ವಿರೋಧ ಪಕ್ಷದಲ್ಲಿರೋದೇ ಖುಷಿ, ಸುಲಭದ ಕೆಲಸ: ಅಮೇಠಿಯಲ್ಲಿ ರಾಹುಲ್ ಗಾಂಧಿ

ಲಖನೌ: 'ಪ್ರತಿಪಕ್ಷವಾಗಿ ಕೆಲಸ ಮಾಡುವುದೇ ಹೆಚ್ಚು ಖುಷಿ. ಅದು ಸುಲಭವೂ ಹೌದು' ಎಂದು ಕಾಂಗ್ರೆಸ್‌ ನಾಯಕ ರಾಹುಲ್ ಗಾಂಧಿ ಹೇಳಿದ್ದಾರೆ. ಅಮೇಠಿಯಲ್ಲಿ ಕಾಂಗ್ರೆಸ್ ಕಾರ್ಯಕರ್ತರನ್ನು ಉದ್ದೇಶಿಸಿ ಮಾತನಾಡುತ್ತ ಅವರು ಈ ಮಾತು ಹೇಳಿದರು.

ಇತ್ತೀಚಿನ ಲೋಕಸಭಾ ಚುನಾವಣೆಯಲ್ಲಿ ಬಿಜೆಪಿಯ ಸ್ಮೃತಿ ಇರಾನಿ ಎದುರು ತಾವು ಸೋಲು ಅನುಭವಿಸಿದ ಬಳಿಕ ಗಾಂಧಿ ಕುಟುಂಬದ ಪಾರಂಪರಿಕ ಭದ್ರಕೋಟೆಯೆನಿಸಿದ ಅಮೇಠಿಗೆ ಮೊದಲ ಬಾರಿ ಭೇಟಿ ನೀಡಿ ಅವರು ಮಾತನಾಡಿದರು.

'ನರೇಂದ್ರ ಮೋದಿ ಪ್ರಧಾನಿಯಾಗಿದ್ದಾರೆ. ಯೋಗೀಜಿ ಇಲ್ಲಿನ ಮುಖ್ಯಮಂತ್ರಿಯಾಗಿದ್ದಾರೆ. ಇಲ್ಲಿನ ಸಂಸದರೂ ಬಿಜೆಪಿಯವರೇ (ಸ್ಮೃತಿ ಇರಾನಿ) ಆಗಿದ್ದಾರೆ. ಈಗ ನಮಗೆ ವಿರೋಧ ಪಕ್ಷವಾಗಿ ಕೆಲಸ ಮಾಡುವುದೇ ಹೆಚ್ಚು ಖುಷಿ. ನಾವು ಈಗಾಗಲೇ ಐದು ವರ್ಷಗಳ ಕಾಲ ಪ್ರತಿಪಕ್ಷವಾಗಿ ಕೆಲಸ ಮಾಡಿದ್ದೇವೆ. ಈ ಕ್ಷೇತ್ರದಲ್ಲೂ ನೀವು ಇನ್ನು ಪ್ರತಿಪಕ್ಷವಾಗಿಯೇ ಕೆಲಸ ಮಾಡಿ. ಅದೇ ಹೆಚ್ಚು ಖುಷಿ ನೀಡುತ್ತದೆ' ಎಂದು ರಾಹುಲ್ ಗಾಂಧಿ ನುಡಿದರು.

'ದೇಶದ ಆರ್ಥಿಕ ಪರಿಸ್ಥಿತಿ, ಉದ್ಯೋಗ, ಭ್ರಷ್ಟಾಚಾರ- ಇವೆಲ್ಲ ಈಗ ಪ್ರಮುಖ ವಿಚಾರವೇ ಅಲ್ಲ. ಪಕ್ಷದ ಪ್ರತಿಯೊಬ್ಬ ಕಾರ್ಯಕರ್ತರನೂ ಅಮೇಠಿಯ ಜನರ ಜತೆ ನಿಕಟ ಸಂಪರ್ಕದಲ್ಲಿರಿ' ಎಂದು ರಾಹುಲ್ ಗಾಂಧಿ ಹೇಳಿದರು.

'ನಾನೀಗ ವಯನಾಡಿನ ಸಂಸದ. ಆದರೆ 15 ವರ್ಷಗಳಿಂದ ನಾನು ಅಮೇಠಿಯ ಸಂಸದನಾಗಿದ್ದೆ. ಹೀಗಾಗಿ ನನ್ನ ಹಳೆಯ ಬಾಂಧವ್ಯ ಯಾವತ್ತೂ ಮುಂದುವರಿಯುತ್ತದೆ. ನನ್ನ ಅಗತ್ಯವಿದ್ದಾಗ ಕರೆಯಿರಿ. ಬೆಳಗಿನ ಜಾವ 4 ಗಂಟೆಯಾದರೂ ಸರಿ, ಮಧ್ಯರಾತ್ರಿಯೇ ಆಗಿದ್ದರೂ ಸರಿ, ಕರೆದಾಗ ಬರುವೆ' ಎಂದು ರಾಹುಲ್ ನುಡಿದರು.