29 ವರ್ಷಗಳಿಂದ ಜೈಲಿನಲ್ಲಿರುವ ರಾಜೀವ್‌ ಗಾಂಧಿ ಹಂತಕಿ ನಳಿನಿ ಆತ್ಮಹತ್ಯೆಗೆ ಯತ್ನ!

ಚೆನ್ನೈ: ಕಳೆದ 29 ವರ್ಷಗಳಿಂದ ಮಾಜಿ ಪ್ರಧಾನಿ ರಾಜೀವ್ ಗಾಂಧಿ ಹತ್ಯೆ ಪ್ರಕರಣದಲ್ಲಿ ಶಿಕ್ಷೆ ಅನುಭವಿಸುತ್ತಿರುವ ಅಪರಾಧಿ ನಳಿನಿ ಶ್ರೀಹರನ್ ಆತ್ಮಹತ್ಯೆಗೆ ಯತ್ನಿಸಿರುವುದಾಗಿ ವರದಿಯಾಗಿದೆ. ನಳಿನಿಯ ವಕೀಲರಾದ ಪುಗಲೆಂಥಿ ಈ ಬಗ್ಗೆ ಮಾಹಿತಿ ನೀಡಿದ್ದಾರೆ.

ಸೋಮವಾರ ತಡರಾತ್ರಿ ಹಂತಕಿ ನಳಿನಿ ಆತ್ಮಹತ್ಯೆಗೆ ಯತ್ನಿಸಿರುವುದಾಗಿ ವಕೀಲರು ತಿಳಿಸಿದ್ದಾರೆ. ಸದ್ಯ ನಳಿನಿ ಶ್ರೀಹರನ್‌ ವೆಲ್ಲೂರಿನ ಮಹಿಳಾ ಕಾರಾಗೃಹದಲ್ಲಿ ಶಿಕ್ಷೆ ಅನುಭವಿಸುತ್ತಿದ್ದಾರೆ. ಕಳೆದ 29 ವರ್ಷಗಳಲ್ಲಿ ಇದೆ ಮೊದಲ ಬಾರಿಗೆ ಇಂತಹ ಕಠಿಣ ನಿರ್ಧಾರವನ್ನ ನಳಿಸಿ ತೆಗೆದುಕೊಂಡಿದ್ದಾರೆಂದು ವಕೀಲರಾದ ಪುಗಲೆಂಥಿ ತಿಳಿಸಿದ್ದಾರೆ.

ಅದಕ್ಕೆ ಕಾರಣ ತಿಳಿಸಿದ ವಕೀಲರು, ಅಲ್ಲಿರುವ ಮತ್ತೊಂದು ಕೈದಿಯೊಂದಿಗಿನ ಜಗಳ ಎಂದು ಕೂಡ ಅವರು ಆರೋಪಿಸಿದ್ದಾರೆ. ಜೈಲಿನಲ್ಲಿ ಜೀವಾವಧಿ ಶಿಕ್ಷೆಗೊಳಪಟ್ಟಿರುವ ಮತ್ತೊಂದು ಕೈದಿ, ನಳಿನಿಯೊಂದಿಗೆ ಕಾಲ್ಕೆರೆದು ಜಗಳವಾಡಿದ್ದಾರೆ. ಅಲ್ಲದೆ ಆ ಕೈದಿ ಈ ವಿಚಾರವನ್ನ ಜೈಲಿನ ಅಧಿಕಾರಿಗೆ ತಿಳಿಸಿದ್ದರು. ಇದರಿಂದ ಮನನೊಂದು ಈ ರೀತಿ ನಳಿನಿ ಮಾಡಿಕೊಂಡಿದ್ದಾರೆ ಎಂದು ವಕೀಲರು ತಿಳಿಸಿದ್ದಾರೆ.

ತಾಯಿ ಲಡಾಖ್‌ನಲ್ಲಿ.. ಮಗು ದಿಲ್ಲಿಯ ಆಸ್ಪತ್ರೆಯಲ್ಲಿ.. 1000 ಕಿಮೀ ದೂರದಿಂದ ದಿನವೂ ಬರ್ತಿದೆ ಅಮ್ಮನ ಎದೆಹಾಲು

ಈವರೆಗೆ ನಳಿನಿ ಇಂತಹ ಯಾವುದೇ ನಿರ್ಧಾರ ಕೈಗೊಂಡಿಲ್ಲ ಹೀಗಾಗಿ ಈ ಬಗ್ಗೆ ನಮಗೆ ಸರಿಯಾದ ಮಾಹಿತಿ ತಿಳಿಯಬೇಕು ಅಲ್ಲದೆ ಅವರ ಕೊಠಡಿ ಅಥವಾ ಜೈಲು ಬದಲಿಸಬೇಕು ಎಂದು ವಕೀಲರು ಆಗ್ರಹಿಸಿದ್ದಾರೆ. 1991ರ ಮೇ. 21ರಂದು ತಮಿಳುನಾಡಿನಲ್ಲಿ ಚುನಾವಣೆ ರ್ಯಾಲಿಗೆ ಆಗಮಿಸಿದ್ದ ಮಾಜಿ ಪ್ರಧಾನಿ ರಾಜೀವ್‌ ಗಾಂಧಿಯವರನ್ನ ಹತ್ಯೆ ಮಾಡಲಾಗಿತ್ತು.

ಎಲ್‌ಟಿಟಿ ಸಂಘಟನೆಯಿಂದ ಪ್ರೇರಿತರಾಗಿ ಈ ಕೃತ್ಯ ನಡೆಸಲಾಗಿತ್ತು. ಈ ಕೃತ್ಯದ ಹಿಂದಿದ್ದ ನಳಿನಿ, ಅವರ ಪತಿ ಮುರುಗನ್‌ ಸೇರಿ ಒಟ್ಟು ಏಳು ಮಂದಿಯನ್ನ ಕೋರ್ಟ್‌ ಅಪರಾಧಿಗಳು ಎಂದು ಘೋಷಿಸಿತ್ತು. ಎಲ್ಲರಿಗೂ ಗಲ್ಲು ಶಿಕ್ಷೆ ಪ್ರಕಟವಾಗಿತ್ತು. ನಂತರ ಇದನ್ನ ಜೀವಿತಾವಧಿ ಶಿಕ್ಷೆಯಾಗಿ ಮಾರ್ಪಾಟು ಮಾಡಲಾಗಿತ್ತು.