ಯೋಧರು ಥಳಿಸಿದ್ದರಿಂದಲೇ ಉಗ್ರನಾದ: ಸುಸೈಡ್ ಬಾಂಬರ್ ಕುಟುಂಬ

ಶ್ರೀನಗರ: ಮೂರು ವರ್ಷದ ಹಿಂದೆ ಭಾರತೀಯ ಯೋಧರು ಥಳಿಸಿದ್ದರಿಂದಲೇ ತಮ್ಮ ಮಗ ಉಗ್ರನಾದ ಎಂದು ಆತ್ಮಾಹುತಿ ದಾಳಿಕೋರ ಆದಿಲ್‌ ಅಹಮದ್‌ ದರ್‌ನ ಪಾಲಕರು ಆರೋಪಿಸಿದ್ದಾರೆ.

''ದಾಳಿಯಲ್ಲಿ ಮೃತಪಟ್ಟಿರುವ ಯೋಧರ ಕುಟುಂಬಗಳಿಗೆ ಆಗಿರುವ ನೋವು ನಮಗೂ ಆಗಿದೆ. ನಾವೂ ಮಗನನ್ನು ಕಳೆದುಕೊಂಡಿದ್ದೇವೆ. ಮೂರು ವರ್ಷ ಹಿಂದೆ, 2016ರಲ್ಲಿ ಶಾಲೆಯಿಂದ ಮರಳುತ್ತಿದ್ದ ಆದಿಲ್‌ ಹಾಗೂ ಸ್ನೇಹಿತರನ್ನು ಯೋಧರು ತೀವ್ರವಾಗಿ ಥಳಿಸಿದ್ದರು. ಸೈನಿಕರತ್ತ ಕಲ್ಲು ತೂರಾಟ ನಡೆಸಿರುವ ಆರೋಪ ಹೊರಿಸಿದ್ದರು. ಮಗ ಆಗಲೇ ಉಗ್ರನಾಗುವ ನಿರ್ಧಾರಕ್ಕೆ ಬಂದಿದ್ದ,'' ಎಂದು ಆದಿಲ್‌ ತಂದೆ ಗುಲಾಮ್‌ ಹಸನ್‌ ದರ್‌ ತಿಳಿಸಿದ್ದಾರೆ. ''ಉಗ್ರ ಸಂಘಟನೆ ಸೇರದಂತೆ ಮಗನ ಮನವೊಲಿಸುವ ಪ್ರಯತ್ನವನ್ನು ಮಾಡುತ್ತಲೇ ಇದ್ದೆವು. 2018ರ ಮಾರ್ಚ್‌ 19ರಂದು ಆತ ದಿಢೀರ್‌ ಕಣ್ಮರೆಯಾದ. ಮೂರು ತಿಂಗಳು ಆತನಿಗಾಗಿ ಹುಡುಕಾಟ ನಡೆಸಿ ಸುಮ್ಮನಾದೆವು,'' ಎಂದು ತಾಯಿ ಫಾತಿಮಾ ತಿಳಿಸಿದ್ದಾರೆ.

ಜೈಷೆ ಮೊಹಮದ್‌ ಉಗ್ರ ಸಂಘಟನೆಯು ಇತ್ತೀಚಿನ ದಿನಗಳಲ್ಲಿ ಭಾರತದಲ್ಲಿ ನೇಮಕ ಮಾಡಿಕೊಂಡಿರುವ 70 ಉಗ್ರರ ಪೈಕಿ 20 ವರ್ಷ ಪ್ರಾಯದ ಆದಿಲ್‌ ಸಹ ಒಬ್ಬನಾಗಿದ್ದ. ಈತನನ್ನು ಪಾಕಿಸ್ತಾನದಲ್ಲಿಯೇ ಸಂಘಟನೆಗೆ ಸೇರಿಸಿಕೊಂಡು ಜೆಹಾದಿ ತರಬೇತಿ ನೀಡಲಾಗಿತ್ತು. ಈತನನ್ನು 'ಸಿ' ಶ್ರೇಣಿಯ ಅಂದರೆ ಭದ್ರತಾ ಪಡೆಗಳು ಕಣ್ಣಿಟ್ಟಿರುವ ವ್ಯಕ್ತಿಗಳ ಗುಂಪಿನ ಸದಸ್ಯನೆಂದು ಪರಿಗಣಿಸಲಾಗಿತ್ತು ಎಂದು ತನಿಖೆ ವೇಳೆ ಬೆಳಕಿಗೆ ಬಂದಿದೆ.

ಸೋನು ನಿಗಮ್‌ ಸಿಟ್ಟು
ಯೋಧರ ಮೇಲಿನ ಉಗ್ರ ದಾಳಿಯ ಹಿನ್ನೆಲೆಯಲ್ಲಿ ಬಾಲಿವುಡ್‌ ಖ್ಯಾತ ಗಾಯಕ ಸೋನು ನಿಗಮ್‌, ಡೋಂಗಿ ಜಾತ್ಯತೀತವಾದಿಗಳನ್ನು ಗುರಿಯಾಗಿಸಿಕೊಂಡು ವಾಗ್ದಾಳಿ ನಡೆಸಿದ್ದಾರೆ. ''ವೀರ ಯೋಧರ ಸಾವಿಗೆ ನೀವೇಕೆ ಶೋಕ ವ್ಯಕ್ತಪಡಿಸುತ್ತಿದ್ದೀರಿ? ರಾಷ್ಟ್ರೀಯವಾದಿಗಳೆಂದು ಕರೆಸಿಕೊಂಡಿರುವ ಆರ್‌ಎಸ್‌ಎಸ್‌ ಮತ್ತು ಬಿಜೆಪಿಯವರು ಆ ಕೆಲಸ ಮಾಡುತ್ತಾರೆ ಬಿಟ್ಟುಬಿಡಿ. ಡೋಂಗಿಗಳು ಇದಕ್ಕೆ ಅರ್ಹರಲ್ಲ,'' ಎಂದು ಜಾತ್ಯತೀತವಾದಿಗಳ ವಿರುದ್ಧ ಸೋನು ಆಕ್ರೋಶ ವ್ಯಕ್ತಪಡಿಸಿದ್ದಾರೆ. ತಮ್ಮ ವಾಗ್ದಾಳಿಯ ವಿಡಿಯೊ ತುಣುಕನ್ನು ಫೇಸ್‌ಬುಕ್‌ ಪುಟಕ್ಕೆ ಅಪ್‌ಲೋಡ್‌ ಮಾಡಿದ್ದು, ವೈರಲ್‌ ಆಗಿದೆ.