ವಾಯುಪಡೆಗೆ ರಫೇಲ್‌ ಅಧಿಕೃತ ಸೇರ್ಪಡೆ ಕಾರ್ಯಕ್ರಮ: ವಿವಿಧ ಧರ್ಮಗುರುಗಳಿಂದ 'ಸರ್ವ ಧರ್ಮ ಪೂಜೆ'!

ಅಂಬಾಲಾ: ಇನ್ನೇನು ಕೆಲವೇ ಕ್ಷಣದಲ್ಲಿ ಭಾರತೀಯ ವಾಯುಸೇನೆಗೆ ಬಲಭೀಮ ಎಂದೇ ಖ್ಯಾತಿ ಪಡೆದಿರುವ ರಫೇಲ್‌ ಯುದ್ಧ ವಿಮಾನಗಳು ಸೇರ್ಪಡೆಗೊಳ್ಳಲಿದೆ. ಈ ಹಿನ್ನೆಲೆ ಹರಿಯಾಣದಲ್ಲಿ ಅಂಬಾಲ ವಾಯುನೆಲೆಯಲ್ಲಿ ಕ್ಷಣಗಣನೆ ಆರಂಭವಾಗಿದೆ. ಪೂಜೆ-ಪುನಸ್ಕಾರಗಳು ಮುಂಜಾನೆಯಿಂದಲೇ ಆರಂಭಗೊಂಡಿದೆ.

ಆರಂಭದಲ್ಲಿ ಅಂಬಾಲಾ ವಾಯುನೆಲೆಯಲ್ಲಿ ಸರ್ವ ಧರ್ಮ ಪೂಜೆ ನೆರೆವೇರಿದೆ. ಎಲ್ಲಾ ಧರ್ಮದ ಧರ್ಮಗುರುಗಳು ರಫೇಲ್‌ ಯುದ್ಧ ವಿಮಾನಗಳಿಗೆ ವಿಶೇಷ ಪ್ರಾರ್ಥನೆ ಸಲ್ಲಿಸುವ ಮೂಲಕ ಸರ್ವ ಧರ್ಮ ಪೂಜೆ ನೆರೆವೇರಿಸಿದರು. ಇನ್ನು ಸಂಪ್ರಾದಾಯಕ ಕಾರ್ಯಕ್ರಮಕ್ಕೆ ರಕ್ಷಣಾ ಸಚಿವ ರಾಜನಾಥ್‌ ಸಿಂಗ್‌, ಫ್ರಾನ್ಸ್‌ನ ರಕ್ಷಣಾ ಸಚಿವೆ ಫ್ಲಾರೆನ್ಸ್ ಪಾರ್ಲಿ, ವಾಯುಸೇನೆ ಮುಖ್ಯಸ್ಥ ಆರ್‌ಕೆಎಸ್‌ ಭದುರಿಯಾ, ಸಿಡಿಎಸ್‌ ಬಿಪಿನ್‌ ರಾವತ್‌ ಸೇರಿ ಪ್ರಮುಖರು ಸಾಕ್ಷಿಯಾದರು.


ಇನ್ನು ಕಳೆದ ತಿಂಗಳು ಭಾರತಕ್ಕೆ ಆಗಮಿಸಿದ್ದ ಐದು ರಫೇಲ್‌ ಯುದ್ಧ ವಿಮಾನಗಳು ಇಂದು ಅಧಿಕೃತವಾಗಿ ಭಾರತದ ಬತ್ತಳಿಕೆಗೆ ಸೇರ್ಪಡೆಗೊಳ್ಳಲಿದೆ. ಚೀನಾದ ಗಡಿ ಕಿರಿಕ್‌ ನಡುವೆ ವಾಯುಪಡೆಗೆ ಸೇರ್ಪಡೆಗೊಳ್ಳುತ್ತಿರುವುದು ಭಾರೀ ಕುತೂಹಲ ಕೆರಳಿಸಿದೆ.

ದೇಶಾದ್ಯಂತ 44 ಲಕ್ಷದ ಗಡಿದಾಟಿದ ಕೊರೊನಾರ್ಭಟ: ಒಂದೇ ದಿನ ಲಕ್ಷದ ಸನಿಹಕ್ಕೆ ಸೋಂಕಿತರು..

ನಾಲ್ಕು ವರ್ಷಗಳ ಹಿಂದೆ ಭಾರತವು ಫ್ರಾನ್ಸ್‌ನಿಂದ 36 ರಫೇಲ್‌ ಫೈಟರ್‌ಜೆಟ್‌ಗಳ ಖರೀದಿ ಸಂಬಂಧ 59000 ಕೋಟಿ ರೂ. ಮೊತ್ತದ ಒಪ್ಪಂದ ಮಾಡಿಕೊಂಡಿತ್ತು. ಅದರಂತೆ ಜುಲೈ 29ರಂದು ಐದು ಯುದ್ಧ ವಿಮಾನಗಳು ಭಾರತಕ್ಕೆ ಆಗಮಿಸಿದ್ದವು. ಪಾಕಿಸ್ತಾನ ಮತ್ತು ಚೀನಾ ಉಪಟಳದ ಹಿನ್ನೆಲೆಯಲ್ಲಿ ದೇಶದ ರಕ್ಷಣಾ ವ್ಯವಸ್ಥೆ ಬಲವರ್ಧನೆಗೆ ಈ ಯುದ್ಧ ವಿಮಾನಗಳು ಅತ್ಯವಶ್ಯವಾಗಿವೆ.