ರಾಜಸ್ಥಾನದಲ್ಲಿ ಸೆಗಣಿಯಿಂದ ಪೇಪರ್‌ ತಯಾರಿ

ಜೈಪುರ: ಜೈಪುರ: ರಾಜಸ್ಥಾನದಲ್ಲಿ ಹಸುವಿನ ಸೆಗಣಿ ಮತ್ತು ಮೂತ್ರವನ್ನು ಸಾವಯವ ಗೊಬ್ಬರ, ಗ್ರಾಮೀಣ ಪ್ರದೇಶಗಳಲ್ಲಿ ಇಂಧನವಾಗಿ ಬಳಸುವುದು , ಬಯೋಗ್ಯಾಸ್‌ ಪ್ಲಾಂಟ್‌ಗಳಿಗೆ ಸಾಮಾನ್ಯವಾಗಿದೆ. ಈಗ ಅಲ್ಲಿನ ಗೋಪಾಲನ ಇಲಾಖೆಯು ಸೆಗಣಿಯಿಂದ ಪೇಪರ್‌ ತಯಾರಿಸಲು ಮುಂದಾಗಿದ್ದು, ಈ ಮೂಲಕ ಗೋಶಾಲೆಗಳಿಗೆ ಆದಾಯ ಬರಲಿದೆ ಎಂದು ಇಲಾಖೆ ಹೇಳಿದೆ.

ಖಾದಿ ಮತ್ತು ಗ್ರಾಮೋದ್ಯೋಗ ಆಯೋಗದ ಘಟಕವಾಗಿರುವ ಕುಮಾರಪ್ಪ ನ್ಯಾಷನಲ್‌ ಹ್ಯಾಂಡ್‌ಲೂಂ ಪೇಪರ್‌ ಇನ್ಸ್ಟಿಟ್ಯೂಟ್‌ ಸೆಗಣಿಯಿಂದ ಪೇಪರ್‌ ತಯಾರಿಸಲಿದ್ದು, ಇದಕ್ಕೆ ಸಣ್ಣ ಮತ್ತು ಮಧ್ಯಮ ಕೈಗಾರಿಕೆ ಸಚಿವ ಗಿರಿರಾಜ್‌ ಸಿಂಗ್‌ ಚಾಲನೆ ನೀಡಿದರು.

ಬಯೋಗ್ಯಾಸ್‌ ಪ್ಲಾಂಟ್‌ಗೆ ಬಳಕೆಯಾಗಿ ಉಳಿಯುವ ಸೆಗಣಿ ತ್ಯಾಜ್ಯ ಸಾರಜನಕದ ಆಗರ. ಈ ಯೋಜನೆಯಿಂದ ರೈತರಿಗೆ ಲಾಭವಾಗುವ ಜತೆಗೆ ಬೀದಿಗಳು ಸ್ವಚ್ಛವಾಗಲಿವೆ. ರಾಜ್ಯದಲ್ಲಿ 5 ಲಕ್ಷ ಹಸುಗಳಿದ್ದು, 1,160 ನೋಂದಾಯಿತ ಗೋಶಾಲೆಗಳಿವೆ. ಉತ್ಪನ್ನಗಳ ಉತ್ಪಾದನೆ ಮತ್ತು ಮೌಲ್ಯ ಸೇರ್ಪಡೆ ಹೆಚ್ಚಿಸುವ ಮೂಲಕ ಹಸು ಸಾಕಣೆಯ ಸಮಗ್ರ ಮತ್ತು ಆರ್ಥಿಕ ಮಹತ್ವವನ್ನು ಮರು ಸ್ಥಾಪಿಸುವ ಪ್ರಯತ್ನ ನಡೆಸುವುದಾಗಿ ಇಲಾಖೆಯ ಅಧಿಕಾರಿಯೊಬ್ಬರು ಹೇಳಿದ್ದಾರೆ.
ರಾಜ್ಯದಲ್ಲಿ ಖಾಸಗಿ ಗೋ ಶಾಲೆಗಳಿಗೂ ಸರಕಾರ ಅನುದಾನ ನೀಡುತ್ತಿದ್ದು, ಗೋ ಮೂತ್ರದಿಂದ ಸೋಂಕು ನಿವಾರಕಗಳನ್ನು ಉತ್ಪಾದಿಸಲಾಗುತ್ತಿದೆ.