ವರ್ಷಾಂತ್ಯದಲ್ಲಿ ರಾಮ ಮಂದಿರ ನಿರ್ಮಾಣ ಆರಂಭ: ವಿಎಚ್‌ಪಿ

ಹೊಸದಿಲ್ಲಿ: ಶಾಸನಬದ್ಧ ಅಡೆತಡೆಗಳೆಲ್ಲವನ್ನೂ ನಿವಾರಿಸಿಕೊಂಡು ಕಾನೂನು ಮತ್ತು ಸಂವಿಧಾನಾತ್ಮಕವಾಗಿಯೇ ಅಯೋಧ್ಯೆಯಲ್ಲಿ ಈ ವರ್ಷಾಂತ್ಯದಲ್ಲಿ ರಾಮ ಮಂದಿರ ನಿರ್ಮಾಣ ಕಾರ್ಯ ಆರಂಭಗೊಳ್ಳಲಿದೆ ಎಂದು ವಿಶ್ವ ಹಿಂದೂ ಪರಿಷತ್‌ ಕಾರ್ಯಾಧ್ಯಕ್ಷ ಅಲೋಕ್‌ ಕುಮಾರ್‌ ಗುರುವಾರ ಹೇಳಿದ್ದಾರೆ.

''ರಾಮ ಜನ್ಮಭೂಮಿ ವಿವಾದದ ವಿಚಾರಣೆಯನ್ನು ಸುಪ್ರೀಂ ಕೋರ್ಟ್‌ ದಿನನಿತ್ಯದ ಆಧಾರದ ಮೇಲೆ ನಡೆಸುವ ನಿರೀಕ್ಷೆ ಇದೆ. ಹಾಗೇನಾದರೂ ಆದಲ್ಲಿ, ಸೆಪ್ಟೆಂಬರ್‌ ಕೊನೆಯಲ್ಲಿ ಅಂತಿಮ ಆದೇಶ ಹೊರಬೀಳಲಿದೆ,'' ಎಂದು ಕುಮಾರ್‌ ಸುದ್ದಿಗಾರರಿಗೆ ತಿಳಿಸಿದರು.

ಜುಲೈ 6ರಂದು ವಿಚಾರಣೆಗೆ ಚಾಲನೆ ದೊರೆಯಲಿದೆ. ಒಂದು ವೇಳೆ, ವಿಚಾರಣೆ ಆರಂಭಕ್ಕೆ ತೊಡಕೇನಾದರೂ ಎದುರಾದಲ್ಲಿ ಮಾರ್ಗದರ್ಶನಕ್ಕಾಗಿ 'ಸಂತ ಸಮಾಜ'ವನ್ನು ಸಂಪರ್ಕಿಸಲಾಗುವುದು ಎಂದು ಅವರು ಹೇಳಿದರು.

ವರ್ಷಾಂತ್ಯದೊಳಗೆ ರಾಮ ಲಲ್ಲಾ ಮಂದಿರ ನಿರ್ಮಾಣ ಕಾರ್ಯ ಆರಂಭಗೊಳ್ಳಲಿದೆ ಎಂಬ ನಿಮ್ಮ ಆಶಾವಾದಕ್ಕೆ ಏನು ಕಾರಣ ಎಂದು ಕೇಳಿದ್ದಕ್ಕೆ, ''ಕಾನೂನು ನಮ್ಮ ಕಡೆ ಇದೆ ಎಂದು ನಾನು ನಂಬಿದ್ದೇನೆ,'' ಎಂದು ಕುಮಾರ್‌ ಉತ್ತರಿಸಿದ್ದಾರೆ.