ಅಮೆಜಾನ್‌ನಲ್ಲಿ ಸಿಗಲಿದೆ ಗೋಮೂತ್ರ ಅರ್ಕ, ಸೆಗಣಿ ಸೋಪ್‌, ಮೋದಿ ಕುರ್ತಾ

ಆಗ್ರಾ: ಗೋಮೂತ್ರ ಮತ್ತು ಸೆಗಣಿಯ ಬಗ್ಗೆ ನೀವು ನಂಬಿಕೆ ಹೊಂದಿದ್ದರೆ ಇನ್ನು ಮುಂದೆ ಅದು ಸುಲಭವಾಗಿ ಆನ್‌ಲೈನ್‌ ಮೂಲಕವೇ ನಿಮ್ಮ ಕೈ ಸೇರಲಿದೆ.

ಆರೆಸ್ಸೆಸ್‌ ನಡೆಸುತ್ತಿರುವ ಪ್ರಯೋಗಾಲಯವು ಇನ್ನು ಮುಂದೆ ಗೋಮೂತ್ರ ಉತ್ಪನ್ನಗಳು, ಸೆಗಣಿ ಸೋಪ್‌, ಮೋದಿ ಮತ್ತು ಯೋಗಿ ಕುರ್ತಾಗಳನ್ನು ಅಮೆಜಾನ್‌ನಲ್ಲಿ ಅಕ್ಟೋಬರ್‌ನಿಂದ ಮಾರಾಟ ಮಾಡಲಿದೆ.
ಮಥುರಾದಲ್ಲಿ ಆರೆಸ್ಸೆಸ್‌ ನಡೆಸುತ್ತಿರುವ ದೀನ ದಯಾಳ್‌ ಧಾಮವು ಆರಂಭದಲ್ಲಿ ಮೂವತ್ತು ಬಗೆಯ ಗೋಮೂತ್ರ ಮತ್ತು ಸೆಗಣಿಯಿಂದ ತಯಾರಿಸಲಾಗಿರುವ ಸೋಪ್‌, ಕಾಸ್ಮೆಟಿಕ್ಸ್‌ ಹಾಗೂ ಕಾಮಧೇನು ಅರ್ಕದಂಥ ಜೀರ್ಣಕಾರಿ ಚಿಕಿತ್ಸೆಕಾರಕಗಳನ್ನು ಮಾರಾಟ ಮಾಡಲಿದೆ. ಟೈಲರಿಂಗ್‌ ಘಟಕವು ಹತ್ತು ವಿನ್ಯಾಸಗಳ ಉಡುಪುಗಳನ್ನು ಮಾರಾಟ ಮಾಡಲಿದೆ. ಈ ಮೂಲಕ ಸ್ಥಳೀಯರಿಗೆ ಹೆಚ್ಚಿನ ಉದ್ಯೋಗ ಸೃಷ್ಟಿಯಾಗಲಿದೆ ಎಂದು ಆರೆಸ್ಸೆಸ್‌ ವಕ್ತಾರ ಅರುಣ್‌ ಕುಮಾರ್‌ ಹೇಳಿದ್ದಾರೆ.

ಆನ್‌ಲೈನ್‌ನಲ್ಲಿ ಈ ಮಾರಾಟ ಯಶಸ್ವಿಯಾದರೆ ಉತ್ಪನ್ನ ಹೆಚ್ಚಳ ಜತೆಗೆ ಉದ್ಯೋಗವು ಹೆಚ್ಚುತ್ತದೆ. ಕೇಂದ್ರವು ತಿಂಗಳಲ್ಲಿ ಒಂದು ಲಕ್ಷ ರೂ.ಗೂ ಹೆಚ್ಚಿನ ಸೌಂದರ್ಯವರ್ಧಕ ಮತ್ತು ಔಷಧಿ, ಮೂರು ಲಕ್ಷ ರೂ.ಗೂ ಹೆಚ್ಚಿನ ಉಡುಪುಗಳನ್ನು ತಯಾರಿಸಿ ಮಾರಾಟ ಮಾಡಲಿದೆ ಎಂದು ಅವರು ತಿಳಿಸಿದ್ದಾರೆ.

ಈ ಕೇಂದ್ರದಲ್ಲಿ ತಯಾರಾಗುವ ಅರ್ಕವು ಗೋಮೂತ್ರ ಮತ್ತು ಸೋಂಪನ್ನು ಒಳಗೊಂಡಿದೆ. ಕರಿಮೆಣಸು ನೆಲ್ಲಿ, ತುಳಸಿ ಒಳಗೊಂಡ ಟಾನಿಕ್‌, ನಾನಾ ನೋವು ನಿವಾರಕ ಗಿಡಮೂಲಿಕೆಯುಕ್ತ ತೈಲಗಳು, ಚ್ಯವನಪ್ರಾಶ್‌, ಫೇಸ್‌ಪ್ಯಾಕ್‌, ಶ್ಯಾಂಪೂ, ಟೂತ್‌ಪೇಸ್ಟ್‌ ಕೂಡ ತಯಾರಾಗುತ್ತವೆ.

ಗೋ ಉತ್ಪನ್ನಗಳನ್ನು ಕೇಂದ್ರದ ಗೋಶಾಲೆಯಲ್ಲಿರುವ ಗೋವುಗಳಿಂದಲೇ ಸಂಗ್ರಹಿಸಲಾಗುತ್ತದೆ ಎಂದು ಕೇಂದ್ರದ ಉದ್ಯೋಗಿ ರಾಮ್‌ ಗೋಪಾಲ್‌ ತಿಳಿಸಿದ್ದಾರೆ.