ಪೌರತ್ವ ಕಾಯ್ದೆ ಪರ-ವಿರೋಧ ಧ್ವನಿ: ಬೆಂಗಳೂರು ಸೇರಿದಂತೆ ದೇಶಾದ್ಯಂತ ಪ್ರತಿಧ್ವನಿ..!

ಪೌರತ್ವ ತಿದ್ದುಪಡಿ ಕಾಯಿದೆ ವಿರೋಧಿಸಿ ಬೆಂಗಳೂರಿನ ಕಂಟೋನ್ಮೆಂಟ್‌ ಬಳಿಯಿರುವ ಖುದ್ದೂಸ್‌ ಸಾಬ್‌ ಈದ್ಗಾ ಮೈದಾನದಲ್ಲಿ ಮುಸ್ಲಿಂ ಸಮುದಾಯದ ಬೃಹತ್‌ ಪ್ರತಿಭಟನೆ ನಡೆಯಿತು. ಈ ವೇಳೆ ಮಾತನಾಡಿದ ಮೌಲಾನಾ ಜುಲ್ಫಿಕರ್‌ ನೂರಿ, 500 ವರ್ಷದ ಕಾಗದಗಳು ಬಾಬ್ರಿ ಮಸೀದಿಯನ್ನು ಉಳಿಸಿಲ್ಲ. ಇನ್ನು ಪೌರತ್ವಕ್ಕೆ ದಾಖಲೆಗಳನ್ನು ಕೊಡುವುದು ಎಲ್ಲಿಂದ ಎಂದು ಖಾರವಾಗಿ ಪ್ರಶ್ನಿಸಿದರು. ಪ್ರತಿಭಟನೆಗೆ ದೊಡ್ಡ ಸಂಖ್ಯೆಯಲ್ಲಿ ಜನರು ಹರಿದು ಬಂದಿದ್ದರು. ಹೀಗಾಗಿ, ಮೇಕ್ರಿ ವೃತ್ತದಿಂದ ಕಂಟೋನ್ಮೆಂಟ್ ನಿಲ್ದಾಣದವರೆಗಿನ ರಸ್ತೆ ಹಾಗೂ ಸುತ್ತಲಿನ ರಸ್ತೆಗಳಲ್ಲಿ ಟ್ರಾಫಿಕ್ ಜಾಮ್ ಉಂಟಾಗಿತ್ತು. ಶೇಕಡಾ 10ರಷ್ಟು ಮುಸ್ಲಿಮರು ಹೊರ ಬಂದಿದ್ದಕ್ಕೇ ದೇಶ ಹೊತ್ತಿ ಉರಿಯುತ್ತಿದೆ. ಇನ್ನು ಎಲ್ಲಾ ಮುಸ್ಲಿಮರೂ ಹೊರ ಬಂದ್ರೆ ಏನಾಗುತ್ತೋ ಗೊತ್ತಿಲ್ಲ. ಇದು ಬಿಜೆಪಿಯ ಅಪ್ಪನವರ ದೇಶವಲ್ಲ, ಗಾಂಧಿಯ ದೇಶವಿದು ಎಂದು ಮೌಲಾನಾ ಜುಲ್ಫಿಕರ್ ನೂರಿ ಆಕ್ರೋಶ ವ್ಯಕ್ತಪಡಿಸಿದರು.