ಜಿಯೊಗೆ 170 ದಿನಗಳಲ್ಲಿ 10 ಕೋಟಿ ಚಂದಾದಾರರು

ಹೊಸದಿಲ್ಲಿ: ರಿಲಯನ್ಸ್‌ ಇಂಡಸ್ಟ್ರಿಸ್‌ನ ಜಿಯೊ ಟೆಲಿಕಾಂ 170 ದಿನಗಳಲ್ಲಿ ಹತ್ತು ಕೋಟಿ ಚಂದಾದಾರರನ್ನು ಹೊಂದಿದೆ. ಅಂದರೆ ಪ್ರತಿ ಸೆಕೆಂಡ್‌ಗೆ ಏಳು ಮಂದಿ ಜಿಯೊ ಗ್ರಾಹಕರಾಗುತ್ತಿದ್ದಾರೆ.

ದೇಶದ ಸ್ಪರ್ಧಾತ್ಮಕ ದೂರ ಸಂಪರ್ಕ ಮಾರುಕಟ್ಟೆ ಬೆಚ್ಚಿ ಬೀಳುವಂತೆ ಜಿಯೊ ಸೆಪ್ಟಂಬರ್‌ನಲ್ಲಿ ಫ್ರೀ ವಾಯ್ಸ್‌ ಮತ್ತು ಚೀಪ್‌ ಡಾಟಾ ಪ್ಲಾನ್‌ ಅನ್ನು ಮಾರ್ಚ್‌ ಕೊನೆಯವರೆಗೆ ಪ್ರಕಟಿಸಿದೆ. ಸಂಸ್ಥೆಯ ಅಧ್ಯಕ್ಷ ಮುಕೇಶ್‌ ಅಂಬಾನಿ ಅವರು ಟೆಕ್‌ ಇಂಡಸ್ಟ್ರಿ ಕಾನ್ಫರೆನ್ಸ್‌ನಲ್ಲಿ ಜಿಯೊದ ಈ ದಾಖಲೆಯನ್ನು ಪ್ರಕಟಿಸಿದ್ದಾರೆ. ಇಷ್ಟು ವೇಗದಲ್ಲಿ ಹತ್ತು ಕೋಟಿ ಚಂದಾದಾರರನ್ನು ಗಳಿಸುತ್ತೇವೆ ಎಂದು ನಾವು ಅಂದುಕೊಂಡಿರಲಿಲ್ಲ ಎಂದು ಅವರು ಹೇಳಿದ್ದಾರೆ.

ಬಹಳಷ್ಟು ಚಂದಾದಾರರು ಉಚಿತ ಡಾಟಾ ಸೌಲಭ್ಯ ಬಳಸಿಕೊಳ್ಳಲು ಎರಡನೇ ಆದ್ಯತೆಯಾಗಿ ಜಿಯೊ ಸಿಮ್‌ ಬಳಸುತ್ತಿದ್ದಾರೆ. ಹೀಗಿರುವಾಗ ಮಾರ್ಚ್‌ ಬಳಿಕ ಈ ಚಂದಾದಾರರು ಜಿಯೊ ಗ್ರಾಹಕರಾಗಿ ಉಳಿಯಲಿದ್ದಾರೆಯೇ ಎಂಬ ಪ್ರಶ್ನೆಗಳು ಕೂಡ ಎದುರಾಗಿವೆ. ಆದರೆ ಭಾರ್ತಿ ಏರ್‌ಟೆಲ್‌ ಮತ್ತು ಐಡಿಯಾ ಸೆಲ್ಯುಲಾರ್‌ ಗ್ರಾಹಕರ ಸಂಖ್ಯೆಯಲ್ಲಿ ಕ್ರಮವಾಗಿ ಶೇ 2.2, 1.1ರಷ್ಟು ಇಳಿಕೆಯಾಗಿದೆ.