ರಾಹುಲ್‌ ದಿಕ್ಕೆಟ್ಟ ನಾಯಕ ಎಂದ ಜಾವಡೇಕರ್

ಜೈಪುರ್: ರಾಜಸ್ಥಾನದಲ್ಲಿ ಸುದ್ದಿಗಾರರ ಜತೆ ಮಾತನಾಡಿದ ಕೇಂದ್ರ ಸಚಿವ ಪ್ರಕಾಶ್‌ ಜಾವಡೇಕರ್‌, ರಫೇಲ್‌ ಡೀಲ್‌ ವಿಷಯದಲ್ಲಿದಿನಕ್ಕೊಂದು ಹೇಳಿಕೆ ನೀಡುತ್ತಿರುವ ಕಾಂಗ್ರೆಸ್‌ ಅಧ್ಯಕ್ಷ ರಾಹುಲ್‌ ಗಾಂಧಿ "ದಿಕ್ಕೆಟ್ಟ ನಾಯಕ, ಎಂದು ಜರಿದಿದ್ದಾರೆ.

ರಫೇಲ್‌ ಒಪ್ಪಂದದ ವಿಷಯದಲ್ಲಿನಿಖರ ಮಾಹಿತಿ ಇರದೇ ರಾಹುಲ್‌ ಬಾಯಿಗೆ ಬಂದದ್ದನ್ನು ಮಾತಾಡುತ್ತಿದ್ದಾರೆ. ಸುಳ್ಳು ಆರೋಪಗಳ ಮೂಲಕ ಸರಕಾರವನ್ನು ಇಕ್ಕಟ್ಟಿಗೆ ಸಿಕ್ಕಿಸಬಹುದು ಎನ್ನುವ ಯೋಚನೆ ಅವರದ್ದು, ಆದರೆ ಅದು ನಡೆಯುವುದಿಲ್ಲಎಂದು ಗುಡುಗಿದರು. ಅ-ಕಾರವಿಲ್ಲದೇ ದಿಕ್ಕೆಟ್ಟಿರುವ ಅವರು ಏನೇ ಬಡಬಡಿಸಿದರೂ ಮರಳಿ ಅಧಿಕಾರ ಹಿಡಿಯುವ ಸಾಧ್ಯತೆ ಖಂಡಿತ ಇಲ್ಲ ಎಂದರು.

ಕಳೆದ ನಾಲ್ಕುವರೆ ವರ್ಷಗಳ ಆಡಳಿತಾವಧಿಯಲ್ಲಿಕೇಂದ್ರ ಸರಕಾರದ ಒಬ್ಬರೇ ಒಬ್ಬ ಸಚಿವರ ವಿರುದ್ಧ ಭ್ರಷ್ಟಾಚಾರದ ಆರೋಪ ಕೇಳಿ ಬಂದಿಲ್ಲ. ಸರಕಾರವೂ ಪರಿಶುದ್ಧವಾಗಿದೆ. ರಾಹುಲ್‌ ಕೇವಲ ಸುಳ್ಳುಗಳ ಮೂಲಕ ಮೋದಿ ಆಡಳಿತವನ್ನು ಮಲೀನಗೊಳಿಸಲು ನೋಡುತ್ತಿದ್ದಾರೆ ಎಂದು ಟೀಕಿಸಿದರು.