ಪರೀಕ್ಷೆ ಲೈವ್ ದೃಶ್ಯ ನೀಡಿದ ಶಾಲೆ

ಅಹಮದಾಬಾದ್‌: ಪರೀಕ್ಷೆ ಕೊಠಡಿಗಳಲ್ಲಿ ಸಿಸಿಟಿವಿ ಕಣ್ಗಾವಲಲ್ಲದೇ, ಮಕ್ಕಳು ಪರೀಕ್ಷೆ ಬರೆಯುವುದನ್ನು ಪೋಷಕರು ಆನ್‌ಲೈನ್‌ನಲ್ಲಿ ವೀಕ್ಷಿಸಲು ಗುಜರಾತಿನ ಅತ್ಯುತ್ಸಾಹಿ ಶಾಲಾ ಮಂಡಳಿ ಅನುವುಮಾಡಿಕೊಟ್ಟಿದೆ.

ಪೋಷಕರ ಒತ್ತಡ ಕಡಿಮೆ ಮಾಡುವ ಉದ್ದೇಶದಿಂದ ಈ ಕ್ರಮ ಕೈಗೊಂಡಿರುವುದಾಗಿ ಶಾಲಾ ಆಡಳಿತ ಮಂಡಳಿ ಹೇಳಿದ್ದರೂ, ಈ ಬಗ್ಗೆ ತೀವ್ರ ಆಕ್ಷೇಪ ವ್ಯಕ್ತವಾಗಿದೆ. ಒತ್ತಡದಲ್ಲಿರುವ ವಿದ್ಯಾರ್ಥಿಗಳಿಗೆ ಇದರಿಂದ ಮತ್ತೂ ಒತ್ತಡ ಹೆಚ್ಚುವುದು ಎಂದು ದೂರಲಾಗಿದೆ.

ಶಾಲಾ ಆಡಳಿತ ಮಂಡಳಿ ಸಂಬಂಧ ಪಟ್ಟ ಇಲಾಖೆಯೊಂದಿಗೆ ಯಾವುದೇ ಸಮಾಲೋಚನೆ ನಡೆಸದೆ ಇಂತಹ ನಿರ್ಧಾರ ಕೈಗೊಂಡಿರುವುದು ಕಾನೂನು ಬಾಹಿರ. ಶಾಲಾ ಆಡಳಿತ ಮಂಡಳಿಯ ವಿರುದ್ಧ ಕಠಿಣ ಕ್ರಮ ಜರುಗಿಸುವುದಾಗಿ ಗುಜರಾತ್ ಪರೀಕ್ಷಾ ಮಂಡಳಿ ಎಚ್ಚರಿಕೆ ನೀಡಿದೆ.

ಬುಧವಾರ ಆರಂಭಗೊಂಡ ಗುಜರಾತ್ ಮಾಧ್ಯಮಿಕ ಮತ್ತು ಪ್ರೌಢಶಿಕ್ಷಣ ಮಂಡಳಿಯ 10ನೇ ಹಾಗೂ 12ನೇ ತರಗತಿಯ ಪರೀಕ್ಷೆಯ ಮೊದಲನೇ ದಿನ, ವಿದ್ಯಾರ್ಥಿಗಳನ್ನು ಶಾಲೆಗೆ ಬಿಡಲು ಬಂದ ಪೋಷಕರಿಗೆ ಅಚ್ಚರಿ ಕಾದಿತ್ತು. ಈ ಪರೀಕ್ಷಾ ಕೇಂದ್ರ ಸಿಸಿಟಿವಿ ಕಣ್ಗಾವಲ ಅಡಿಯಲ್ಲಿದೆ. ನ್ಯಾಯಯುತ ಹಾಗೂ ಪಾರದರ್ಶಕವಾಗಿ ಪರೀಕ್ಷೆ ನಡೆಯಲಿದ್ದು, ನಿಮ್ಮ ಮಕ್ಕಳು ಪರೀಕ್ಷೆಯನ್ನು ಬರೆಯುವುದನ್ನು ಆನ್‌ಲೈನ್‌ನಲ್ಲಿಯೇ ವೀಕ್ಷಿಸಬಹುದು ಎಂಬ ಸಂದೇಶ ಪರೀಕ್ಷಾ ಕೇಂದ್ರದ ಗೇಟ್ ಮೇಲೆ ಇತ್ತು.

ಪರೀಕ್ಷೆ ಕೇಂದ್ರದ ನೇರ ದೃಶ್ಯ ವಿಕ್ಷೀಸಲು ಪೋಷಕರಿಗೆ ‘MEye’ ಆ್ಯಪ್‌ ಡೌನ್‌ಲೋಡ್ ಮಾಡಿಕೊಳ್ಳುವಂತೆ ಶಾಲಾ ಆಡಳಿತ ಮಂಡಳಿ ನಿರ್ದೇಶನ ನೀಡಿತ್ತು. ಒಮ್ಮೆ ಈ ಆ್ಯಪ್‌‌ಗೆ ಲಾಗಿನ್ ಆಗುವ ವ್ಯಕ್ತಿ ಸತತವಾಗಿ 3 ಗಂಟೆಗಳ ಕಾಲ ಪರೀಕ್ಷಾ ಕೊಠಡಿಯಲ್ಲಿ ನಡೆಯುವ ನೇರ ದೃಶ್ಯಗಳನ್ನು ವಿಕ್ಷೀಸಬಹುದಿತ್ತು.