ವಿಮಾನದಲ್ಲಿ 30 ನಿಮಿಷ ಪವರ್‌ಕಟ್: ಪರದಾಡಿದ ಪ್ರಯಾಣಿಕರು

ಪುಣೆ: ದಿಲ್ಲಿಗೆ ತೆರಳಬೇಕಿದ್ದ ಜೆಟ್‌ ಏರ್‌ವೇಸ್ ವಿಮಾನವೊಂದರಲ್ಲಿ ಶುಕ್ರವಾರ ಸಂಜೆ ಪುಣೆ ಏರ್‌ಪೋರ್ಟ್‌ನಲ್ಲಿ ಲ್ಯಾಂಡ್ ಆದ ಬಳಿಕ ವಿದ್ಯುತ್ ಸಂಪರ್ಕ ಕಡಿತಗೊಂಡು ಲೈಟ್ ಮತ್ತು ಎಸಿ ಬಂದ್ ಆದ ಕಾರಣ ಸುಮಾರು 30 ನಿಮಿಷ ಪ್ರಯಾಣಿಕರು ಪರದಾಡಿದ್ದಾರೆ. ಜೆಟ್‌ ಏರ್‌ವೇಸ್‌ಗೆ ಸೇರಿದ ವಿಮಾನ 9w 786 ಪುಣೆಯಿಂದ ಸಂಜೆ 5.40ಕ್ಕೆ ದೆಹಲಿಗೆ ತೆರಳಬೇಕಿತ್ತು. ಆದರೆ ಅದು 7.02ಕ್ಕೆ ತೆರಳಿ ರಾತ್ರಿ 9.30ಕ್ಕೆ ದಿಲ್ಲಿ ತಲುಪಿದೆ.

ಈ ಸಂದರ್ಭ ವಿಮಾನದಲ್ಲಿದ್ದ ಪ್ರಯಾಣಿಕರು ಹವಾನಿಯಂತ್ರಣ ವ್ಯವಸ್ಥೆ ಬಂದ್ ಆದ ಕಾರಣ ಮತ್ತು ಲೈಟ್‌ಗಳು ಉರಿಯದೇ ಇದ್ದಿದ್ದರಿಂದ ಸಮಸ್ಯೆ ಅನುಭವಿಸಿದ್ದಾರೆ. ವಿಮಾನ ಲ್ಯಾಂಡ್ ಆದ ಬಳಿಕ ನಿಲ್ದಾಣದಿಂದ ವಿದ್ಯುತ್ ಸಂಪರ್ಕ ಪಡೆದುಕೊಂಡು ಎಸಿ, ಲೈಟ್ ಮತ್ತಿತರ ಅಗತ್ಯಗಳಿಗೆ ವಿದ್ಯುತ್ ಬಳಸಿಕೊಳ್ಳುತ್ತದೆ. ಆದರೆ ಆ ವ್ಯವಸ್ಥೆ ಚಾಲೂಗೊಳ್ಳಲು 30 ನಿಮಿಷ ತಡವಾಗಿದ್ದು, ಬದಲಿ ವ್ಯವಸ್ಥೆ ಇರಲಿಲ್ಲ ಎಂದು ವಿಮಾನದಲ್ಲಿದ್ದ ಪ್ರಯಾಣಿಕರು ಆರೋಪಿಸಿದ್ದಾರೆ.

ಆದರೆ ಈ ಆರೋಪ ನಿರಾಕರಿಸಿರುವ ಜೆಟ್‌ ಏರ್‌ವೇಸ್ ಅಧಿಕಾರಿಗಳು, ವಿಮಾನದಲ್ಲಿ 10 ನಿಮಿಷ ಮಾತ್ರ ಪವರ್‌ಕಟ್ ಉಂಟಾಗಿತ್ತು. ತಕ್ಷಣವೇ ಅದನ್ನು ಸರಿಪಡಿಸಲಾಗಿದೆ. ವಿಮಾನ ಲ್ಯಾಂಡ್ ಆಗುವಾಗ ಲೈಟ್ ಆಫ್ ಮಾಡುವ ನಿಯಮವಿದ್ದು, ಅದನ್ನು ಪಾಲಿಸಲಾಗಿದೆ. ಪ್ರಯಾಣಿಕರಿಗೆ ಯಾವುದೇ ತೊಂದರೆಯಾಗಿಲ್ಲ ಎಂದಿದ್ದಾರೆ.