#MeToo: ನಾನಾ ಪಾಟೇಕರ್‌ ಸಭ್ಯನೇನು ಅಲ್ಲ, ಆದರೆ ಲೈಂಗಿಕ ದೌರ್ಜನ್ಯ ಮಾಡಿರಲ್ಲ, ರಾಜ್‌ ಠಾಕ್ರೆ

ಮುಂಬಯಿ: ಮಹಿಳೆಯರು ಲೈಂಗಿಕ ದೌರ್ಜನ್ಯದ ವಿರುದ್ಧ ಧ್ವನಿ ಎತ್ತಬೇಕು. ಆದರೆ ಅದು 10 ವರ್ಷಗಳ ನಂತರವಲ್ಲ ಎಂದು ಮಹಾರಾಷ್ಟ್ರ ನವನಿರ್ಮಾಣ ಸೇನೆಯ ಮುಖ್ಯಸ್ಥ ರಾಜ್‌ ಠಾಕ್ರೆ ವ್ಯಾಖ್ಯಾನಿಸಿದ್ದಾರೆ.

ಬಾಲಿವುಡ್‌ ಹಿರಿಯ ನಟ ನಾನಾ ಪಾಟೇಕರ್‌ ವಿರುದ್ಧ ಲೈಂಗಿಕ ದೌರ್ಜನ್ಯ ಆರೋಪ ಮಾಡಿರುವ ತನುಶ್ರೀ ದತ್ತಾ ಎಂಎನ್‌ಎಸ್‌ ಪಕ್ಷದ ಕಾರ್ಯಕರ್ತರ ಮೇಲೂ ದೌರ್ಜನ್ಯದ ಆರೋಪ ಮಾಡಿದ್ದರು.

ಸಿನಿಮಾ ಸೆಟ್‌ನಿಂದ ಹಿಂದಿರುಗುವ ವೇಳೆ ನಾನಾ ಪಾಟೇಕರ್‌ ಅವರು ತಮ್ಮ ವಿರುದ್ಧ ಎಂಎನ್‌ಎಸ್‌ ಕಾರ್ಯಕರ್ತರನ್ನು ಕಳುಹಿಸಿದ್ದರು. ಅವರು ತಮ್ಮ ಕಾರಿನ ಮೇಲೆ ದಾಳಿ ನಡೆಸಿದ್ದರು ಎಂದು ದತ್ತಾ ಆರೋಪಿಸಿದ್ದರು.

'ನನಗೆ ನಾನಾ ಪಾಟೇಕರ್‌ ಚೆನ್ನಾಗಿ ಗೊತ್ತು. ಆತ ಬಹಳ ಸಭ್ಯನೇನು ಅಲ್ಲ. ಸಾಕಷ್ಟು ಹುಚ್ಚಾಟಗಳನ್ನು ಮಾಡುತ್ತಾರೆ. ಆದರೆ ಲೈಂಗಿಕ ದೌರ್ಜನ್ಯದಂತಹ ಕೃತ್ಯ ಮಾಡಿರುವುದಿಲ್ಲ. ಕೋರ್ಟ್‌ ನಿರ್ಧರಿಸುತ್ತದೆ. ಮೀ ಟೂ ತುಂಬಾ ಗಂಭೀರ ವಿಷಯ. ಟ್ವಿಟರ್‌ನಲ್ಲಿ ಚರ್ಚೆ ನಡೆಯುತ್ತಿದೆ' ಎಂದು ರಾಜ್‌ ಠಾಕ್ರೆ ಟೈಮ್ಸ್‌ ನೌಗೆ ತಿಳಿಸಿದ್ದಾರೆ.

ಯಾವುದೇ ಮಹಿಳೆ ತೊಂದರೆ ಅನುಭವಿಸುತ್ತಿದ್ದರೆ ಎಂಎನ್‌ಎಸ್‌ ಜತೆ ಹಂಚಿಕೊಳ್ಳಿ. ನಿಮ್ಮ ನೆರವಿಗೆ ಪಕ್ಷವಿದೆ. ದೌರ್ಜನ್ಯದ ವಿರುದ್ಧ ಮಹಿಳೆ ಧ್ವನಿ ಎತ್ತಬೇಕು. ಆದರೆ 10 ವರ್ಷಗಳ ನಂತರವಲ್ಲ ಎಂದು ಪರೋಕ್ಷವಾಗಿ ತನುಶ್ರೀ ದತ್ತಾ ಕುಟುಕಿದ್ದಾರೆ.