆಗೆದುಕೊಳ್ಳುವಂತೆ ವಿಶ್ವವಿದ್ಯಾಲಯಕ್ಕೆ ಆಗ್ರಹಿಸಿದ್ದಾರೆ.

ದೇವಿಯ ಹೆಸರಿಗೆ ಮಸಿಬಳಿಯುವ ಇಂತಹ ಪ್ರಾಧ್ಯಾಪಕರನ್ನು ಈ ಕೂಡಲೇ ಕೆಲಸದಿಂದ ಅಮಾನತು ಮಾಡುವಂತೆ ನಾವು ವಿಶ್ವವಿದ್ಯಾಲಯದ ಆಡಳಿತ ಮಂಡಳಿಗೆ ಆಗ್ರಹಿಸಿದ್ದೇವೆ ಎಂದು ಎಬಿವಿಪಿ ಹೇಳಿದೆ.

ಬಿಜೆಪಿ ಅಂಗ ಸಂಸ್ಥೆಯಾಗಿರುವ ನ್ಯಾಷನಲ್ ಡೆಮೋಕ್ರಟಿಕ್ ಫ್ರಂಟ್, ಕೇದಾರ್ ಮಂಡಲ್ ವಿರುದ್ಧ ದೆಹಲಿಯ ಲೋಧಿ ಕಾಲೋನಿ ಪೊಲೀಸ್ ಠಾಣೆಯಲ್ಲಿ ದೂರು ದಾಖಲಿಸಿದೆ.