ಆ್ಯಪ್ನಗರ

Amritpal Singh: ಖಲಿಸ್ತಾನಿ ಮುಖಂಡನ ಬೆಂಬಲಿಗರ ಘರ್ಷಣೆಗೆ ಬೆದರಿದ ಪೊಲೀಸರು: ಆಪ್ತನ ಬಿಡುಗಡೆಗೆ ಒಪ್ಪಿಗೆ

Punjab Khalistan Supporter Amritpal Singh: ಪಂಜಾಬ್‌ನಲ್ಲಿ ಖಲಿಸ್ತಾನಿ ಮುಖಂಡ ಅಮೃತಪಾಲ್ ಸಿಂಗ್‌ನ ಆಪ್ತನನ್ನು ಬಂಧಿಸಿದ್ದನ್ನು ವಿರೋಧಿಸಿ ಆತನ ಬೆಂಬಲಿಗರು ನಡೆಸಿದ ದಾಂಧಲೆಗೆ ಬೆದರಿದ ಪೊಲೀಸರು, ಬಂಧಿತನನ್ನು ಬಿಡುಗಡೆ ಮಾಡುವುದಾಗಿ ಹೇಳಿದ್ದಾರೆ.

Authored byಅಮಿತ್ ಎಂ.ಎಸ್ | Vijaya Karnataka Web 23 Feb 2023, 7:29 pm

ಹೈಲೈಟ್ಸ್‌:

  • ಪಂಜಾಬ್‌ನ ಅಮೃತಸರದಲ್ಲಿ ಅಮೃತಪಾಲ್ ಸಿಂಗ್ ಬೆಂಬಲಿಗರಿಂದ ಘರ್ಷಣೆ
  • ಸಿಂಗ್ ಆಪ್ತ ಲವ್‌ಪ್ರೀತ್ ತೂಫಾನ್ ಬಂಧನ ವಿರೋಧಿಸಿದ ಬೃಹತ್ ಪ್ರತಿಭಟನೆ
  • ವಾರಿಸ್ ಪಂಜಾಬ್ ದೆ ಸಂಘಟನೆಗೆ ಬೆದರಿದ ಪೊಲೀಸರು, ಬಿಡುಗಡೆಗೆ ಒಪ್ಪಿಗೆ

ಹೈಲೈಟ್ಸ್‌ ಮಾತ್ರವೇ ಓದಲು ಆ್ಯಪ್‌ ಡೌನ್‌ಲೋಡ್‌ ಮಾಡಿ
Vijaya Karnataka Web Amritpal Singhs aide Toofan Singh after massive protests
ಚಂಡೀಗಡ: ಖಲಿಸ್ತಾನಿ ಮುಖಂಡನ ಸಹಾಯಕನನ್ನು ಬಂಧಿಸಿದ್ದ ಪೊಲೀಸರು, ಆತನ ಬೆಂಬಲಿಗರ ರೌದ್ರಾವತಾರಕ್ಕೆ ಬೆದರಿ ಬಿಡುಗಡೆ ಮಾಡಲು ಮುಂದಾಗಿದ್ದಾರೆ. ಬಂಧನ ವಿರೋಧಿಸಿ ಪಂಜಾಬ್‌ನ ಅಮೃತಸರ ನಗರದ ಪೊಲೀಸ್ ಠಾಣೆ ಸಮೀಪ ನೂರಾರು ಬೆಂಬಲಿಗರ ಆಕ್ರೋಶ, ದಾಂಧಲೆಯನ್ನು ನಿಯಂತ್ರಿಸಲಾಗದೆ ಪೊಲೀಸರು ಬಸವಳಿದಿದ್ದಾರೆ. ಕೊನೆಗೆ ಆತನನ್ನು ಬಿಡುಗಡೆ ಮಾಡುವುದಾಗಿ ತಿಳಿಸಿದ್ದಾರೆ.
"ವಾರಿಸ್ ಪಂಜಾಬ್ ದೆ' ಎಂಬ ಧಾರ್ಮಿಕ ಸಂಘಟನೆ ನಡೆಸುತ್ತಿರುವ ಅಮೃತಪಾಲ್ ಸಿಂಗ್ ನೇತೃತ್ವದಲ್ಲಿ ಬಂದೂಕುಗಳು ಮತ್ತು ಕತ್ತಿಗಳನ್ನು ಹಿಡಿದ ನೂರಾರು ಜನರ ಗುಂಪು ಪೊಲೀಸ್ ಠಾಣೆ ಕಡೆಗೆ ನುಗ್ಗಿತ್ತು. ಅಮೃತಪಾಲ್ ಸಿಂಗ್‌ನ ಸಹಚರ ಲವ್‌ಪ್ರೀತ್ ತೂಫಾನ್ ಸಿಂಗ್‌ನನ್ನು 24 ಗಂಟೆಗಳ ಒಳಗೆ ಬಿಡುಗಡೆ ಮಾಡುವಂತೆ ಪ್ರತಿಭಟನಾಕಾರರು ಒತ್ತಾಯಿಸಿದ್ದರು. ಇದಾದ ಬಳಿಕ ಆತನನ್ನು ಬಿಡುಗಡೆ ಮಾಡಲು ಪೊಲೀಸರು ಒಪ್ಪಿದ್ದಾರೆ.
Hate Crime In Canada: ಕೆನಡಾದಲ್ಲಿರುವವರು ಹುಷಾರಾಗಿರಿ: ಭಾರತ ವಿರೋಧಿ ಚಟುವಟಿಕೆ ಬಗ್ಗೆ ಕೇಂದ್ರದ ಎಚ್ಚರಿಕೆ

