ಆನೆಗಳಿಗೆ ಸರಕಾರಿ ಉದ್ಯೋಗ, ನಿವೃತ್ತಿ ವಯಸ್ಸು 70

ಕೋಲ್ಕೊತಾ: ಕಾಡುಗಳಲ್ಲಿ ಅರಣ್ಯ ಇಲಾಖೆಗೆ ನೆರವಾಗುತ್ತಿರುವ ತರಬೇತಿ ಪಡೆದಿರುವ ಆನೆಗಳು ಕೂಡ ಇನ್ನು ಮುಂದೆ ಸರಕಾರಿ ಉದ್ಯೋಗಿಗಳು. ಇವುಗಳಿಗೆ ಸರ್ವಿಸ್‌ ಬುಕ್‌ ಇದ್ದು, 70 ನಿವೃತ್ತಿ ವಯಸ್ಸು ನಿಗದಿಗೊಳಿಸಲಾಗಿದೆ. ಈ ವಯಸ್ಸಿನ ಬಳಿಕ ಅವು ಯಾವುದೇ ಕೆಲಸ ಮಾಡಬೇಕಿಲ್ಲ. ಅರಣ್ಯ ಇಲಾಖೆಯೇ ಇವುಗಳ ಆರೈಕೆ ಮಾಡಬೇಕು.

ಈ ಆನೆಗಳು ಕಾಡಲ್ಲಿ ಓಡಾಡುತ್ತಾ ಕಾಯುತ್ತಿರುತ್ತವೆ, ಅದೇ ರೀತಿ ದುರ್ಗಮ ಪ್ರದೇಶಗಳಿಗೆ ಪರಿಹಾರ ಸಾಮಗ್ರಿ ಹೊತ್ತೊಯ್ಯುತ್ತವೆ, ಪ್ರವಾಸಿಗಳ ಸಫಾರಿ, ಕಾಡಾನೆಗಳ ಪಳಗಿಸುವಿಕೆಯಲ್ಲೂ ಕಾರ್ಯ ನಿರ್ವಹಿಸುತ್ತವೆ. ಉತ್ತರ ಮತ್ತು ದಕ್ಷಿಣ ಬಂಗಾಳದಲ್ಲಿ ತರಬೇತಿ ಪಡೆದಿರುವ ಆನೆಗಳ ಸಂಖ್ಯೆ 156, ಅವುಗಳಲ್ಲಿ 70 ನಿವೃತ್ತಿ ವಯಸ್ಸು ದಾಟಿವೆ. ಹೀಗಾಗಿ ಉತ್ತಮ ತರಬೇತಿ ಪಡೆದಿರುವ ಆನೆಗಳ ಕೊರತೆ ಇದೆ. ಕಾಡಾನೆಗಳನ್ನು ಪಳಗಿಸಿ ತರಬೇತಿ ನೀಡಿದ ಬಳಿಕ ನಿವೃತ್ತಿ ವಯಸ್ಸು ದಾಟಿದ ಆನೆಗಳು ವಿಶ್ರಾಂತಿ ಪಡೆಯಲಿವೆ.

ಎಂಟು ವರ್ಷದೊಳಗಿನ ಆನೆಗಳಿಗೆ ತರಬೇತಿ ನೀಡಲು ಕಾಡಾನೆಗಳನ್ನು ಹಿಡಿಯುವ ಕೆಲಸವನ್ನು ಶೀಘ್ರವೇ ಆರಂಭಿಸಲಾಗುವುದು ಎಂದು ಹೆಚ್ಚುವರಿ ಮುಖ್ಯ ಅರಣ್ಯಾಧಿಕಾರಿ ಹೇಳಿದ್ದಾರೆ. ಪ್ರಸಿದ್ಧ ಆನೆ ತಜ್ಞರಾದ ಪಾರ್ವತಿ ಬರುವಾ ರಾಜ್ಯ ಸರಕಾರದ ಈ ನಿರ್ಧಾರವನ್ನು ಸ್ವಾಗತಿಸಿದ್ದಾರೆ. ನಿವೃತ್ತಿಗೊಂಡ ಆನೆಗಳನ್ನು ಕ್ರೂರವಾಗಿ ನಡೆಸಿಕೊಳ್ಳುವವರ ವಿರುದ್ಧ ಪ್ರಾಣಿಗಳ ಮೇಲಿನ ಕ್ರೌರ್ಯ ವಿರೋಧಿ ಕಾಯಿದೆಯಡಿ ಪ್ರಕರಣ ದಾಖಲಿಸುವ ಜತೆಗೆ ಕೇಂದ್ರದ 'ದಿ ಪ್ರಾಜೆಕ್ಟ್‌ ಎಲಿಫಂಟ್‌' ಇಲಾಖೆಯು ವಿವರಣೆ ಕೋರಲಿದೆ ಎಂಬುದು ಅಧಿಕಾರಿಗಳಿಗೆ ಕಸಿವಸಿ ಉಂಟು ಮಾಡಿದೆ.