ಚೀನಿ ಪ್ರವಾಸಿಗರ ಸೆಳೆಯಲು ರಾಹುಲ್‌ ಐಡಿಯಾ

ಜೈಪುರ: ರಾಜಸ್ಥಾನದ ಧೋಲ್‌ಪುರದಲ್ಲಿ ಚುನಾವಣಾ ಪ್ರಚಾರ ಸಭೆ ನಡೆಸಿದ ಕಾಂಗ್ರೆಸ್‌ ಅಧ್ಯಕ್ಷ ರಾಹುಲ್‌ ಗಾಂಧಿ, ಎಂದಿನಂತೆ ಕೇಂದ್ರ ಸರಕಾರದ ವಿರುದ್ಧ ವಾಗ್ದಾಳಿ ನಡೆಸುವುದರ ಜತೆಗೆ ಚೀನಿ ಪ್ರವಾಸಿಗರ ಸೆಳೆಯಲು ತಮ್ಮದೇ ಐಡಿಯಾವೊಂದನ್ನು ತೇಲಿಬಿಟ್ಟರು.

''ಮೇಕ್‌ ಇನ್‌ ಇಂಡಿಯಾ ಯೋಜನೆಯಿಂದ ಲಕ್ಷಾಂತರ ಯುವಕರಿಗೆ ಉದ್ಯೋಗ ದೊರೆತಿದೆ. ಮೊಬೈಲ್‌ ಉತ್ಪಾದನಾ ಕ್ಷೇತ್ರದಲ್ಲಿ ಪ್ರಗತಿ ಸಾಧಿಸಲಾಗಿದೆ ಎಂಬ ಪ್ರಧಾನಿ ಮೋದಿ ಅವರ ಹೇಳಿಕೆಯಲ್ಲಿ ಯಾವ ಸತ್ಯವೂ ಇಲ್ಲ. ಇದೆಲ್ಲವೂ ಬರೀ ಪ್ರಚಾರ ಅಷ್ಟೆ. 'ಮೇಡ್‌ ಇನ್‌ ಚೀನಾ' ಮೊಬೈಲ್‌ಗಳ ಹಾವಳಿ ತಗ್ಗಬೇಕು. ದೇಶದಲ್ಲಿ ಉತ್ಪಾದನೆಯಾಗುವ ಮೊಬೈಲ್‌ 'ಮೇಡ್‌ ಇನ್‌ ಧೋಲ್‌ಪುರ' ಎಂಬ ಖ್ಯಾತಿ ಗಳಿಸುವಂತಾಗಬೇಕು. ಇಂತಹ ಮೊಬೈಲ್‌ಗಳಿಂದ ಯಾರಾದರೂ ಚೀನಾದಲ್ಲಿ ಸೆಲ್ಫಿ ತೆಗೆದುಕೊಂಡಾಗ ಅಲ್ಲಿನವರು 'ಮೇಡ್‌ ಇನ್‌ ಧೋಲ್‌ಪುರ' ಪದವನ್ನು ನೋಡಿ ಕುತೂಹಲದಿಂದ ಇಲ್ಲಿಗೆ ಪ್ರವಾಸ ಬರಲಿದ್ದಾರೆ. ಇದರಿಂದ ರಾಜಸ್ಥಾನದ ಆದಾಯವೂ ಹೆಚ್ಚಲಿದೆ,'' ಎಂದು ಹೇಳಿದ್ದಾರೆ. ಇವರ ಹೇಳಿಕೆ ಸಾಮಾಜಿಕ ಜಾಲತಾಣಿಗರಿಗೆ ಚರ್ಚಾ ವಿಷಯವಾಗಿದೆ.