ಸದ್ಯದಲ್ಲೇ ಬರಲಿದೆ ಪತಂಜಲಿ ಫಾಸ್ಟ್ಫುಡ್ | ಮೆಕ್ಡೊನಾಲ್ಡ್, ಕೆಎಫ್ಸಿಗೆ ಸಡ್ಡು
ಹೊಸದಿಲ್ಲಿ: ವೈವಿಧ್ಯಮಯ ಉತ್ಪನ್ನಗಳ ಮೂಲಕ ಮಾರುಕಟ್ಟೆಯಲ್ಲಿ ಬಹುರಾಷ್ಟ್ರೀಯ ಕಂಪನಿಗಳಿಗೆ ಸಡ್ಡು ಹೊಡೆದಿರುವ ಯೋಗ ಗುರು ಬಾಬಾ ರಾಮ್ದೇವ್ ಈಗ ಹೋಟೆಲ್ ಉದ್ಯಮಕ್ಕೂ ಲಗ್ಗೆ ಇಡಲು ಭರ್ಜರಿ ಪ್ಲಾನ್ ಮಾಡಿದ್ದಾರೆ.
ಪತಂಜಲಿ ಬ್ರಾಂಡ್ ಅಡಿಯಲ್ಲಿ ದೇಶಾದ್ಯಂತ ಫಾಸ್ಟ್ಫುಡ್ ಸೆಂಟರ್ಗಳನ್ನು ತೆರೆಯಲು ರಾಮ್ ದೇವ್ ನಿರ್ಧರಿಸಿದ್ದು, ಈ ಸಂಬಂಧ ಸಿದ್ಧತೆಯಲ್ಲಿ ತೊಡಗಿದ್ದಾರೆ.
ಈಗಾಗಲೇ ಯೂನಿಲಿವರ್ನಂತಹ ಬಹು ಬೇಡಿಕೆಯ ಗ್ರಾಹಕ ಉತ್ಪನ್ನ ಸಂಸ್ಥೆಗಳಿಗೆ ಪತಂಜಲಿ ಉತ್ಪನ್ನಗಳ ಮೂಲಕ ಹೊಡೆತ ನೀಡಿರುವ ರಾಮ್ದೇವ್, ಇದೀಗ ಮೆಕ್ಡೊನಾಲ್ಡ…, ಕೆಎಫ್ಸಿಯಂತ ರೆಸ್ಟೊರಂಟ್ಗಳನ್ನು ಗುರಿಯಾಗಿಸಿಕೊಂಡಿದ್ದಾರೆ.
400 ರೆಸಿಪಿಗಳು: ಸಂಪೂರ್ಣ ಸಸ್ಯಾಹಾರಿ ಹೋಟೆಲ್ಗಳಾದ ಪತಂಜಲಿ ಫಾಸ್ಟ್ಫುಡ್ ಸೆಂಟರ್ಗಳ ಮೂಲ 400 ಬಗೆಯ ಖಾದ್ಯಗಳನ್ನು ಒದಗಿಸಲು ಯೋಜಿಸಲಾಗಿದೆ.
''ಉತ್ತರ ಭಾರತ, ದಕ್ಷಿಣ ಭಾರತ ಶೈಲಿಯ ಖಾದ್ಯಗಳೆಂಬ ಭೇದ ಇರುವುದಿಲ್ಲ. ಎಲ್ಲವನ್ನೂ ಸೇರಿಸಿ, ನಾವು ಜನರಿಗೆ ವಿಸ್ತೃತ ಆಯ್ಕೆ ನೀಡುತ್ತೇವೆ. ಸಸ್ಯಾಹಾರಿ ಭಾರತೀಯ ಖಾದ್ಯಗಳಿಗಿಂತಲೂ ರುಚಿಕರ ಆಹಾರ ಮತ್ತೊಂದಿಲ್ಲ. ಈಗ ನಾನ್ವೆಜ್ಗಾಗಿ ಖ್ಯಾತಿ ಪಡೆದಿರುವ ಬಹುರಾಷ್ಟ್ರೀಯ ರೆಸ್ಟೊರಂಟ್ಗಳಿಗೆ ಆಪತ್ಕಾಲ ಎದುರಾಗಲಿದೆ,'' ಎಂದು ರಾಮ್ದೇವ್ ಹೇಳಿದ್ದಾರೆ.
2014-15ರಲ್ಲಿ 2,000 ರೂ.ನಷ್ಟಿದ್ದ ಪತಂಜಲಿ ಸಂಸ್ಥೆ ಆದಾಯ ಕಳೆದ ಮಾರ್ಚ್ ಅಂತ್ಯದ ವೇಳೆಗೆ 10,500 ಕೋಟಿ ರೂ ತಲುಪಿದೆ. ಮುಂದಿನ ದಿನಗಳಲ್ಲಿ ಇದನ್ನು ದ್ವಿಗುಣಗೊಳಿಸುವ ಗುರಿ ಹೊಂದಲಾಗಿದೆ. ಸಂಸ್ಥೆಯ ಟೂತ್ಪೇಸ್ಟ್, ತುಪ್ಪ ಸೇರಿದಂತೆ ಎಲ್ಲ ಉತ್ಪನ್ನಗಳೂ ಭಾರಿ ಮಾರುಕಟ್ಟೆ ಪಾಲು ಪಡೆದಿವೆ. ಒಂದು ವರ್ಷದೊಳಗೆ ವಿತರಕರ ಸಂಖ್ಯೆಯನ್ನು 12,000ಕ್ಕೆ ಹೆಚ್ಚಿಸುವ ಮತ್ತು ನೌಕರರ ಸಂಖ್ಯೆಯನ್ನು ಪ್ರಸ್ತುತ ಇರುವ 1 ಲಕ್ಷದಿಂದ 5 ಲಕ್ಷಕ್ಕೆ ಹೆಚ್ಚಿಸುವ ಗುರಿ ಹೊಂದಲಾಗಿದೆ ಎಂದು ಬಾಬಾ ಮಾಹಿತಿ ನೀಡಿದ್ದಾರೆ.
ಬಟ್ಟೆ ವ್ಯಾಪಾರಕ್ಕೂ ಸೈ: ಇದೇ ವೇಳೆ ಮುಂದಿನ ದಿನಗಳಲ್ಲಿ ಬಟ್ಟೆ ವ್ಯಾಪಾರಕ್ಕೂ ಪತಂಜಲಿ ಸಂಸ್ಥೆ ಇಳಿಯಲಿದೆ ರಾಮದೇವ್ ತಿಳಿಸಿದ್ದಾರೆ.
ಹುತಾತ್ಮರ ಮಕ್ಕಳಿಗೆ ನೆರವು: ಹುತಾತ್ಮ ಯೋಧರ ಮಕ್ಕಳ ಶಿಕ್ಷ ಣಕ್ಕೆ ನೆರವಾಗುವ ನಿಟ್ಟಿನಲ್ಲಿ ಪತಂಜಲಿ ಸಂಸ್ಥೆ ಯೋಜನೆಯೊಂದನ್ನು ರೂಪಿಸಿದ್ದು, ಅದರಂತೆ ಯೋಧರ ಮಕ್ಕಳಿಗಾಗಿ ಒಂದು ಶಾಲೆಯನ್ನೂ ತೆರೆಯುವ ಚಿಂತನೆಯಲ್ಲಿದೆ.