ಐಸೋಲೇಷನ್‌ ವಾರ್ಡ್‌ನಿಂದ ವಿಡಿಯೋ ಕಾಲ್‌ ನಲ್ಲಿ ತಾಯಿಯ ಅಂತಿಮ ದರ್ಶನ ಪಡೆದ ನರ್ಸ್!

ಜೈಪುರ: ಕೊರೊನಾ ವೈರಸ್ ಐಸೋಲೇಷನ್‌ ವಾರ್ಡ್‌ನ ಮಹಿಳಾ ಸಿಬ್ಬಂದಿಯೊಬ್ಬರು ವಿಡಿಯೋ ಕಾಲ್‌ ಮೂಲಕ ತಮ್ಮ ತಾಯಿಯ ಅಂತಿಮ ದರ್ಶನ ಪಡೆದ ಮನಕಲಕುವ ಘಟನೆ ರಾಜಸ್ತಾನದಲ್ಲಿ ನಡೆದಿದೆ.

ಜೈಪುರದ ಎಸ್‌ಎಮ್‌ಎಸ್‌ ಆಸ್ಪತ್ರೆಯ ಕೊರೊನಾ ಚಿಕಿತ್ಸಾ ವಿಭಾಗದ ನರ್ಸಿಂಗ್‌ ಮೇಲ್ವಿಚಾರ ರಾಮಮೂರ್ತಿ ಮೀನಾ ಅವರ 93 ವರ್ಷದ ತಾಯಿ ಮಾರ್ಚ್ 30ರಂದು ಮೃತಪಟ್ಟಿದ್ದರು. ಆದರೆ, ಜನವರಿ 26ರಿಂದ ಕೊರೊನಾ ವಾರ್ಡ್‌ನಲ್ಲಿ ಕರ್ತವ್ಯ ನಿರ್ವಹಿಸುತ್ತಿರುವ ಅವರಿಗೆ ಕರೌಲ್‌ ಜಿಲ್ಲೆಯ ತಮ್ಮ ಊರಿಗೆ ಹೋಗುವುದು ಅಸಾಧ್ಯವಾಗಿತ್ತು. ಹೀಗಾಗಿ ಅವರ ಮೂವರು ಹಿರಿಯ ಸಹೋದರರು ಹಾಗೂ ತಂದೆ ಅಂತಿಮ ವಿಧಿವಿಧಾನ ನೆರೆವೇರಿಸಿದರು.

ರಾಮಮೂರ್ತಿ ವಾರ್ಡ್‌ನೊಳಗೆ ಇದ್ದುಕೊಂಡು ವಿಡಿಯೋ ಕಾಲ್‌ ಮೂಲಕ ತಾಯಿಯ ಅಂತಿಮ ದರ್ಶನ ಪಡೆದುಕೊಂಡರು. ಈಗ ಅವರು ವಾರ್ಡ್‌ ಕರ್ತವ್ಯದಿಂದ ಬಿಡುಗಡೆಯಾಗಿದ್ದರೂ ಸುರಕ್ಷತೆಯ ಉದ್ದೇಶದಿಂದ ಹೋಮ್‌ ಕ್ವಾರಂಟೈನ್‌ನಲ್ಲಿಇದ್ದಾರೆ. ''ತಾಯಿಯ ಅಂತಿಮ ದರ್ಶನ ಪಡೆಯಲಾಗದ್ದು ನನ್ನ ದೌರ್ಭಾಗ್ಯ. ಆದರೆ, ಜಗತ್ತನ್ನೇ ಕಾಡುತ್ತಿರುವ ಕೊರೊನಾ ವೈರಸ್‌ ರೋಗಿಗಳ ವಾರ್ಡ್‌ನಲ್ಲಿ ಕರ್ತವ್ಯ ನಿರ್ವಹಿಸುವುದೇ ದೊಡ್ಡ ವಿಚಾರ,'' ಎಂದು ರಾಮಮೂರ್ತಿ ಹೇಳಿದ್ದಾರೆ.