ಮುಸ್ಲಿಂ ಉದ್ಯೋಗಿಗಳ ಲೆಕ್ಕ ಕೇಳಿದ ರಾಜಸ್ಥಾನ ಸರಕಾರ

ಜೈಪುರ/ಅಲ್ವಾರ್: ಸರಕಾರಿ ಆಸ್ಪತ್ರೆಗಳಲ್ಲಿ ಕಾರ್ಯನಿರ್ವಹಿಸುತ್ತಿರುವ ಮುಸ್ಲಿಂ ಉದ್ಯೋಗಿಗಳ ಲೆಕ್ಕ ನೀಡಲು ರಾಜಸ್ಥಾನ ಸರಕಾರ ಆದೇಶಿಸಿದ್ದು, ಇದು ಮುಸ್ಲಿಂ ಉದ್ಯೋಗಿಗಳಲ್ಲಿ ಆತಂಕ ಸೃಷ್ಟಿಸಿದೆ.

ಆರೋಗ್ಯ ಇಲಾಖೆ ಜಂಟಿ ನಿರ್ದೇಶಕ ಡಾ.ಬಿ.ಎಲ್. ಸೈನಿ ಕಳೆದ ವಾರ ಈ ಆದೇಶ ನೀಡಿದ್ದು, ಇದಕ್ಕೆ ಕಾರಣವೇನೆಂದು ತಿಳಿಯದೇ ಮುಸ್ಲಿಂ ಉದ್ಯೋಗಿಗಳು ಚಿಂತಿತರಾಗಿದ್ದಾರೆ.

ಆರೋಗ್ಯ ಕೇಂದ್ರಗಳು, ಪ್ರಾಥಮಿಕ ಆರೋಗ್ಯ ಕೇಂದ್ರಗಳು ಮತ್ತು ಸಮುದಾಯ ಆರೋಗ್ಯ ಕೇಂದ್ರಗಳಲ್ಲಿ ಕಾರ್ಯನಿರ್ವಹಿಸುತ್ತಿರುವ ಮುಸ್ಲಿಮ್ ಉದ್ಯೋಗಿಗಳ ಲೆಕ್ಕ ನೀಡುವಂತೆ ಎಲ್ಲ ಮುಖ್ಯ ವೈದ್ಯಾಧಿಕಾರಿಗಳಿಗೆ ಸೂಚನೆ ನೀಡಿದ್ದು, ಈ ಬಗ್ಗೆ ಅಂಕಿ ಅಂಶಗಳನ್ನು ಕಲೆ ಹಾಕಲಾಗುತ್ತಿದೆ. ರೇಡಿಯೋಗ್ರಾಫರ್ಸ್, ಲ್ಯಾಬ್ ಟೆಕ್ನಿಷಿಯನ್ಸ್, ಡೆಂಟಲ್ ಟೆಕ್ನಿಷಿಯನ್ಸ್, ನರ್ಸಿಂಗ್ ಸ್ಟ್ಯಾಫ್ಸ್ ಮತ್ತು ಇತರೆ ಉದ್ಯೋಗಿಗಳ ಸಂಖ್ಯೆ ಕಲೆ ಹಾಕಲಾಗುತ್ತಿದೆ.