ರಾಂಚಿಗೆ ಒಲಿದ ಯೋಗ ದಿನದ ಆತಿಥ್ಯ

ಸತತ ಎರಡನೇ ವರ್ಷ ಸಾಂಸ್ಕೃತಿಕ ನಗರಿ ಹೆಸರು ಶಿಫಾರಸು | ಮೈಸೂರಿಗೆ ಈ ಬಾರಿಯೂ ತಪ್ಪಿದ ಯೋಗ!

ಹೊಸದಿಲ್ಲಿ: ಈ ವರ್ಷದ ಅಂತಾರಾಷ್ಟ್ರೀಯ ಯೋಗ ದಿನಾಚರಣೆಯ ಪ್ರಧಾನ ಕಾರ್ಯಕ್ರಮದ ಆತಿಥ್ಯ ವಹಿಸಲು ಜಾರ್ಖಂಡ್‌ನ ರಾಜಧಾನಿ ರಾಂಚಿ ಆಯ್ಕೆಯಾಗಿದೆ. ಇದರೊಂದಿಗೆ ಈ 'ಯೋಗ'ಕ್ಕಾಗಿ ಕಾಯುತ್ತಿದ್ದ ಮೈಸೂರಿಗೆ ಸತತ ಎರಡನೇ ವರ್ಷವೂ ಅವಕಾಶ ಕೈ ತಪ್ಪಿದೆ.

ಪ್ರಧಾನಿ ನರೇಂದ್ರ ಮೋದಿ ಅವರ ಮನವಿಯಂತೆ ವಿಶ್ವಸಂಸ್ಥೆಯು 2014ರಲ್ಲಿ ಜೂನ್‌ 21ನ್ನು ಅಂತಾರಾಷ್ಟ್ರೀಯ ಯೋಗ ದಿನವಾಗಿ ಘೋಷಿಸಿತ್ತು. 2015ರ ಜೂನ್‌ 21ರಿಂದ ಪ್ರತಿ ವರ್ಷ ಅಂತಾರಾಷ್ಟ್ರೀಯ ಯೋಗ ದಿನಾಚರಣೆ ನಡೆಯುತ್ತಿದ್ದು, ಮೋದಿ ಅವರು ಎರಡನೇ ಬಾರಿ ಅಧಿಕಾರ ಸ್ವೀಕರಿಸಿದ ಬಳಿಕ ನಡೆಯುತ್ತಿರುವ ಮೊದಲ ಆಚರಣೆ ಈ ವರ್ಷದ್ದು.

ಆಯುಷ್‌ ಇಲಾಖೆ ಈ ಬಾರಿ ದಿಲ್ಲಿ, ಶಿಮ್ಲಾ, ಮೈಸೂರು, ಅಹಮದಾಬಾದ್‌ ಮತ್ತು ರಾಂಚಿ ನಗರಗಳನ್ನು ಆಯ್ಕೆ ಮಾಡಿ ಪ್ರಧಾನ ಕಾರ್ಯಕ್ರಮದ ಅಂತಿಮ ಸ್ಥಳ ನಿಗದಿಗೆ ಪ್ರಧಾನಿ ಕಚೇರಿಗೆ ಕಳುಹಿಸಿತ್ತು. ಪಿಎಂಒ ಭಾನುವಾರ ಅಂತಿಮ ಆಯ್ಕೆಯನ್ನು ಪ್ರಕಟಿಸಿದ್ದು, ರಾಂಚಿಗೆ ಯೋಗ ಲಭಿಸಿದೆ.
..............................
2018ರಲ್ಲೂ ಮೈಸೂರು ಹೆಸರಿತ್ತು

ಪ್ರತಿ ವರ್ಷ ಯೋಗದ ಬೃಹತ್‌ ಕಾರ್ಯಕ್ರಮ ರೂಪಿಸುವ ಮೈಸೂರಿನಲ್ಲಿ ಪ್ರಧಾನ ಕಾರ್ಯಕ್ರಮ ರೂಪಿಸುವ ಬಗ್ಗೆ 2018ರಲ್ಲೂ ಚರ್ಚೆ ನಡೆದಿತ್ತು. ಆಯುಷ್‌ ಇಲಾಖೆ ಮೈಸೂರು, ಜೈಪುರ, ಹೈದರಾಬಾದ್‌ ಮತ್ತು ಅಹಮದಾಬಾದ್‌ ಹೆಸರಿನ ಪಟ್ಟಿ ಕಳುಹಿಸಿದರೆ ಪ್ರಧಾನಿ ಕಚೇರಿ ಉತ್ತರಾಖಂಡದ ಡೆಹ್ರಾಡೂನ್‌ನ್ನು ಆಯ್ಕೆ ಮಾಡಿತ್ತು. 2017ರಲ್ಲಿ ಬೆಂಗಳೂರಿನ ಹೆಸರೂ ಕೂಡಾ ಶಾರ್ಟ್‌ ಲಿಸ್ಟ್‌ ಸೇರಿತ್ತು.

ಯೋಗ ಮಹೋತ್ಸವ

ಜೂನ್‌ 21ರ ಯೋಗ ದಿನಾಚರಣೆಗೆ ಪೂರ್ವಭಾವಿಯಾಗಿ ದಿಲ್ಲಿಯಲ್ಲಿ ಜೂನ್‌ 1 ಮತ್ತು 2ರಂದು ಎರಡು ದಿನಗಳ ಯೋಗ ದಿನೋತ್ಸವ ನಡೆಯಿತು. ಯೋಗ ದಿನದ ಬಗ್ಗೆ ಜನರಲ್ಲಿ ಜಾಗೃತಿ ಮೂಡಿಸುವ ಉದ್ದೇಶದ ಈ ರ್ಕಾಕ್ರಮದಲ್ಲಿ ಯೋಗ ಶಿಕ್ಷಕರು, ವೃತ್ತಿಪರರು ಮತ್ತು ಕುತೂಹಲಿಗಳು ಸೇರಿದಂತೆ 10000 ಮಂದಿ ಭಾಗವಹಿಸಿದ್ದರು.