ರಫೇಲ್‌ ಬಂದರೆ ಶತ್ರುರಾಷ್ಟ್ರ ಧ್ವಂಸಗೊಳಿಸುವ ಸಾಮರ್ಥ್ಯ‌

ಹೊಸದಿಲ್ಲಿ: ಸುಖೋಯ್‌ ಎಸ್‌ಯು-30ಎಂಕೆಐ ಹಾಗೂ ರಫೇಲ್‌ ಯುದ್ಧವಿಮಾನಗಳು ಜಂಟಿಯಾಗಿ ದಾಳಿ ನಡೆಸುವುದು ಅತ್ಯಂತ ಅಪಾಯಕಾರಿ ಸಂಯೋಜನೆಯಾಗಿದ್ದು, ರಫೇಲ್‌ ಕೂಡ ನಮ್ಮ ಬತ್ತಳಿಕೆ ಸೇರಿದರೆ ಯಾವ ಶತ್ರುರಾಷ್ಟ್ರವನ್ನಾದರೂ ಸುಲಭವಾಗಿ ಬಗ್ಗುಬಡಿಯಬಹುದು ಎಂದು ಭಾರತೀಯ ವಾಯುಪಡೆಯ ವೈಸ್‌ ಚೀಫ್‌ ಏರ್‌ಮಾರ್ಷಲ್‌ ಆರ್‌.ಕೆ.ಎಸ್‌. ಭಡೌರಿಯಾ ಹೇಳಿದ್ದಾರೆ.
ಫ್ರಾನ್ಸ್‌ನ ಮಾಂಟ್‌ ದೆ ಮರ್ಸಾನ್‌ನಲ್ಲಿರುವ ಫ್ರಾನ್ಸ್‌ ವಾಯುಪಡೆಯ ನೆಲೆಯಲ್ಲಿ ನಡೆಯುತ್ತಿರುವ ಜಂಟಿ ಸಮರಾಭ್ಯಾಸ 'ಗರುಡಾ-6'ನಲ್ಲಿ ರಫೇಲ್‌ ಯುದ್ಧವಿಮಾನದ ಹಾರಾಟ ನಡೆಸಿದ ನಂತರ ಅವರು ಮಾತನಾಡಿದರು. ''ಸುಖೋಯ್‌-ರಫೇಲ್‌ ಸಂಯೋಜನೆಯು ಪಾಕಿಸ್ತಾನ ಅಥವಾ ಬೇರೆ ಯಾವುದೇ ಶತ್ರುಪಾಳಯಕ್ಕೆ ಭಾರಿ ಆಘಾತ ಉಂಟುಮಾಡಲಿವೆ. ಈ ಎರಡು ಯುದ್ಧವಿಮಾನಗಳ ಸಂಯೋಜಿತ ದಾಳಿಗೆ ಪ್ರತಿದಾಳಿ ನಡೆಸುವುದು ಶತ್ರುಪಡೆಗಳಿಗೂ ಕಷ್ಟವಾಗಲಿದೆ. ಅಷ್ಟು ಭೀಕರ ದಾಳಿ ನಡೆಸುವ ಸಾಮರ್ಥ್ಯ‌ ಈ ಯುದ್ಧವಿಮಾನಗಳಿಗಿದೆ,'' ಎಂದು ಬಣ್ಣಿಸಿದ್ದಾರೆ.

2016ರಲ್ಲಿ ಫ್ರಾನ್ಸ್‌ ಜತೆಗೆ 36 ರಫೇಲ್‌ ಯುದ್ಧವಿಮಾನ ಖರೀದಿ ವ್ಯವಹಾರ ನಡೆಸಿದ ಭಾರತೀಯ ತಂಡದ ನೇತೃತ್ವವನ್ನು ಭಡೌರಿಯಾ ವಹಿಸಿದ್ದರು. ರಷ್ಯಾ ನಿರ್ಮಿತ ಸುಖೋಯ್‌ ಯುದ್ಧವಿಮಾನವನ್ನು ಪರವಾನಗಿ ಮೂಲಕ ಎಚ್‌ಎಎಲ್‌ ಉನ್ನತೀಕರಿಸಿ ಸುಖೋಯ್‌ ಎಸ್‌ಯು-30ಎಮ್‌ಕೆಐ ಯುದ್ಧವಿಮಾನವನ್ನು ಅಭಿವೃದ್ಧಿಪಡಿಸಿದೆ. ಫ್ರಾನ್ಸ್‌ನ ದಸಾಲ್ಟ್‌ ಕಂಪನಿ ರಫೇಲ್‌ ಯುದ್ಧವಿಮಾನವನ್ನು ಅಭಿವೃದ್ಧಿಪಡಿಸಿದ್ದು, ಸೆಪ್ಟೆಂಬರ್‌ನಲ್ಲಿ ಭಾರತೀಯ ವಾಯುಪಡೆ ಗೆ ಸೇರುವ ನಿರೀಕ್ಷೆಯಿದೆ.