ರಾಹುಲ್‌ ಗಾಂಧಿ ದೇಶದ ದೊಡ್ಡ ಜೋಕರ್‌: ಚಂದ್ರಶೇಖರ್‌ ರಾವ್‌

ಹೊಸದಿಲ್ಲಿ: ಇಡೀ ದೇಶವೇ ಕಾಂಗ್ರೆಸ್‌ ಅಧ್ಯಕ್ಷ ರಾಹುಲ್‌ ಗಾಂಧಿ ಅವರನ್ನು ಗಂಭೀರವಾಗಿ ಪರಿಗಣಿಸಿಲ್ಲ. ಅವರು ಜೋಕರ್‌ ಇದ್ದಂತೆ ಎಂದು ತೆಲಂಗಾಣ ರಾಷ್ಟ್ರ ಸಮಿತಿ ಅಧ್ಯಕ್ಷ ಕೆ. ಚಂದ್ರಶೇಖರ್ ರಾವ್‌ (ಕೆಸಿಆರ್‌) ತಿಳಿಸಿದ್ದಾರೆ.

ಸುದ್ದಿಗೋಷ್ಠಿಯಲ್ಲಿ ಮಾತನಾಡಿದ ರಾವ್‌, ಪ್ರಧಾನಿ ಮೋದಿಯನ್ನು ರಾಹುಲ್‌ ಹೇಗೆ ತಬ್ಬಿಕೊಂಡ ಎಂಬುದು ಎಲ್ಲರಿಗೂ ಗೊತ್ತಿದೆ. ಜೋಕರ್‌ ಮಾದರಿಯಲ್ಲಿ ಅವರು ನಡೆದುಕೊಳ್ಳುತ್ತಾರೆ ಎಂದು ಆರೋಪಿಸಿದರು.

ದಿಲ್ಲಿಯ ಸುಲ್ತಾನರ ಮಾದರಿಯಲ್ಲಿ ರಾಹುಲ್‌ ಆಡಳಿತ ನಡೆಸುತ್ತಾರೆ. ಹೀಗಾಗಿ ನಾವು ದಿಲ್ಲಿಯ ಅಥವಾ ಕಾಂಗ್ರೆಸ್‌ನ ಗುಲಾಮರಾಗಬೇಕಾಗಿಲ್ಲ. ಇದು ರಾಜ್ಯದ ಜನರಲ್ಲಿ ನನ್ನ ಮನವಿ ಎಂದು ಅವರು ಹೇಳಿದರು.

ತೆಲಂಗಾಣಕ್ಕೆ ಸಂಬಂಧಿಸಿದಂತೆ ನಿರ್ಧಾರವನ್ನು ತೆಲಂಗಾಣದಲ್ಲಿಯೇ ತೆಗೆದುಕೊಳ್ಳಬೇಕು. ಕಾಂಗ್ರೆಸ್‌ ಪಕ್ಷ ನಮ್ಮ ವಿರುದ್ಧ ಇಲ್ಲಸಲ್ಲದ ಆರೋಪಗಳನ್ನು ಮಾಡುತ್ತಿದೆ. ಕಾಂಗ್ರೆಸ್‌ ನಮಗೆ ಪ್ರಮುಖ ಪ್ರತಿಪಕ್ಷ ಎಂದು ರಾವ್‌ ಹೇಳಿದರು.