9,603 ಗಡಿ ರಕ್ಷಕರಿಗೆ ಭಡ್ತಿ: ಕೇಂದ್ರ ಒಪ್ಪಿಗೆ

ಹೊಸದಿಲ್ಲಿ: ದೀರ್ಘಕಾಲದಿಂದ ನನೆಗುದಿಗೆ ಬಿದ್ದಿದ್ದ ದೇಶದ ಮೂರು ಗಡಿ ಕಾವಲು ಪಡೆಗಳ ಸುಮಾರು 9,600 ಅರೆಸೇನಾ ಯೋಧರಿಗೆ ಭಡ್ತಿ ನೀಡುವ ಪ್ರಸ್ತಾವನೆಗೆ ಕೊನೆಗೂ ಕೇಂದ್ರ ಸರಕಾರ ಅನುಮೋದನೆ ನೀಡಿದೆ.

ಗಡಿ ಕಾಯುವ ಜವಾಬ್ದಾರಿಯ ನಾನಾ ಹುದ್ದೆಗಳಲ್ಲಿ ಕರ್ತವ್ಯ ನಿರ್ವಹಿಸುತ್ತಿದ್ದ ಅರಸೇನಾ ಪಡೆಗಳ ಯೋಧರು ತಮ್ಮ ಹುದ್ದೆಗಳಲ್ಲಿ ಭಡ್ತಿ ಪಡೆಯಲಿದ್ದಾರೆ. ಕೇಂದ್ರ ಗೃಹ ಸಚಿವಾಲಯ ಮಾರ್ಚ್‌ 2ರಂದು ಈ ಸಂಬಂಧ ಆದೇಶ ಹೊರಡಿಸಿದ್ದು,ತಕ್ಷಣದಿಂದಲೇ ಅನ್ವಯವಾಗುವಂತೆ ಜಾರಿಗೆ ಬಂದಿದೆ. ಸರಕಾರದ ಈ ನಿರ್ಧಾರದಿಂದ ಮೂರು ಗಡಿ ಕಾವಲು ಪಡೆಗಳ ಒಟ್ಟು 9,603 ಸಿಬ್ಬಂದಿಗೆ ಭಡ್ತಿ ಸಿಗಲಿದೆ. ಸಶಸ್ತ್ರ ಸೀಮಾಬಲದ 4,095 ಸಿಬ್ಬಂದಿ, ಇಂಡೋ-ಟಿಬೆಟನ್‌ ಗಡಿ ಪೊಲೀಸ್‌ ಪಡೆಯ 3,024 ಸಿಬ್ಬಂದಿ ಹಾಗೂ ಅಸ್ಸಾಂ ರೈಫಲ್ಸ್‌ನ 2,484 ಸಿಬ್ಬಂದಿಗೆ ಭಡ್ತಿ ಲಭಿಸಲಿದೆ. 2012ರಿಂದಲೂ ಈ ಸಿಬ್ಬಂದಿಗೆ ಯಾವುದೇ ಭಡ್ತಿ ಸಿಕ್ಕಿರಲಿಲ್ಲ.