ಬಿಎಸ್‌ಎಫ್‌ ಯೋಧರೊಂದಿಗೆ ರಾಜನಾಥ್‌ ದಸರಾ ಆಚರಣೆ

ಬಿಕನೇರ್‌: ಕೇಂದ್ರ ಗೃಹ ಸಚಿವ ರಾಜನಾಥ್‌ ಸಿಂಗ್‌ ಅವರು ಭಾರತ-ಪಾಕಿಸ್ತಾನ ಗಡಿಯಲ್ಲಿ ಗಡಿ ಭದ್ರತಾ ಪಡೆ (ಬಿಎಸ್‌ಎಫ್‌) ಯೋಧರೊಂದಿಗೆ ಶುಕ್ರವಾರ ದಸರಾ ಆಚರಿಸಿದರು. ಇದೇ ವೇಳೆ ಅವರು 'ಆಯುಧ ಪೂಜೆ' ಸಹ ನೆರವೇರಿಸಿದರು.

ಸೇನಾ ನೆಲೆಯಲ್ಲಿ ಕೇಂದ್ರ ಹಿರಿಯ ಸಚಿವರೊಬ್ಬರು ಆಯುಧ ಪೂಜೆ ನೆರವೇರಿಸಿದ್ದು ಇದೇ ಮೊದಲು. ರಾಜಸ್ಥಾನದ ಬಿಕನೇರ್‌ನಲ್ಲಿರುವ ಬಿಎಸ್‌ಎಫ್‌ ಕಚೇರಿಗೆ ಗುರುವಾರ ಸಂಜೆಯೇ ತೆರಳಿದ ರಾಜನಾಥ್‌ ಸಿಂಗ್‌ ಅವರು ಬಿಎಸ್‌ಎಫ್‌ ಸಿಬ್ಬಂದಿಯ ಕುಟುಂಬದವರೊಂದಿಗೆ ಸಂವಾದ ನಡೆಸಿದರು. ಯೋಧರೊಂದಿಗೆ ಹಬ್ಬದೂಟ ಸವಿದರು.

ಶುಕ್ರವಾರ ಗಡಿ ಪರಿಸ್ಥಿತಿಯನ್ನು ಅವಲೋಕಿಸಿ, ವಿವಿಧ ಮೂಲಸೌಕರ್ಯ ಯೋಜನೆಗಳ ಪ್ರಗತಿ ಪರಿಶೀಲಿಸಿದರು. ಕಳೆದ ವರ್ಷ ಚೀನಾ-ಭಾರತ ಗಡಿಯ ಉತ್ತರಾಖಂಡದ ಜೋಶಿಮಠದಲ್ಲಿ ಗೃಹ ಸಚಿವರು ದಸರಾ ಆಚರಿಸಿದ್ದರು.