"ಲವ್‌ಪ್ರೀತ್ ತೂಫಾನ್ ಸಿಂಗ್ ಮುಗ್ಧ ಎನ್ನುವುದಕ್ಕೆ ಅವರು ಸಾಕಷ್ಟು ಪುರಾವೆಗಳನ್ನು ನೀಡಿದ್ದಾರೆ. ಅದನ್ನು ವಿಶೇಷ ತನಿಖಾ ತಂಡ (ಎಸ್‌ಐಟಿ) ಪರಿಶೀಲಿಸಿದೆ. ಈ ಜನರನ್ನು ಶಾಂತಯುತವಾಗಿ ಚೆದುರಿಸಲಾಗುವುದು. ಕಾನೂನು ತನ್ನ ಕ್ರಮ ಕೈಗೊಳ್ಳಲಿದೆ" ಎಂದು ಅಮೃತಸರ ಪೊಲೀಸ್ ಕಮಿಷನರ್ ಜಸ್ಕರಣ್ ಸಿಂಗ್ ತಿಳಿಸಿದ್ದಾರೆ.


ವ್ಯಕ್ತಿಯೊಬ್ಬನನ್ನು ಅಪಹರಿಸಿ ಮತ್ತು ಹಲ್ಲೆ ನಡೆಸಿದ ಆರೋಪದಲ್ಲಿ ತೂಫಾನ್ ಸಿಂಗ್‌ನನ್ನು ಪೊಲೀಸರು ಬಂಧಿಸಿದ್ದರು. ಆತ ಅಮೃತಪಾಲ್ ಸಿಂಗ್ ನೇತೃತ್ವದ ಗುಂಪಿನ ಸದಸ್ಯನಾಗಿದ್ದಾನೆ. ಕಳೆದ ವರ್ಷದ ಫೆಬ್ರವರಿಯಲ್ಲಿ ರಸ್ತೆ ಅಪಘಾತದಲ್ಲಿ ಮೃತಪಟ್ಟ ನಟ ಹಾಗೂ ಸಾಮಾಜಿಕ ಕಾರ್ಯಕರ್ತ ದೀಪ್ ಸಿಧು ಅವರು ಈ ಸಂಘಟನೆಯನ್ನು ಹುಟ್ಟುಹಾಕಿದ್ದರು.
ಪಂಜಾಬ್‌ ಮೇಲೆ ಗ್ರೆನೇಡ್‌ ದಾಳಿ ನಡೆಸಿದ್ದು ನಾವೇ, ಶಿಮ್ಲಾ ಪೊಲೀಸ್‌ ಕಚೇರಿ ಮೇಲೆ ದಾಳಿ ಮಾಡ್ತೀವಿ: ಖಲಿಸ್ತಾನಿ ಉಗ್ರರ ಎಚ್ಚರಿಕೆ

