ವಿದೇಶದಲ್ಲಿ ಓದಲು 3.8 ಕೋಟಿ ವಿದ್ಯಾರ್ಥಿವೇತನ ಗಿಟ್ಟಿಸಿಕೊಂಡ ಟೀ ಮಾರುವವನ ಮಗಳು

ಲಖನೌ: ಆಕೆಯ ಹೆಸರು ಸುಧೀಕ್ಷಾ ಭಾಟಿ. ಬಡ ಟೀ ಮಾರಾಟಗಾರನ ಮಗಳವಳು. ವರ್ಷಕ್ಕೆ ಆ ಕುಟುಂಬದ ಆದಾಯ 72,000. ಕುಟುಂಬ ನಿರ್ವಹಣೆಗೆ ತಂದೆ ಒದ್ದಾಡುತ್ತಿದ್ದುದನ್ನು ಕಂಡ ಮಗಳು ತಾನವರಿಗೆ ಆಧಾರವಾಗಬೇಕೆಂದು ಕನಸು ಕಂಡಿದ್ದಳು. ಓದಿನಲ್ಲೂ ಅತಿ ಬುದ್ಧಿವಂತೆಯಾದ ಆಕೆ ಈಗ ತನ್ನ ಕನಸನ್ನು ನನಸಾಗಿಸುವ ಹಾದಿಯಲ್ಲಿ ಮೊದಲ ಹೆಜ್ಜೆ ಇಡುತ್ತಿದ್ದಾಳೆ.

ಕುಟುಂಬದಲ್ಲಿ ಅಕ್ಷರ ಜ್ಞಾನ ಹೊಂದಿರುವ ಮೊದಲ ಕುಡಿ ಎನ್ನಿಸಿಕೊಂಡಿದ್ದ ಸುಧೀಕ್ಷಾ ಈಗ ತನ್ನ ಕುಟುಂಬದಿಂದ ಹೆಚ್ಚಿನ ವಿದ್ಯಾಭ್ಯಾಸಕ್ಕೆ ವಿದೇಶಕ್ಕೆ ಹೋಗುತ್ತಿರುವ ಏಕೈಕ ಸದಸ್ಯಳೂ ಆಗಿದ್ದಾಳೆ.

ಸಿಬಿಎಸ್‌ಸಿ ಪರೀಕ್ಷೆಯಲ್ಲಿ 98% ಅಂಕ ಗಳಿಸಿ ತನ್ನ ಜಿಲ್ಲೆಗೆ ಪ್ರಥಮ ಸ್ಥಾನ ಪಡೆದ ಪ್ರತಿಭಾವಂತೆಗೆ , ಅಮೇರಿಕಾದ ಟಾಪ್ ಕಾಲೇಜುಗಳಲ್ಲಿ ಒಂದಾಗಿರುವ ಬಾಬ್ಸನ್ ಕಾಲೇಜನಲ್ಲಿ ಪದವಿಪೂರ್ವ ಶಿಕ್ಷಣ ಮುಂದುವರಿಸಲು 3.8 ಕೋಟಿ ವಿದ್ಯಾರ್ಥಿ ವೇತನ ದೊರೆತಿದೆ.

ತನ್ನ ಕನಸು ನನಸಾದ ಸಂತೋಷವಷ್ಟೇ ಅಲ್ಲ ಕುಟುಂಬಕ್ಕೆ ಆಧಾರವಾಗುವ ಕಾಲ ಸನ್ನಿಹಿತವಾಗುತ್ತದೆ ಎಂಬ ಸಂಭ್ರಮ ಕೂಡ ಸುಧೀಕ್ಷಾ ಕಣ್ಣಲ್ಲಿ ಮಿನುಗುತ್ತಿದೆ.