ಎನ್‌ಡಿಎ ಸಹವಾಸ ಬಿಡಿ, ತೇಜಸ್ವಿಯನ್ನು ಆಶೀರ್ವದಿಸಿ - ನಿತೀಶ್‌ಗೆ ದಿಗ್ವಿಜಯ್‌ ಸಿಂಗ್‌ ಸಲಹೆ!

ಹೊಸದಿಲ್ಲಿ: ಬಿಜೆಪಿ ನೇತೃತ್ವದ ಎನ್‌ಡಿಎ ಮೈತ್ರಿಕೂಟದಿಂದ ಹೊರಬರುವಂತೆ ಬಿಹಾರ ಮುಖ್ಯಮಂತ್ರಿ ನಿತೀಶ್‌ ಕುಮಾರ್‌ಗೆ ಸಲಹೆ ನೀಡಿರುವ ಹಿರಿಯ ಕಾಂಗ್ರೆಸ್‌ ನಾಯಕ ದಿಗ್ವಿಜಯ್‌ ಸಿಂಗ್‌, ಆರ್‌ಜೆಡಿ ನಾಯಕ ತೇಜಸ್ವಿ ಯಾದವ್‌ಗೆ ಬೆಂಬಲ ನೀಡುವಂತೆ ಸಲಹೆ ನೀಡಿದ್ದಾರೆ.

ಈ ಕುರಿತು ಸರಣಿ ಟ್ಟೀಟ್‌ಗಳನ್ನು ಮಾಡಿರುವ ಅವರು, ಬಿಜೆಪಿ ತನ್ನ ತಂತ್ರಗಾರಿಕೆಯ ಮೂಲಕ ಬಿಹಾರದಲ್ಲಿ ನಿತೀಶ್‌ ಕುಮಾರ್‌ ಅವರ ಶಕ್ತಿ ಕುಂದಿಸಿದೆ ಎಂದು ಆಪಾದಿಸಿದ್ದಾರೆ.

“ಬಿಜೆಪಿ ಬಳ್ಳಿ ಇದ್ದ ಹಾಗೆ. ಒಮ್ಮೆ ಮರ ಒಣಗಲು ಪ್ರಾರಂಭಿಸುತ್ತಿದ್ದಂತೆ ಅದು ಇನ್ನೊಂದು ಮರದ ಬೆಂಬಲವನ್ನು ನೆಚ್ಚಿಕೊಳ್ಳುತ್ತದೆ. ನಿತೀಶ್‌ ಜೀ, ನೀವು ಮತ್ತು ಲಾಲು ಪ್ರಸಾದ್‌ ಯಾದವ್‌ ಒಟ್ಟಿಗೆ ಹೋರಾಡಿದವರು. ಅವರು ಇಂದು ಜೈಲಿಗೆ ಹೋಗಿದ್ದಾರೆ. ಬಿಜೆಪಿ-ಆರ್‌ಎಸ್‌ಎಸ್‌ ಸಿದ್ಧಾಂತವನ್ನು ಬಿಟ್ಟು ಬಿಡಿ, ತೇಜಸ್ವಿಗೆ ಆಶೀರ್ವಾದ ಮಾಡಿ. ಬಳ್ಳಿಯಂಥ ಬಿಜೆಪಿಯನ್ನು ಬಿಹಾರದಲ್ಲಿ ಬೆಳೆಯಲು ಬಿಡಬೇಡಿ,” ಎಂದು ಮಧ್ಯ ಪ್ರದೇಶದ ಮಾಜಿ ಮುಖ್ಯಮಂತ್ರಿಯೂ ಆಗಿರುವ ದಿಗ್ವಿಜಯ್‌ ಸಿಂಗ್‌ ಒತ್ತಾಯಿಸಿದ್ದಾರೆ.

ನಿತೀಶ್‌ ಕುಮಾರ್‌ ಅವರೇ ಸಿಎಂ, ಇದು ನಮ್ಮ ಭರವಸೆ - ಬಿಜೆಪಿ ಸ್ಪಷ್ಟನೆ
ಇದರ ಜೊತೆಗೆ ಬಿಹಾರ ಬಿಟ್ಟು ರಾಷ್ಟ್ರ ರಾಜಕಾರಣ ಪ್ರವೇಶಿಸುವಂತೆಯೂ ನಿತೀಶ್‌ ಕುಮಾರ್‌ಗೆ ದಿಗ್ವಿಜಯ್‌ ಸಿಂಗ್‌ ಕಿವಿಮಾತು ಹೇಳಿದ್ದಾರೆ. “ನಿತೀಶ್‌ ಜೀ, ಬಿಹಾರ ನಿಮ್ಮ ಪಾಲಿಗೆ ಸಣ್ಣದು. ನೀವು ರಾಷ್ಟ್ರ ರಾಜಕಾರಣದಲ್ಲಿ ಕೈಜೋಡಿಸಬೇಕು. ಒಡೆದಾಳುವ ಕೇಂದ್ರದ ನೀತಿಗೆ ಅವಕಾಶ ನೀಡಬೇಡಿ. ಜಾತ್ಯಾತೀತ ಸಿದ್ಧಾಂತದಲ್ಲಿ ನಂಬಿಕೆ ಇಟ್ಟಿರುವ ಸಮಾಜವಾದಿಗಳಿಗೆ ಸಹಾಯ ಮಾಡಿ. ಈ ಸಲಹೆಯನ್ನು ಪರಿಗಣಿಸಿ,” ಎಂದು ರಾಜ್ಯಸಭೆ ಸದಸ್ಯರೂ ಆಗಿರುವ ಸಿಂಗ್‌ ಹೇಳಿದ್ದಾರೆ.

ಇದರ ಜೊತೆಗೆ ಸಿದ್ಧಾಂತಕ್ಕಾಗಿ ಹೋರಾಡುವ ದೇಶದ ಏಕೈಕ ನಾಯಕ ರಾಹುಲ್‌ ಗಾಂಧಿ ಎಂದು ದಿಗ್ವಿಜಯ್‌ ಸಿಂಗ್‌ ಹೊಗಳಿದ್ದಾರೆ.