ಗಡಿ ಜನರ ವಲಸೆ ಸಲ್ಲ: ರಾಜನಾಥ್‌ ಸಿಂಗ್‌

ಜೋಶಿಮಠ (ಉತ್ತರಾಖಂಡ): ಭಾರತ-ಚೀನಾ ಗಡಿಯಲ್ಲಿ ವಾಸಿಸುತ್ತಿರುವ ಜನ ಯಾವುದೇ ಕಾರಣಕ್ಕೂ ವಲಸೆ ಹೋಗದಂತೆ ಎಚ್ಚರ ವಹಿಸುವ ಅಗತ್ಯವಿದೆ ಎಂದು ಗೃಹಸಚಿವ ರಾಜನಾಥ್‌ ಸಿಂಗ್‌ ಹೇಳಿದ್ದಾರೆ. ಗಡಿ ಜನರು ವಲಸೆ ಹೋಗಿದ್ದೇ ಆದಲ್ಲಿ ಅದರಿಂದ ಭಾರತದ ಭದ್ರತೆಗೆ ಅಪಾಯ ಎದುರಾಗುವ ಸಾಧ್ಯತೆಗಳಿವೆ. ಆದ್ದರಿಂದ ಅವರೆಂದೂ ವಲಸೆ ಹೋಗದಂತೆ ನೋಡಿಕೊಳ್ಳಿ ಎಂದು ಪ್ರಮುಖ ಕಾವಲು ಪಡೆ ಐಟಿಬಿಪಿ(ಇಂಡೊ-ಟಿಬೆಟನ್‌ ಬಾರ್ಡರ್‌ ಪೊಲೀಸ್‌)ಗೆ ಸಿಂಗ್‌ ನಿರ್ದೇಶನ ನೀಡಿದ್ದಾರೆ.

ಶನಿವಾರ ಇಲ್ಲಿನ 'ಫಸ್ಟ್‌ ಬೆಟಾಲಿಯನ್‌ ಕ್ಯಾಂಪ್‌'ನಲ್ಲಿ ಐಟಿಬಿಪಿ ಪಡೆಗಳು ಹಾಗೂ ಸ್ಥಳೀಯರನ್ನುದ್ದೇಶಿಸಿ ರಾಜನಾಥ್‌ ಸಿಂಗ್‌ ಮಾತನಾಡುತ್ತಿದ್ದರು. ಇಂತಹ ಸೂಕ್ಷ್ಮ ಪ್ರದೇಶಗಳಲ್ಲಿ ವಾಸಿಸುವ ಜನರ ಮೇಲೆ ಸರಕಾರಕ್ಕೆ 'ಪೂರ್ಣ ನಂಬಿಕೆ ಹಾಗೂ ವಿಶ್ವಾಸ' ಇರುವುದರಿಂದ ಗಡಿ ಜನರಿಗೆ ತುಂಬಾನೇ ಮಹತ್ವ ನೀಡಬೇಕಿದೆ ಎಂದು ಸಿಂಗ್‌ ಹೇಳಿದರು.