ಸರಳವಾಗಿ ರಿಜಿಸ್ಟರ್ ಮ್ಯಾರೇಜ್ ಮಾಡಿಕೊಂಡ ಸೈನಾ-ಕಶ್ಯಪ್

ಬ್ಯಾಡ್ಮಿಂಟನ್ ತಾರೆಗಳಾದ ಸೈನಾ ನೆಹ್ವಾಲ್, ಪಾರುಪಲ್ಲಿ ಕಶ್ಯಪ್ ರಿಜಿಸ್ಟರ್ ಮದುವೆ ಮೂಲಕ ಶುಕ್ರವಾರ (ಡಿಸೆಂಬರ್ 14) ದಾಂಪತ್ಯ ಜೀವನಕ್ಕೆ ಅಡಿಯಿಟ್ಟರು. ಯಾವುದೇ ಆರ್ಭಟ ಇಲ್ಲದೆ ಹಾರ ಬದಲಾಯಿಸಿಕೊಳ್ಳುವ ಮೂಲಕ ಪ್ರೇಮಿಗಳಿಬ್ಬರ ಮದುವೆ ತುಂಬಾ ಸರಳವಾಗಿ ನೆರವೇರಿತು.

ಸೈನಾ ಹಾಗೂ ಕಶ್ಯಪ್ ಪರಸ್ಪರ ಉಂಗುರ ಬದಲಾಯಿಸಿಕೊಂಡು ಬಳಿಕ ಹಾರ ವಿನಿಮಯ ಮಾಡಿಕೊಂಡು ವೈವಾಹಿಕ ಜೀವನಕ್ಕೆ ಅಡಿಯಿಟ್ಟರು. ಇವರಿಬ್ಬರ ಮದುವೆಗೆ ಬಂಧು ಮಿತ್ರರು ಆಗಮಿಸಿ ಶುಭ ಕೋರಿದರು. ಇವರ ಸರಳ ವಿವಾಹಕ್ಕೆ ಆಂಧ್ರಪ್ರದೇಶ ಗವರ್ನರ್ ನಸಿಂಹನ್ ದಂಪತಿಗಳು ಆಗಮಿಸಿ ನೂತನ ದಂಪತಿಗಳನ್ನು ಆಶೀರ್ವದಿಸಿದರು.

ಸುಮಾರು ಒಂದು ದಶಕದ ಗೆಳೆತನ ಬಳಿಕ ಇವರಿಬ್ಬರಲ್ಲಿ ಪ್ರೀತಿ ಚಿಗುರಿತ್ತು. ಇದೀಗ ಮದುವೆ ಬಂಧನ ಮೂಲಕ ದಾಂಪತ್ಯ ಜೀವನಕ್ಕೆ ಅಡಿಯಿಟ್ಟಿದ್ದಾರೆ. ಇದೇ ಭಾನುವಾರ ರಾತ್ರಿ (ಡಿಸೆಂಬರ್ 16) ಮತ್ತು ಸೋಮವಾರ (ಡಿಸೆಂಬರ್ 17)ಮುಂಜಾನೆ 12.58ರ ಶುಭ ಮುಹೂರ್ತದಲ್ಲಿ ಶಾಸ್ತ್ರೋಕ್ತವಾಗಿ ಮದುವೆ ನೆರವೇರಲಿದೆ. ಅದ್ದೂರಿಯಾಗಿ ಆರತಕ್ಷತೆ ಕಾರ್ಯಕ್ರಮ ಹೈದರಾಬಾದ್‌ನ ಹೋಟೆಲ್‌ನಲ್ಲಿ ನಡೆಯಲಿದೆ. ಕ್ರೀಡೆ, ಸಿನಿಮಾ ಮತ್ತು ರಾಜಕೀಯ ಕ್ಷೇತ್ರದ ಗಣ್ಯರನ್ನು ಆಹ್ವಾನಿಸಲಾಗಿದೆ.


