ಕ್ಯಾನ್ಸರ್ ರೋಗಿಗಳ ವಿಗ್ಸ್‌ಗಾಗಿ ಮಹಿಳೆಯರಿಂದ ಕೂದಲು ದಾನ

ಪುಣೆ: ಕ್ಯಾನ್ಸರ್ ರೋಗಿಗಳಿಗೆ ಜೀವನ ಉತ್ಸಾಹ ತುಂಬಲು ಪುಣೆಯ ಹಲವರು ಮಹಿಳೆಯರು ಬೋಳು ತಲೆ ಮಾಡಿಸಿಕೊಂಡು, ಕೂದಲನ್ನು ದಾನ ಮಾಡುತ್ತಿದ್ದಾರೆ. ಹೇರ್ ಫಾರ್ ಹೋಪ್-ಇಂಡಿಯಾ ಅಭಿಯಾನದಡಿ ಮಹಿಳೆಯರು ಸ್ವಯಂ ಪ್ರೇರಿತರಾಗಿ ಕೂದಲನ್ನು ದಾನ ಮಾಡುತ್ತಿದ್ದಾರೆ.

ಆತ್ಮೀಯ ಗೆಳತಿ ಕ್ಯಾನ್ಸರ್‌ನಿಂದ ಸಾವನ್ನಪ್ಪಿದ ಕಾರಣ ಗೀತಾ ರಾಮ್‌ಗೋಪಾಲ್ ಕ್ಯಾನ್ಸರ್ ರೋಗಿಗಳಿಗಾಗಿ ಕೂದಲು ದಾನ ಮಾಡಿದ್ದಾರೆ. 15 ಇಂಚಿನ ಕೂದಲನ್ನು ಹೇರ್ ಫಾರ್ ಹೋಪ್‌ಗೆ ದಾನ ಮಾಡುವ ಮೂಲಕ ಬೋಳು ತಲೆ ಮಾಡಿಕೊಂಡಿದ್ದಾರೆ. 48 ವರ್ಷದ ಗೀತಾ ಪುಣೆಯ ಎನ್ಐಬಿಎಂ ರಸ್ತೆಯಲ್ಲಿ ವಾಸಿಸುತ್ತಿದ್ದು, ವೆಬ್‌ ಡಿಸೈನರ್‌ಆಗಿ ಕಾರ್ಯ ನಿರ್ವಹಿಸುತ್ತಿದ್ದಾರೆ.

ಬಾಯ್ ಕಟ್ ಮಾಡಿಸಿಕೊಳ್ಳುವುದೋ ಅಥವಾ ಬೋಳು ಮಾಡಿಸಿಕೊಳ್ಳುವುದೋ ಎಂಬ ಗೊಂದಲದಲ್ಲಿದ್ದೆ. ಕ್ಯಾನ್ಸರ್ ರೋಗಿ ಜತೆ ಮಾತನಾಡಿದ ನಂತರ ಬೋಳು ತಲೆ ಮಾಡಿಸಿಕೊಳ್ಳುವ ನಿರ್ಧಾರ ಮಾಡಿದೆ. ಆಕೆಗೆ ಕ್ಯಾನ್ಸರ್ ರೋಗಿಯಾಗಿ ಹೊರ ಜಗತ್ತಿಗೆ ಕಾಣಿಸಿಕೊಳ್ಳಲು ಇಷ್ಟವಿರಲಿಲ್ಲ. ಆಕೆ ಯಾರಿಗೂ ತಾನು ಕ್ಯಾನ್ಸರ್ ರೋಗಿ ಎಂದು ಗೊತ್ತಾಗಬಾರದು ಎಂಬ ಕಾರಣಕ್ಕೆ ವಿಗ್ ಧರಿಸುತ್ತಿದ್ದಳು.

ಗೀತಾರಂತೆ ನಗರದ ಹಲವು ಮಹಿಳೆಯರು ಸ್ವಯಂ ಪ್ರೇರಣೆಗೊಂಡು ಕೂದಲು ದಾನ ಮಾಡುತ್ತಿದ್ದಾರೆ. ಹೆಚ್ಚಿನವರು ಸಾಮಾಜಿಕ ತಾಣಗಳಲ್ಲಿ ಬೋಳುತಲೆಯ ಚಿತ್ರಗಳನ್ನು ಅಪ್‌ಲೋಡ್ ಮಾಡುತ್ತಿದ್ದಾರೆ.

ಹೇರ್ ಫಾರ್ ಹೋಪ್:
ದಾನ ಮಾಡಿದ ಕೂದಲನ್ನು ಸಂಗ್ರಹಿಸುತ್ತ, ಕಿಮೊತೆರಪಿಗೆ ಒಳಗಾದ ರೋಗಿಗಳಿಗೆ ವಿಗ್‌ಗಳನ್ನು ತಯಾರಿಸಿಕೊಡುತ್ತಿರುವ ಎನ್‌ಜಿಒ. ಭಾರತ ಮತ್ತು ಯುಎಇ ರಾಷ್ಟ್ರಗಳಲ್ಲಿ ಆರ್ಥಿಕವಾಗಿ ಹಿಂದುಳಿದ ಕ್ಯಾನ್ಸರ್ ರೋಗಿಗಳಿಗೆ ವಿಗ್‌ಗಳನ್ನು ದಾನ ಮಾಡುತ್ತಿದೆ. ಬೆಂಗಳೂರು, ಮಂಗಳೂರು, ಚೆನ್ನೈನಲ್ಲಿ ಹೆಚ್ಚು ಜನಪ್ರಿಯಗೊಂಡಿರುವ ಹೇರ್ ಫಾರ್ ಹೋಪ್ ಅಭಿಯಾನ ಇದೀಗ ಪುಣೆಗೆ ತಲುಪಿದೆ. 2013ರಲ್ಲಿ ದುಬೈ ಮೂಲದ ಪ್ರೇಮಿ ಮ್ಯಾಥ್ಯು ಎಂಬುವವರು ಭಾರತದಲ್ಲಿ ಹೇರ್ ಫಾರ್ ಹೋಪ್ ಸ್ಥಾಪಿಸಿದರು.

ಸ್ತನಕ್ಯಾನ್ಸರ್ ಬಗ್ಗೆ ಜಾಗೃತಿ ಮೂಡಿಸುವ 'ಪ್ರೊಟೆಕ್ಟ್ ಯುವರ್ ಮಾಮ್' ಎಂಬ ನೂತನ ಕಾರ್ಯಕ್ರಮವನ್ನು ಮ್ಯಾಥ್ಯೂ ಆರಂಭಿಸಿದ್ದಾರೆ.