"ರಾಜಕೀಯ ದುರುದ್ದೇಶದ ಕಾರಣದಿಂದಲೇ ಎಫ್‌ಐಆರ್ ದಾಖಲಿಸಲಾಗಿದೆ. ಅವರು ಒಂದು ಗಂಟೆಯಲ್ಲಿ ಪ್ರಕರಣವನ್ನು ರದ್ದುಗೊಳಿಸದೆ ಇದ್ದರೆ ಮುಂದೆ ಏನಾಗುತ್ತದೆಯೋ ಅದಕ್ಕೆ ಆಡಳಿತವೇ ಹೊಣೆಯಾಗುತ್ತದೆ... ನಾವು ಏನೂ ಮಾಡಲಾರೆವು ಎಂದು ಅವರು ಅಂದುಕೊಂಡಿದ್ದಾರೆ. ಹೀಗಾಗಿ ಈ ಬಲ ಪ್ರದರ್ಶನ ಅನಿವಾರ್ಯವಾಗಿತ್ತು" ಎಂದು ಅಮೃತಪಾಲ್ ಸಿಂಗ್ ಹೇಳಿದ್ದಾನೆ.

ಅಜ್ನಾಲಾ ಪೊಲೀಸ್ ಠಾಣೆಯ ಹೊರಗೆ ಪೊಲೀಸರು ಬ್ಯಾರಿಕೇಡ್‌ಗಳನ್ನು ಹಾಕಿ ಬಿಗಿ ಬಂದೋಬಸ್ತ್ ಏರ್ಪಡಿಸಿದ್ದರು. ಖಡ್ಗಗಳು ಮತ್ತು ಬಂದೂಕುಗಳೊಂದಿಗೆ ನುಗ್ಗಿದ ಬೆಂಬಲಿಗರು ಪೊಲೀಸರನ್ನೇ ಹೈರಾಣಾಗಿಸಿದ್ದಾರೆ.

ಅಮಿತ್ ಶಾಗೆ ಬೆದರಿಕೆ ಹಾಕಿದ್ದ ಸಿಂಗ್
ಅಮೃತಪಾಲ್ ಸಿಂಗ್, ಸಿಖ್ಖರಿಗಾಗಿ ಪ್ರತ್ಯೇಕ ಖಲಿಸ್ತಾನ ದೇಶದ ಬೇಡಿಕೆಗೆ ಬೆಂಬಲ ಸೂಚಿಸುವ ಧಾರ್ಮಿಕ ಪ್ರವಚನಕಾರನಾಗಿದ್ದಾನೆ. ಆಪರೇಷನ್ ಬ್ಲೂಸ್ಟಾರ್‌ಗಾಗಿ ಅಮೃತಸರದ ಸ್ವರ್ಣಮಂದಿರದ ಒಳಗೆ ಸೇನೆಯನ್ನು ಕಳುಹಿಸಿದ್ದಕ್ಕಾಗಿ ತಮ್ಮ ಅಂಗರಕ್ಷಕರಿಂದ ಮಾಜಿ ಪ್ರಧಾನಿ ಇಂದಿರಾ ಗಾಂಧಿ ಹತ್ಯೆಯಾದಂತೆಯೇ ನೀವೂ ಅನುಭವಿಸಬೇಕಾಗುತ್ತದೆ ಎಂದು ಕೇಂದ್ರ ಗೃಹ ಸಚಿವ ಅಮಿತ್ ಶಾ ಅವರಿಗೆ ಅಮೃತಪಾಲ್ ಇತ್ತೀಚೆಗೆ ಬೆದರಿಕೆ ಹಾಕಿದ್ದ.
ಹಿಮಾಚಲ ಪ್ರದೇಶದ ವಿಧಾನಸಭೆ ದ್ವಾರಗಳಲ್ಲಿ ಖಲಿಸ್ತಾನ ಪರ ಧ್ವಜ, ಬರಹ ಪತ್ತೆ

