ಎಲ್ಲ ಜವಾಬ್ದಾರಿ ಶಾ ಹೆಗಲೇರಿಸಿದ ಪಂಜಾಬ್ ಸಿಎಂ: 'ದೇಶದ ಭದ್ರತೆ'ಗಾಗಿ ರೈತ ಸಮಸ್ಯೆ ಬಗೆಹರಿಸಲು ಮನವಿ!

ಹೊಸದಿಲ್ಲಿ: ದೇಶದ ಭ್ರದ್ರತೆ ದೃಷ್ಟಿಯಿಂದ ಕೇಂದ್ರ ಸರ್ಕಾರ ಆದಷ್ಟು ಶೀಘ್ರದಲ್ಲಿ ರೈತರ ಸಮಸ್ಯೆಗಳನ್ನು ಇತ್ಯರ್ಥಪಡಿಸಬೇಕು ಎಂದು ಪಂಜಾಬ್ ಮುಖ್ಯಮಂತ್ರಿ ಕ್ಯಾ.ಅಮರಿಂದರ್ ಸಿಂಗ್ ಆಗ್ರಹಿಸಿದ್ದಾರೆ.

ಕೇಂದ್ರ ಗೃಹ ಸಚಿವ ಅಮಿತ್ ಶಾ ಅವರೊಂದಿಗೆ ಸಭೆ ನಡೆಸಿದ ಬಳಿಕ ಮಾಧ್ಯಮದವರೊಂದಿಗೆ ಮಾತನಾಡಿದ ಅಮಿರಿಂದರ್ ಸಿಂಗ್, ಕೇಂದ್ರ ಸರ್ಕಾರ ಆದಷ್ಟು ಬೇಗ ರೈತರ ಆಕ್ರೋಶವನ್ನು ತಣಿಸುವುದು ಒಳಿತು ಎಂದು ಹೇಳಿದರು.

ರೈತರ ದೆಹಲಿ ಚಲೋ ಪ್ರತಿಭಟನೆಯನ್ನು ಹಿಂತೆಗೆದುಕೊಳ್ಳುವಂತೆ ಮಾಡುವಲ್ಲಿ ನನ್ನ ಪಾತ್ರವೇನು ಇಲ್ಲ. ಆಕ್ರೋಶಿತ ರೈತರು ನನ್ನ ಮಾತು ಕೇಳುವುದೂ ಇಲ್ಲ. ಹೀಗಾಗಿ ದೇಶದ ಭದ್ರತೆ, ಪಂಜಾಬ್ ಆರ್ಥಿಕ ಸ್ಥಿತಿ ಹಿತದೃಷ್ಟಿಯಿಂದ ಕೇಂದ್ರ ಸರ್ಕಾರ ಆದಷ್ಟು ಬೇಗ ರೈತರ ಸಮಸ್ಯೆಗಳಿಗೆ ಪರಿಹಾರ ಕಂಡುಕೊಳ್ಳಬೇಕು ಎಂದು ಅಮಿತ್ ಶಾ ಅವರಿಗೆ ಹೇಳಿದ್ದಾಗಿ ಕ್ಯಾ.ಸಿಂಗ್ ಸ್ಪಷ್ಟಪಡಿಸಿದ್ದಾರೆ.

ಕೃಷಿ ಕಾನೂನು: ಗುರುವಾರ ಅಮಿತ್ ಶಾ-ಅಮರಿಂದರ್ ಸಿಂಗ್ ನಡುವೆ ಮಹತ್ವದ ಸಭೆ!

ಇದಕ್ಕೂ ಮೊದಲು ನಡೆದ ಸಭೆಯಲ್ಲಿ ರೈತರು ಪ್ರತಿಭಟನೆ ಹಿಂತೆಗೆದುಕೊಳ್ಳುವಂತೆ ಮನವೋಲಿಸಲು ಮುಂದಾಗಿ ಎಂದು ಕೇಂದ್ರ ಗೃಹ ಸಚಿವ ಅಮಿತ್ ಶಾ, ಅಮರಿಂದರ್ ಸಿಂಗ್ ಅವರಲ್ಲಿ ಮನವಿ ಮಾಡಿದರು.


ಅಲ್ಲದೇ ರೈತ ಸಂಘಟನೆಗಳೊಂದಿಗೆ ಇಂದು(ಡಿ.03-ಗುರುವಾರ) ನಡೆಯುವ ಸಭೆಯಲ್ಲಿ ಕೇಂದ್ರ ಸರ್ಕಾರದ ಮಾತುಗಳನ್ನು ರೈತರು ಆಲಿಸುವಂತೆ ಮನವಿ ಮಾಡಬೇಕೆಂದು ಶಾ ಕೋರಿದರು.

ಆದರೆ ರೈತರ ಆಕ್ರೋಶವನ್ನು ತಣಿಸುವ ಸಂಪೂರ್ಣ ಜವಾಬ್ದಾರಿಯನ್ನು ಕೇಂದ್ರದ ಹೆಗಲೇರಿಸಿದ ಅಮರಿಂದರ್ ಸಿಂಗ್, ರೈತರ ಆಕ್ರೋಶ ದೇಶದ ಭದ್ರತೆಗ ಧಕ್ಕೆ ತರಲಿದೆ ಎಂದು ಎಚ್ಚರಿಸಿದ್ದಾರೆ. ಅಲ್ಲದೇ ಪಂಜಾಬ್ ಆರ್ಥಿಕ ಸ್ಥಿತಿಯನ್ನು ಕಾಪಾಡುವ ದೃಷ್ಟಿಯಿಂದಲೂ ಕೇಂದ್ರ ಸರ್ಕಾರ ಚಿಂತಿಸಬೇಕು ಎಂದು ಕ್ಯಾ.ಸಿಂಗ್ ಶಾ ಆವರಲ್ಲಿ ಮನವಿ ಮಾಡಿದ್ದಾರೆ.

ರೈತರು ಕ್ರಿಮಿನಲ್‌ಗಳಲ್ಲ, ಕೃಷಿಕರ ಆತಂಕಗಳನ್ನು ನಿವಾರಿಸಿ

ಇತ್ತ ದೆಹಲಿಯ ವಿಜ್ಞಾನ ಭವನದಲ್ಲಿ ಕೇಂದ್ರ ಸರ್ಕಾರ ಹಾಗೂ ರೈತ ಸಂಘಟನೆಗಳ ನಡುವೆ ಮಾತುಕತೆ ಮುಂದುವರೆದಿದ್ದು, ಸಂಜೆಯ ಹೊತ್ತಿಗೆ ಸ್ಪಷ್ಟ ಫಲಿತಾಂಶ ಹೊರಬರುವ ನಿರೀಕ್ಷೆ ಇದೆ.