ಅರ್ಜಿದಾರರಿಗೆ ಎಲ್ಲ ದಾಖಲೆ ನೀಡಿ: ಜಸ್ಟಿಸ್‌ ಲೋಯಾ ಸಾವಿನ ಪ್ರಕರಣದಲ್ಲಿ ಸುಪ್ರೀಂ ಕೋರ್ಟ್‌

ಹೊಸದಿಲ್ಲಿ: ಜಸ್ಟಿಸ್‌ ಬಿ.ಎಂ ಲೋಯಾ ಅವರ 'ನಿಗೂಢ ಹತ್ಯೆ' ಪ್ರಕರಣದಲ್ಲಿ ಅರ್ಜಿದಾರರಿಗೆ ಎಲ್ಲ ವಾಸ್ತವಾಂಶಗಳನ್ನು ತಿಳಿಯುವ ಹಾಗೂ ವೈದ್ಯಕೀಯ ವರದಿ ಸಹಿತ ದಾಖಲೆಗಳನ್ನು ಪರಿಶೀಲಿಸುವ ಅವಕಾಶ ನೀಡುವಂತೆ ಸುಪ್ರೀಂ ಕೋರ್ಟ್‌ ಮಹಾರಾಷ್ಟ್ರ ಸರಕಾರಕ್ಕೆ ಆದೇಶ ನೀಡಿದೆ.

'ಅರ್ಜಿದಾರರಿಗೆ ಎಲ್ಲವನ್ನೂ ತಿಳಿಯುವ ಹಕ್ಕಿದೆ' ಎಂದಿರುವ ಸುಪ್ರೀಂ ಕೋರ್ಟ್‌, ಸೊಹ್ರಾಬುದ್ದೀನ್‌ ನಕಲಿ ಎನ್‌ಕೌಂಟರ್‌ ಪ್ರಕರಣದ ತನಿಖೆ ನಡೆಸುತ್ತಿದ್ದ ಸಿಬಿಐ ನ್ಯಾಯಾಧೀಶ ಬಿ.ಎಂ ಲೋಯಾ ಸಾವಿನ ಕುರಿತು ಸ್ವತಂತ್ರ ತನಿಖೆ ನಡೆಸಲು ಒಪ್ಪಿಕೊಂಡಿದೆ.

ನ್ಯಾಯಾಧೀಶರ ಸಾವು 'ಸಂದೇಹಾಸ್ಪದ'ವಾಗಿದೆ ಎಂದು ಎರಡು ಪ್ರತ್ಯೇಕ ಅರ್ಜಿಗಳಲ್ಲಿ ಆರೋಪಿಸಲಾಗಿದೆ. ಮೊದಲನೆಯದು ಪತ್ರಕರ್ತ ಬಂಧುರಾಜ್ ಸಂಭಾಜಿ ಸಲ್ಲಿಸಿದ್ದರೆ, ಎರಡನೆಯದನ್ನು ರಾಜಕೀಯ ಕಾರ್ಯಕರ್ತ ತೆಹ್ಸೀನ್ ಪೂನಾವಾಲ ಸಲ್ಲಿಸಿದ್ದಾರೆ.

ಮಹಾರಾಷ್ಟ್ರ ಸರಕಾರದ ಪರವಾಗಿ ಕೋರ್ಟಿಗೆ ಹಾಜರಾದ ಹಿರಿಯ ವಕೀಲ ಹರೀಶ್‌ ಸಾಳ್ವೆ, ಅರ್ಜಿದಾರರ ಜತೆ ಯಾವುದೇ ದಾಖಲೆ ಹಂಚಿಕೊಳ್ಳಲು ಹಿಂಜರಿಕೆಯಿಲ್ಲ; ಆದರೆ ಅವರು ಅದನ್ನು ಬಹಿರಂಗಗೊಳಿಸಬಾರದು ಅಷ್ಟೆ ಎಂದು ಮನವಿ ಮಾಡಿದರು.