"ಖಲಿಸ್ತಾನ ಚಳವಳಿ ಬೆಳೆಯಲು ಬಿಡುವುದಿಲ್ಲ ಎಂದು ಅಮಿತ್ ಶಾ ಹೇಳಿದ್ದರು. ಅದನ್ನೇ ಇಂದಿರಾ ಗಾಂಧಿ ಅವರೂ ಮಾಡಿದ್ದರು. ನೀವು ಕೂಡ ಹಾಗೆ ಮಾಡಿದರೆ ಅವರಂತೆಯೇ ಪರಿಣಾಮ ಎದುರಿಸಬೇಕಾಗುತ್ತದೆ. ಹಿಂದೂ ರಾಷ್ಟ್ರಕ್ಕೆ ಬೇಡಿಕೆ ಇರಿಸುವವರಿಗೆ ಇದೇ ರೀತಿ ಹೇಳಿದರೆ ಅವರು ಗೃಹ ಸಚಿವರಾಗಿ ಉಳಿಯಲು ಸಾಧ್ಯವೇ ಎಂಬುದನ್ನು ನೋಡೋಣ" ಎಂದು ಅಮೃತಪಾಲ್ ಸಿಂಗ್ ಗುಡುಗಿದ್ದ.
ಲೇಖಕರ ಬಗ್ಗೆ
ಅಮಿತ್ ಎಂ.ಎಸ್
ವಿಜಯ ಕರ್ನಾಟಕದ ಡಿಜಿಟಲ್ ವಿಭಾಗದಲ್ಲಿ ಪತ್ರಕರ್ತ. 2009ರಿಂದ ಪತ್ರಿಕೋದ್ಯಮದಲ್ಲಿ ಸಕ್ರಿಯವಾಗಿದ್ದಾರೆ. ದಿನಪತ್ರಿಕೆಗಳು ಮತ್ತು ವೆಬ್‌ ಪೋರ್ಟಲ್‌ಗಳಲ್ಲಿ ವರದಿಗಾರಿಕೆ, ಸಿನಿಮಾ ವರದಿಗಾರಿಕೆ, ಡೆಸ್ಕ್ ಹಾಗೂ ಜಿಲ್ಲಾ ಕರೆಸ್ಪಾಂಡೆಂಟ್ ಆಗಿ ಕೆಲಸ ಮಾಡಿದ ಅನುಭವ ಇವರಿಗಿದೆ. ರಾಷ್ಟ್ರೀಯ ಹಾಗೂ ಅಂತಾರಾಷ್ಟ್ರೀಯ ಸುದ್ದಿಗಳು ಪ್ರಮುಖ ಆಸಕ್ತಿಯ ವಿಭಾಗಗಳು. ಮಾನವಾಸಕ್ತಿಯ ಹಾಗೂ ಸ್ಫೂರ್ತಿದಾಯಕ ಕಥನಗಳನ್ನು ನಿರೂಪಿಸುವುದು ವೃತ್ತಿಯಲ್ಲಿನ ನೆಚ್ಚಿನ ಸಂಗತಿ. ಪ್ರವಾಸ, ಕ್ರಿಕೆಟ್, ಓದು, ಕೃಷಿ ಇತರೆ ಇವರ ಆಸಕ್ತಿ ಮತ್ತು ಹವ್ಯಾಸಗಳು.... ಇನ್ನಷ್ಟು ಓದಿ

ಮುಂದಿನ ಲೇಖನ

Vijay Karnataka News App: ನಿಮ್ಮ ಸುತ್ತಮುತ್ತಲು ನಡೆಯುವ ವಿದ್ಯಮಾನಗಳನ್ನುಹಂಚಿಕೊಳ್ಳಲು ಬಯಸುತ್ತೀರಾ? ಹಾಗಿದ್ದಲ್ಲಿ ವಿಜಯ ಕರ್ನಾಟಕ ಆ್ಯಪ್‌ಡೌನ್‌ಲೋಡ್‌ ಮಾಡಿಕೊಳ್ಳಿ ಹಾಗೂ ರಿಪೋರ್ಟ್‌ ಕಳಿಸಿ
ಲೇಟೆಸ್ಟ್‌ ನ್ಯೂಸ್‌ ಅಪ್‌ಡೇಟ್‌ಗಳನ್ನು ಪಡೆಯಿರಿ, Vijay Karnataka ಫೇಸ್‌ಬುಕ್‌ಪೇಜ್‌ ಲೈಕ್‌ ಮಾಡಿರಿ