ರಾಹುಲ್‌ ಮಹಾಜನ್‌ಗೆ 3ನೇ ಬಾರಿ ಮದುವೆ

ಮುಂಬಯಿ: ಮದುವೆಗಳಿಗೇ ಹೆಸರಾದ ಬಿಗ್‌ಬಾಸ್‌ ಸ್ಟಾರ್‌ ರಾಹುಲ್‌ ಮಹಾಜನ್‌ 3ನೇ ಬಾರಿ ವರನಾಗಿದ್ದಾರೆ!
43 ವರ್ಷದ ರಾಹುಲ್‌ ಈ ಬಾರಿ ತಾಳಿ ಬಿಗಿದದ್ದು ತನಗಿಂತ 18 ವರ್ಷ ಕಿರಿಯಳಾದ ಕಜಕಸ್ಥಾನದ ಮಾಡೆಲ್‌ ನತಾಲ್ಯಾ ಇಲಿನಾ ಅವರಿಗೆ. ಮುಂಬಯಿಯ ಮಲಬಾರ್‌ ಹಿಲ್ಸ್‌ನ ದೇವಳದಲ್ಲಿ ನವೆಂಬರ್‌ 20ರಂದು ಸರಳ ವಿವಾಹ ನಡೆಯಿತು.
''ನತಾಲ್ಯಗೂ ನಂಗೂ ಒಂದೂವರೆ ವರ್ಷದಿಂದ ಪರಿಚಯ. ಇತ್ತೀಚೆಗೆ ಆತ್ಮೀಯರಾದೆವು. ಅವಳಿಗೆ ಹಿಂದೂ ಸಂಪ್ರದಾಯ ಇಷ್ಟ. ಮಾಂಗಲ್ಯಸೂತ್ರ ಕೂಡಾ ಹಾಕಿಕೊಳ್ತಾಳೆ. ಆಕೆಗೆ ಸ್ವಂತ ಉದ್ಯಮ ನಡೆಸುವ ಆಸಕ್ತಿ ಇದೆ. ಏನು ಮಾಡಿದರೂ ನನ್ನ ಬೆಂಬಲ ಇದೆ. ನನಗೆ ಕೌಟುಂಬಿಕ ಬದುಕು ಮತ್ತು ಮನಃಶಾಂತಿ ಮುಖ್ಯ,'' ಎಂದಿದ್ದಾರೆ ರಾಹುಲ್‌ ಮಹಾಜನ್‌. ಟ್ವಿಟರ್‌ನಲ್ಲಿ ತಮ್ಮ ಮದುವೆ ವಿಷಯವನ್ನು ರಾಹುಲ್‌ ಘೋಷಿಸಿಕೊಂಡಿದ್ದಾರೆ.
ಇಬ್ಬರು ದೂರ: ರಾಹುಲ್‌ ಮಹಾಜನ್‌ ಅವರ ಮೊದಲ ಪತ್ನಿ ಶ್ವೇತಾ ಬಾಲ್ಯದ ಗೆಳತಿ. ಆದರೆ, ಮದುವೆಯಾದ ಕೆಲವೇ ಸಮಯದಲ್ಲಿ ರಾಹುಲ್‌ ಹಿಂಸೆ ತಾಳಲಾರದೆ 2007ರಲ್ಲಿ ವಿಚ್ಛೇದನೆ ಪಡೆದರು.
2008ರಲ್ಲಿ ಬಿಗ್‌ ಬಾಸ್‌ನಲ್ಲಿ ಭಾಗವಹಿಸಿದ್ದ ರಾಹುಲ್‌ ಫೈನಲ್‌ ಹಂತದವರೆಗೂ ಬಂದಿದ್ದರು. ಅಲ್ಲಿ ಪಾಯಲ್‌ ರೋಹಟ್ಗಿ ಮತ್ತು ಮೋನಿಕಾ ಬೇಡಿ ಜತೆ ಅವರ ಹೆಸರು ಕೇಳಿಬಂದಿತ್ತು. ಬಿಗ್‌ಬಾಸ್‌ ಮನೆಯಿಂದ ತಪ್ಪಿಸಿಕೊಳ್ಳಲು ಯತ್ನಿಸಿದ ಅವರನ್ನು ಶೋನಿಂದ ಹೊರ ಹಾಕಲಾಗಿತ್ತು. 2010ರಲ್ಲಿ ನ್ಯಾಷನಲ್‌ ಟಿವಿಯಲ್ಲಿ ನಡೆದ 'ರಾಹುಲ್‌ ದುಲ್ಹನಿಯಾ ಲೇ ಜಾಯೇಗಾ' ರಿಯಾಲಿಟಿ ಶೋದಲ್ಲಿ ಭಾಗವಹಿಸಿ ಡಿಂಪಿ ಗಂಗೂಲಿ ಅವರನ್ನು ಮದುವೆಯಾದರು. ಆದರೆ, 2014ರಲ್ಲಿ ದೈಹಿಕ ಹಿಂಸೆಯ ಆಪಾದನೆ ಹೊರಿಸಿ ದೂರ ಸರಿದಿದ್ದರು.