ಕೇವಲ 50 ಸಾವಿರಕ್ಕೂ 'ಸೈ' ಅಂತಾನೆ ರವಿ ಪೂಜಾರಿ

ಅಹಮದಾಬಾದ್: ವಿದೇಶದಲ್ಲಿ ನೆಲೆಯೂರಿರುವ ಗ್ಯಾಂಗ್‌ಸ್ಟರ್ ರವಿ ಪೂಜಾರಿ ಭೂಗತ ಜಗತ್ತಿನ ಹಿಡಿತ ಕಳೆದುಕೊಂಡಿದ್ದು, ಕೇವಲ 50 ಸಾವಿರ ರೂಪಾಯಿಗಳಿಗೂ 'ಸೈ' ಅನ್ನುವ ಸ್ಥಿತಿಯಲ್ಲಿದ್ದಾನೆ ಎಂದು ಪೊಲೀಸರ ರಹಸ್ಯ ತನಿಖೆಯಲ್ಲಿ ಬಹಿರಂಗಗೊಂಡಿದೆ.

ರವಿ ಪೂಜಾರಿಯ ಕರೆ ವಿವರಗಳ ಬಗ್ಗೆ ತನಿಖೆ ನಡೆಸಿದ ಕ್ರೈಂ ಬ್ರ್ಯಾಂಚ್ ಅಧಿಕಾರಿಗಳು ಈ ಮಾಹಿತಿಯನ್ನು ಬಹಿರಂಗಪಡಿಸಿದ್ದಾರೆ.

'ರವಿ ಪೂಜಾರಿ ಹಾಗೂ ಬಿಲ್ಡರ್ ನಡುವಿನ ಫೋನ್‌ ಸಂಭಾಷಣೆ ಆಲಿಸಿದ್ದೇವೆ. ಅದರಲ್ಲಿ ಗ್ಯಾಂಗ್‌ಸ್ಟರ್ ರವಿ ಪೂಜಾರಿ ಕನಿಷ್ಠ ಪಕ್ಷ ಫೋನ್ ಬಿಲ್ ಆದ್ರು ಪಾವತಿಸುವಂತೆ ಬಿಲ್ಡರ್ ಬಳಿ ಕೇಳಿಕೊಂಡಿದ್ದ' ಎಂದು ಹಿರಿಯ ಪೊಲೀಸ್ ಅಧಿಕಾರಿಗಳು ಮಾಹಿತಿ ನೀಡಿದ್ದಾರೆ.

'ಪೂಜಾರಿ 'ಡಿ' ಕಂಪನಿಗೆ ಮರಳಿರುವ ಕುರಿತು ಸುಳಿವು ಹುಡುಕುತ್ತಿದ್ದೇವೆ. ಆದರೆ, ಇಲ್ಲಿಯವರೆಗೂ ಯಾವುದೇ ಖಚಿತ ಮಾಹಿತಿ ಲಭ್ಯವಾಗಿಲ್ಲ. 'ಡಿ' ಕಂಪನಿ ದೊಡ್ಡ ಅವ್ಯವಹಾರ ಹಾಗೂ ಹಗರಣಗಳನ್ನು ನಡೆಸುತ್ತಿಲ್ಲ. ಆದರೆ, ಪೂಜಾರಿ ಮಾತ್ರ ಇಂತಹ ಕೆಲಸದಲ್ಲಿ ತೊಡಗಿದ್ದಾನೆ' ಎಂದು ಹಿರಿಯ ಕ್ರೈಂ ಬ್ರಾಂಚ್ ಅಧಿಕಾರಿಯೊಬ್ಬರು ತಿಳಿಸಿದ್ದಾರೆ.