ಸೈನಾ-ಕಶ್ಯಪ್ ಪ್ರೇಮ್ ಕಹಾನಿ
ಹೈದರಾಬಾದ್ ಮೂಲದ ಕ್ರೀಡಾಪಟುಗಳಿಬ್ಬರು ಕಳೆದ 10 ವರ್ಷಗಳಿಂದ ಪ್ರೇಮ ಸಂಬಂಧದಲ್ಲಿದ್ದಾರೆ ಎಂಬ ಗುಸುಗುಸು ಇತ್ತು. ಆದರೆ ಇಬ್ಬರು ಸಹ ಇದನ್ನು ಒಮ್ಮೆಯೂ ದೃಢಪಡಿಸಿರಲಿಲ್ಲ, ನಿರಾಕರಿಸಿಯೂ ಇರಲಿಲ್ಲ.


ಈ ಮದುವೆಯೊಂದಿಗೆ ನಿಜಜೀವನದ ಕ್ರೀಡಾ ಜೋಡಿಗಳಾದ ದೀಪಿಕಾ ಪಲ್ಲಿಕಲ್- ದಿನೇಶ್ ಕಾರ್ತಿಕ್, ಇಶಾಂತ್ ಶರ್ಮಾ- ಪ್ರತಿಮಾ ಸಿಂಗ್, ಗೀತಾ ಪೋಗಟ್-ಪವನ್ ಕುಮಾರ್, ಸಾಕ್ಷಿ ಮಲ್ಲಿಕ್- ಸತ್ಯವೃತ್ ಕಡಿಯಾನ್ ಸಾಲಿಗೆ ಸೈನಾ-ಕಶ್ಯಪ್ ಸೇರ್ಪಡೆಯಾಗಲಿದ್ದಾರೆ.


2014ರ ಕಾಮನ್‌ವೆಲ್ತ್ ಕ್ರೀಡಾಕೂಟದ ಚಿನ್ನದ ಪದಕ ವಿಜೇತ ಕಶ್ಯಪ್ ಸೈನಾ ಮತ್ತು ತಮ್ಮ ನಡುವೆ ವಿಶೇಷವಾಗಿರುವುದೇನಿಲ್ಲ. ನಾವಿಬ್ಬರು ಕೇವಲ ಸ್ನೇಹಿತರು ಮತ್ತು ಕ್ರೀಡಾ ಸಂಗಾತಿ ಎಂದು ಹೇಳಿಕೊಳ್ಳುತ್ತಲೇ ಬಂದಿದ್ದರು. ಆದರೆ ಇಬ್ಬರಿಗೂ ಬಹಳ ಆಪ್ತರಿದ್ದವರಿಗೆ ಅವರ ನಡುವೆ ಪ್ರೀತಿ ಇದೆ ಎಂಬ ಸತ್ಯ ಗೊತ್ತಿತ್ತು.


2005ರಲ್ಲಿ ಪುಲ್ಲೇಲಾ ಗೋಪಿಚಂದ್ ಅಡಿಯಲ್ಲಿ ತರಬೇತಿ ಆರಂಭಿಸಿದಾಗ ಇಬ್ಬರು ಮೊದಲ ಬಾರಿಗೆ ಭೇಟಿಯಾಗಿದ್ದರು. ವಿಶ್ವ ಚಾಂಪಿಯನ್‌ಶಿಪ್‌ನಲ್ಲಿ ಬೆಳ್ಳಿ ಪದಕ, ಒಲಿಂಪಿಕ್‌ನಲ್ಲಿ ಕಂಚು ಸೇರಿದಂತೆ 20 ಪ್ರತಿಷ್ಠಿತ ಪ್ರಶಸ್ತಿ ಗೆದ್ದ ಸೈನಾ ಭಾರತದ ಬ್ಯಾಡ್ಮಿಂಟನ್ ಸೂಪರ್ ಸ್ಟಾರ್ ಆಗಿ ಹೊರಹೊಮ್ಮಿದರೆ ತಾವೇನು ಕಮ್ಮಿ ಇಲ್ಲ ಎನ್ನುವಂತೆ ಕಶ್ಯಪ್ ಒಮ್ಮೆ ವಿಶ್ವದ 6 ನೇ ಶ್ರೇಯಾಂಕಕ್ಕೇರುವಷ್ಟು ಬೆಳೆದಿದ್ದರು. ಆದರೆ ಪದೇ ಪದೇ ಗಾಯಗೊಳಗಾಗಿದ್ದು ಅವರ ಪ್ರಗತಿಗೆ ತೊಡಕಾಯಿತು.