Pulwama Terror Attack: ರಷ್ಯಾ ಅಧ್ಯಕ್ಷ ಪುಟಿನ್ ಖಂಡನೆ

ಹೊಸದಿಲ್ಲಿ: ಜಮ್ಮು ಮತ್ತು ಕಾಶ್ಮೀರದ ಪುಲ್ವಾಮಾದಲ್ಲಿ ಭಾರತೀಯ ಯೋಧರ ಮೇಲೆ ನಡೆದ ಉಗ್ರಗಾಮಿಗಳ ದಾಳಿಗೆ ರಷ್ಯಾ ಅಧ್ಯಕ್ಷ ವ್ಲಾದಿಮಿರ್ ಪುಟಿನ್ ಅವರು ಶೋಕ ವ್ಯಕ್ತಪಡಿಸಿದ್ದಾರೆ.

ರಾಷ್ಟ್ರಪತಿ ಹಾಗೂ ಪ್ರಧಾನಿಯವರಿಗೆ ಕಳುಹಿಸಿರುವ ಶೋಕ ಸಂದೇಶದಲ್ಲಿ ಅವರು, "ಜಮ್ಮು ಮತ್ತು ಕಾಶ್ಮೀರದಲ್ಲಿ ಉಗ್ರಗಾಮಿಗಳ ದಾಳಿಯಿಂದಾಗಿ ಭಾರತೀಯ ಕಾನೂನು ಅನುಷ್ಠಾನ ಅಧಿಕಾರಿಗಳ ಬಲಿದಾನಕ್ಕೆ ಅತೀವ ಖೇದವಾಗಿದೆ. ಈ ಕ್ರೂರ ಕೃತ್ಯವನ್ನು ನಾವು ಬಲವಾಗಿ ಖಂಡಿಸುತ್ತೇವೆ. ಈ ದಾಳಿಯ ರೂವಾರಿಗಳು ಮತ್ತು ಪ್ರಾಯೋಜಕರನ್ನು ನಿಸ್ಸಂದೇಹವಾಗಿ ಶಿಕ್ಷಿಸಬೇಕಾಗಿದೆ" ಎಂದಿದ್ದಾರೆ.

ಭಾರತದೊಂದಿಗೆ ಭಯೋತ್ಪಾದನಾ-ವಿರೋಧೀ ಕಾರ್ಯಾಚರಣೆಯನ್ನು ಮತ್ತಷ್ಟು ಬಲಪಡಿಸಲು ಸಿದ್ಧವಾಗಿರುವುದನ್ನು ನಾನು ಮತ್ತೊಮ್ಮೆ ನೆನಪಿಸುತ್ತೇನೆ. ರಷ್ಯಾದ ಪ್ರಜೆಗಳು ನಮ್ಮ ಮಿತ್ರರಾಷ್ಟ್ರವಾದ ಭಾರತೀಯ ಪ್ರಜೆಗಳ ದುಃಖವನ್ನು ಹಂಚಿಕೊಂಡಿದ್ದಾರೆ. ಗಾಯಾಳುಗಳು ಕ್ಷಿಪ್ರವಾಗಿ ಚೇತರಿಸಿಕೊಳ್ಳಲೆಂದು ಪ್ರಾರ್ಥಿಸುತ್ತೇವೆ ಎಂದು ಪುಟಿನ್ ಅವರು ತಮ್ಮ ಸಾಂತ್ವನ ಸಂದೇಶದಲ್ಲಿ ಹೇಳಿದ್ದಾರೆ.