ವಿದೇಶಿ ನೆಲದಲ್ಲಿ ಭಾರತದ ಸಂಸತ್ತಿಗೆ ರಾಹುಲ್ ಅಪಮಾನ

ಲಂಡನ್: ಭಾರತದ ಸಂಸತ್ತಿನಲ್ಲಿ ಕಳಪೆ ಚರ್ಚೆಗಳು ನಡೆಯುತ್ತವೆ ಎನ್ನುವುದರ ಮೂಲಕ ರಾಷ್ಟ್ರೀಯ ಕಾಂಗ್ರೆಸ್ ಅಧ್ಯಕ್ಷ ವಿದೇಶಿ ನೆಲದಲ್ಲಿ ದೇಶದ ಸಂಸತ್ತಿಗೆ ಅಪಮಾನ ಮಾಡಿದ್ದಾರೆ.

ಲಂಡನ್ ಸ್ಕೂಲ್ ಆಫ್ ಎಕನಾಮಿಕ್ಸ್‌ನಲ್ಲಿ ನಡೆದ ಕಾರ್ಯಕ್ರಮದಲ್ಲಿ ಮಾತನಾಡುತ್ತಿದ್ದ ರಾಹುಲ್, ಸಂಸತ್ತಿನ ಸದಸ್ಯರು ಕಾನೂನು ರೂಪಿಸುವ ಪ್ರಕ್ರಿಯೆಯಲ್ಲಿ ಪಾಲ್ಗೊಳ್ಳುತ್ತಿಲ್ಲ, ಎಲ್ಲ ಕಾನೂನುಗಳು ಪ್ರಧಾನಿ ಕಚೇರಿಯಲ್ಲಿಯೇ ಮಾಡಲ್ಪಡುತ್ತವೆ, ಎಂದು ಹೇಳಿದ್ದಾರೆ.

ರಾಹುಲ್ ಮಾತಿನ ಧಾಟಿ ಹೀಗಿತ್ತು, "ಭಾರತೀಯ ಸಂಸತ್ತಿನಲ್ಲಿ ಚರ್ಚೆಯ ಗುಣಮಟ್ಟವನ್ನು ನೀವು ಗಮನಿಸಿದ್ದೀರಾ? ಅದನ್ನು ನೋಡಿದರೆ ನಿಮಗೆ ಹೆಮ್ಮೆಯಾಗುತ್ತದೆಯಾ? ಎಂತಹ ಕಳಪೆ ಚರ್ಚೆ?. ನಾವು ನೂರಾರು ಅನುಭವಿ ಸಂಸದರನ್ನು ಹೊಂದಿದ್ದೇವೆ. ಆದರೆ ಚರ್ಚೆ ಮಾತ್ರ ನಾವು ನಿರೀಕ್ಷಿಸಿದಂತಿರುವುದಿಲ್ಲ. ಅದೇ 50, 60 ರ ದಶಕದ ಸಂಸತ್ತನ್ನು ಅವಲೋಕಿಸಿದರೆ ವ್ಯತ್ಯಾಸ ಸ್ಪಷ್ಟ''.

ತಮ್ಮ ಮಾತಿನ ನಡುವೆ ಮೋದಿಯನ್ನು ಎಳೆದು ತಂದ ರಾಹುಲ್ ಅವರ ಕಚೇರಿಯಲ್ಲೇ ಕಾನೂನುಗಳಾಗುತ್ತವೆ. ನಾವು ಕಾನೂನು ರೂಪಿಸುವ ಅಧಿಕಾರವನ್ನು ಸಂಸದರಿಗೆ ನೀಡಬೇಕು. ಆಗ ಚರ್ಚೆಯ ಗುಣಮಟ್ಟ ಬದಲಾಗಬಹುದು ಎಂದರು.

ವಿಡಂಬನೆ ಎಂದರೆ, ಇತ್ತೀಚೆಗೆ ಸಂಸತ್ತಿನಲ್ಲಿ ರಾಹುಲ್ ಗಾಂಧಿ ನಡೆದುಕೊಂಡ ರೀತಿ ದೇಶಾದ್ಯಂತ ಟೀಕಿಸಲ್ಪಟ್ಟಿತ್ತು. ವಿದೇಶದಲ್ಲೂ ಸುದ್ದಿಯಾಗಿತ್ತು. ತಮ್ಮ ಭಾಷಣದ ಮುಕ್ತಾಯದ ಸಂದರ್ಭದಲ್ಲಿ ಪ್ರಧಾನಿ ಮೋದಿಯನ್ನು ತಬ್ಬಿಕೊಂಡಿದ್ದ ರಾಹುಲ್ ಬಳಿಕ ತಮ್ಮ ಪಕ್ಷದ ಇತರ ನಾಯಕರ ಕಡೆಗೆ ನೋಡುತ್ತ ಕಣ್ಣು ಮಿಟುಕಿಸಿದ್ದರು.

ಶುಕ್ರವಾರ ಬೇರೆ ಕಾರ್ಯಕ್ರಮವೊಂದರಲ್ಲಿ ಮಾತನಾಡುತ್ತ ರಾಹುಲ್ , ಆರ್‌ಎಸ್‌ಎಸ್‌ ಅನ್ನು ಈಜಿಪ್ಟ್‌ನ ಸುನ್ನಿ ಇಸ್ಲಾಮಿಸ್ಟ್‌ ಸಂಘಟನೆಯ ಜತೆಗೆ ಹೋಲಿಸಿದ್ದರು. ಅಲ್ಲದೆ ಆರ್‌ಎಸ್‌ಎಸ್‌ ದೇಶದ ಸಾಂವಿಧಾನಿಕ ಸಂಸ್ಥೆಗಳ ಕಾರ್ಯದಲ್ಲಿ ಹಸ್ತಕ್ಷೇಪ ನಡೆಸುತ್ತಿದೆ. ಕೇಂದ್ರ ಸರಕಾರ ಆಡಳಿತ ವಿಕೇಂದ್ರೀಕರಣ ನಡೆಸುತ್ತಿದೆ ಎಂದು ದೂಷಿಸಿದ್ದರು.

ರಾಹುಲ್ ಹೇಳಿಕೆ ಬಗ್ಗೆ ಬಿಜೆಪಿ ಉಗ್ರವಾಗಿ ಟೀಕಿಸಿದ್ದು, ಆರ್‌ಎಸ್‌ಎಸ್‌ ಮತ್ತು ದೇಶದ ಸರಕಾರವನ್ನು ಟೀಕಿಸಿರುವ ನೀವು ಅದಕ್ಕಾಗಿ ಸುಪಾರಿ ಪಡೆದುಕೊಂಡಿದ್ದೀರಾ? ನಿಮ್ಮ ನಡವಳಿಕೆ ಮತ್ತು ಹೇಳಿಕೆ ಕ್ಷಮಾರಹಿತವಾದದ್ದು ಎಂದು ಹೇಳಿದೆ.