ಲಡಾಖ್ ಆಗಸ ಸೀಳಿದ ರಫೇಲ್: ಗಡಿ ತಯಾರಿಯ ಝಲಕ್ ನೀಡಿದ ವಾಯುಪಡೆ!

ಲಡಾಖ್: ಭಾರತ-ಚೀನಾ ಗಡಿ ತಕರಾರು ಒಂದು ಕಡೆಯಾದರೆ, ಇದಕ್ಕೆ ಪ್ರತಿಯಾಗಿ ಭಾರತೀಯ ರಕ್ಷಣಾ ಪಡೆಗಳ ಸಮರ ತಯಾರಿ ಮತ್ತೊಂದು ಕಡೆ. ಲಡಾಖ್ ಗಡಿ ಉದ್ವಿಗ್ನತೆ ಹಿನ್ನೆಲೆಯಲ್ಲಿ ಭಾರತೀಯ ರಕ್ಷಣಾ ಪಡೆಗಳು ಸರ್ವ ಸನ್ನದ್ಧವಾಗಿರುವುದು ಎಲ್ಲರಿಗೂ ತಿಳಿದ ಸಂಗತಿ.

ಭಾರತೀಯ ವಾಯುಸೇನೆ ಕೂಡ ತನ್ನ ಸಮರ ಸಿದ್ಧತೆಯನ್ನು ಪೂರ್ಣಗೊಳಿಸಿದ್ದು, ಅತ್ಯಾಧುನಿಕ ಯುದ್ಧ ವಿಮಾನಗಳನ್ನು ಗಡಿಯ ಮುಂಚೂಣಿ ನೆಲೆಗಳಲ್ಲಿ ನಿಯೋಜಿಸಿದೆ.

ಅಷ್ಟೇ ಅಲ್ಲದೇ ಈ ಯುದ್ಧ ವಿಮಾನಗಳಿಂದ ನಿರಂತರವಾಗಿ ಲಡಾಖ್‌ನ ವಾಯು ಗಡಿಯಲ್ಲಿ ಹದ್ದಿನ ಕಣ್ಣಿಟ್ಟಿರುವ ವಾಯುಪಡೆ, ಚೀನಿ ಸೇನೆಯ ಚಲನವಲನಗಳನ್ನು ಗಮನಿಸುತ್ತಿದೆ.

ಚೀನಾದ ಕಿರಿಕ್‌ ನಡುವೆ ಲಡಾಖ್‌ ಗಡಿಯಲ್ಲಿ ಹಾರಾಟ ನಡೆಸಲಿದೆ ಭಾರತದ ಬಲಭೀಮ ರಫೇಲ್‌!

ಅದರಂತೆ ಇಂದು(ಸೋಮವಾರ) ಲಡಾಖ್‌ನ ಆಗಸದಲ್ಲಿ ಅತ್ಯಾಧುನಿಕ ರಫೇಲ್ ಯುದ್ಧ ವಿಮಾನಗಳು ಘರ್ಜಿಸಿದ್ದು, ನಮ್ಮ ವಾಯುಗಡಿ ಸುರಕ್ಷಿತ ಎಂಬ ಸಂದೇಶವನ್ನು ರವಾನಿಸಿವೆ.


ಇತ್ತೀಚಿಗಷ್ಟೇ ಭಾರತೀಯ ವಾಯುಸೇನೆಗೆ ಅಧಿಕೃತವಾಗಿ ಸೇರ್ಪಡೆಗೊಂಡಿರುವ ರಫೇಲ್ ಯುದ್ಧ ವಿಮಾನಗಳನ್ನು, ಲಡಾಖ್‌ನ ವಾಯಗಡಿ ವೀಕ್ಷಣೆಗೆ ಬಳಸಿಕೊಳ್ಳುತ್ತಿರುವುದು ಗಮನ ಸೆಳೆದಿದೆ.

ಕೆಲ ದಿನಗಳ ಹಿಂದಷ್ಟೇ ಲಡಾಖ್ ಗಡಿ ವೀಕ್ಷಣೆಗೆ ಮಿಗ್-29 ಯುದ್ಧ ವಿಮಾನಗಳನ್ನು ಬಳಿಸಿದ್ದ ವಾಯುಸೇನೆ, ತೇಜಸ್ ಫೈಟರ್ ಜೆಟ್‌ಗಳನ್ನೂ ಮುಂಚೂಣಿ ನೆಲೆಗಳಲ್ಲಿ ನಿಯೋಜಿಸಿದೆ.

ಲಡಾಖ್ ಆಕಾಶದಲ್ಲಿ ವಾಯುಸೇನೆಯ ಮಿಗ್-29 ಆರ್ಭಟ: ಹೇಳತೀರದು ಚೀನಾ, ಪಾಕ್‌ ಒದ್ದಾಟ!

ಒಂದಾದ ಮೇಲೊಂದರಂತೆ ಅತ್ಯಾಧುನಿಕ ಯುದ್ಧ ವಿಮಾನಗಳು ಲಡಾಖ್ ವಾಯುಗಡಿಯಲ್ಲಿ ಹಾರಾಟ ನಡೆಸುತ್ತಿದ್ದು, ಇದಕ್ಕೆ ಪ್ರತಿಯಾಗಿ ಚೀನಾ ವಾಯಸೇನೆ ಹೇಳಿಕೊಳ್ಳುವಂತಹ ಚಟುವಟಿಕೆ ನಡೆಸದಿರುವುದೂ ಕೂಡ ಕುತೂಹಲ ಕೆರಳಿಸಿದೆ.