ವಧುವಿನಿಂದ ಲಂಚ ಪಡೆದು ಪೇಚಿಗೆ ಸಿಲುಕಿದ ಪೇದೆ

ಜೈಪುರ: ರಾಜಸ್ಥಾನದ ಪೊಲೀಸ್‌ ಪೇದೆಯೊಬ್ಬ ಮೋಜಿಗಾಗಿ ಚಿತ್ರೀಕರಿಸಿದ 'ಲಂಚಾವತಾರ'ದ ಪ್ರೇಮ ಪ್ರಕರಣವೊಂದು ಆತನ ಪಾಲಿಗೆ ಸಂಕಷ್ಟ ತಂದೊಡ್ಡಿರುವುದು ಮಾತ್ರವಲ್ಲ, ಇಡೀ ಪೊಲೀಸ್‌ ಇಲಾಖೆಯನ್ನು ಮುಜುಗರಕ್ಕೆ ಸಿಲುಕಿಸಿದೆ.
ಪೇದೆ ಧನ್‌ಪತ್‌ ಅವರು ತಮ್ಮ ವಿವಾಹ ಪೂರ್ವದ ವಿಡಿಯೊ ಶೂಟಿಂಗ್‌ಗಾಗಿ ಲಂಚದ ತಮಾಷೆಯ ಕಥೆಯನ್ನು ಆಯ್ದುಕೊಂಡು ಚಿತ್ರೀಕರಿಸಿ, ಅದನ್ನು ಯುಟ್ಯೂಬ್‌ನಲ್ಲಿ ಅಪ್‌ಲೋಡ್‌ ಮಾಡಿ ಈಗ ಬಿಕ್ಕಟ್ಟಿಗೆ ಸಿಲುಕಿದ್ದಾರೆ.
ಕಥೆ ಏನು?: ಹೆಲ್ಮೆಟ್‌ ಇಲ್ಲದೇ ದ್ವಿಚಕ್ರ ಸವಾರಿ ಮಾಡುತ್ತಿದ್ದ ಕಿರಣಾ (ಈಗ ಧನ್‌ಪತ್‌ ಅವರ ಪತ್ನಿ) ಎಂಬ ಮಹಿಳೆಯನ್ನು ಯೂನಿಫಾರ್ಮ್‌ನಲ್ಲಿದ್ದ ಪೇದೆ ಧನ್‌ಪತ್‌ ತಡೆದು ದಂಡ ವಿಧಿಸುತ್ತಾರೆ. ಆಗ ಕ್ಷಣಕಾಲ ಯೋಚಿಸಿದ ಕಿರಣಾ, ಕಾಸು ತೆಗೆದು ಪೇದೆಯ ಜೇಬಿನಲ್ಲಿಟ್ಟು ಮುಂದೆ ಹೋಗುತ್ತಾಳೆ. ನಂತರ ಜೇಬು ಮುಟ್ಟಿ ನೋಡಿಕೊಳ್ಳುವ ಪೇದೆಗೆ ತನ್ನ ಪರ್ಸ್‌ ಮಾಯವಾದದ್ದು ಅರಿವಾಗುತ್ತದೆ. ನಂತರ ಆತ ಆ ಪರ್ಸ್‌ ಎಗರಿಸಿದ ಮಹಿಳೆಯನ್ನು ಭೇಟಿಯಾಗಿ ಪರ್ಸ್‌ ವಾಪಸ್‌ ಪಡೆಯುತ್ತಾನೆ. ಆ ಬಳಿಕ ಇಬ್ಬರ ನಡುವೆ ಪ್ರೇಮಾಂಕುರವಾಗುತ್ತದೆ. ಇದು ಕಥೆ. ಇಷ್ಟೆಲ್ಲ ದೃಶ್ಯಗಳ ಚಿತ್ರೀಕರಣಕ್ಕೆ ಬಾಲಿವುಡ್‌ ಪ್ರೇಮಗೀತೆಗಳ ನಿನಾದದ ಹಿನ್ನೆಲೆ ಕೂಡ ಸೇರಿದೆ. ಇದಾಗಿ ಆ ವಿಡಿಯೋವನ್ನು ಖಾಸಗಿಯಾಗಿ ಇಟ್ಟುಕೊಂಡಿದ್ದರೆ ಏನೂ ಆಗುತ್ತಿರಲಿಲ್ಲ. ಆದರೆ ಪೇದೆ ದನ್‌ಪತ್‌ ಅವರು ಯುಟ್ಯೂಬ್‌ಗೆ ಅಪ್‌ಲೋಡ್‌ ಮಾಡಿ ಮೇಲಾಧಿಕಾರಿಗಳ ಕೆಂಗಣ್ಣಿಗೆ ಗುರಿಯಾಗಿದ್ದಾರೆ.
''ಪೊಲೀಸ್‌ ಸಮವಸ್ತ್ರದಲ್ಲಿ ಈ ಎಲ್ಲ ಹುಚ್ಚಾಟ ನಡೆಸಿರುವುದು, ಅದರಲ್ಲಿಯೂ ಲಂಚ ಸ್ವೀಕರಿಸಿದಂತೆ ಚಿತ್ರೀಕರಿಸಿರುವುದು ಅಕ್ಷಮ್ಯ. ಕರ್ತವ್ಯ ಲೋಪ ಕೂಡ ಹೌದು. ಅವರ ವಿರುದ್ಧ ಶಿಸ್ತು ಕ್ರಮಕ್ಕೆ ಆದೇಶಿಸಲಾಗಿದೆ,'' ಎಂದು ಐಜಿ ಡಾ.ಹವಾ ಸಿಂಗ್‌ ಘೋಮಾರಿಯಾ ಹೇಳಿದ್ದಾರೆ.